Saan agpalapped ken kasla nengneng iti bukod da mismo a health protocol ti 50IB-503rd IBgde Philippine Army ken Philippine National Police (PNP) iti tuloy-tuloy da a panag-operasyon iti probinsya bayat a kumarkaro ti krisis a sangsangoen ti umili gapu iti pandemya a COVID-19.

Daytoy laeng bulan ti Setyembre ket nangisayangkat dagiti operasyong pangkombat iti munisipyo ti Balbalan, Pinukpuk, Lubuagan, Pasil ken Tabuk. Naigiddan daytoy kadagiti nababayagen nga operasyon ti RCSPT kadagiti barbaryo kadagiti nasao a munisipyo. Iti tallo a baryo iti munisipyo ti Pinukpuk manipud Setyembre 22-24, imbes nga ayuda ken libre a mass testing ti aramiden, ket indauloan ti soldado, pulis ken dagiti opisyal ti barangay dagiti martsa-rally laban kano iti CPP-NPA-NDF. Maysa a dakkel a panaglabsing iti maysa a metro a physical distancing ken panangiparit iti mass gathering nga health protocol mismo nga inbaba ti Department of Health ken Inter-Agency Task Force.

Ayan na kadi ti ibagbaga ti rehimen Duterte a panagsurot iti social distancing kadagiti operasyon ti RCSPT nu sadinno ket inukopar dagiti platun ti soldado ken pulis dagiti balbalay ti sibilyan? Nilabsing da la ngarud ti Geneva Protocol nu sadinno ket maiparit ti panagkampo kadagiti balbalay ken pampubliko a disso ket binadekan da pay ti karbengan ti umili a maisigurado a natalged da iti COVID-19 ken masursurot ti health protocol.

Ngem ania kadi ti panggep dagitoy nga operasyon militar? Adayo la unay iti panggep a kontrolen ti pandemya a COVID-19. Ti husto a panggep ti awan-sarday nga operasyon militar ket ti panangikamakam ti rehimen Duterte a gun-oden ti arapaap na a buraken ti rebolusyonaryo a tignayan intono tawen 2022. Isunga iti panawen a mangkasapul ti umili ti serbisyo medikal, militar a solusyon ti sungbat ti rehimen iti kiddaw ti umili.

Iti sango ti napigsa a panawagan ti umili nga isardeng ti operasyon militar gapu iti danag nga aglalo a sumaknap ti COVID-19 iti probinsya ket inpilit dagiti soldado ken pulis a sumrek kadagiti barbaryo tapno mangipasaknap ti saywar, red-tagging kadagiti lehitimo nga organisasyon ti umili nga agresulta iti pilit a panangipasurender kadagiti nalalawag a sibilyan kas kameng ti NPA.

Tuloytuloy ti panangilastog ti AFP-PNP iti nagadu kano a nagsurender nga NPA ken Milisyang Bayan iti Kalinga. Iti aktwal, awan pay iti 1% kadagiti nagsurender ti pudno a Hukbo nu di ket dagitoy ket dagiti sibilyan a naalillaw agsurender gapu iti kuwarta, groceries ken livelihood nga ited ti TF-ELCAC babaen kadagiti ahensya ti gobyerno kas iti DTI ken DSWD. Ti kadawyan nga aramiden da ket agpaayab da ti pulong, agited da ti kuwarta ken groceries, agpapirma da, adda ti maiyaramid a picture taking ken kalpasan ti sumagmamano nga aldaw ket iparang da kas instant fake surrenderees. Instant met lang a korapsyon daytoy iti pondo ti E-CLIP gapu ta iti aktwal ket nagbassit laeng ti ited da kadagiti napwersa da a masa nga agsurender ken ti kaaduan ti “benepisyo” koma a maala ket mapan kadagiti opisyal ti army ken pulis. Adda met laeng kasasaad a butngen da a maikkat kas benepisyaryo ti 4Ps dagiti masa nu saan da makipaset iti surrender campaign activities ti reaksyunaryo a gobyerno.

Adda met lang ti 16 a barangay nga intudo ti TF-ELCAC kas “influenced” ti CPP-NPA-NDF. Instant red-tagging la ngarud ken instant korapsyon pay. Basar iti programa ti TF-ELCAC, bukbukan da ti nagadu a proyekto dagiti nasao a barangay tapno kano nasungbatan ti ramut ti armado a panaglaban ti umili. Iti aktwal, dagitoy a proyekto ket napnuan ti korapsyon ken saan a talaga makasungbat iti pang-ekonomiya a kasapulan ti masa. Adu kadagitoy a proyekto ket pangmabiitan, nalaka a madadael ken agited laeng ti gulo iti komunidad gapu ta saan la ngarudon makaanay ket sumagmamano laeng ti maikkan ken aktwal a nagnam-ay. 10.5% laeng daytoy iti amin a barangay iti Kalinga.
Amin a perwisyo a daytoy ket tapno laeng aramiden ti ilusyon nga agballigi ti rehimen a buraken ti rebolusyonaryo a tignayan. Iti aktwal ket perwisyo, distorbo ken buteng laeng ti epekto iti umili. Awan ti umno a sungbat ti rehimen kadagiti demokratiko a kadawatan ti umili. Pasismo ken terorismo ti ited ti rehimen uray iti panawen a sangsangoen ti entiro a lubong ti krisis ti COVID-19.

Kapada ti AFP-PNP dagiti bukatot a pupulitiko nga us-usaren da ti impluwensiya ken bileg da tapno labsingen ken lisiyan dagiti health protocols. Maysa kadagiti umuna a kaso ti COVID-19 iti probinsya ket pulis a saan a sumurot iti quarantine ken swab tesing protocol. Umad-adu iti intar ti soldado ken pulis iti Kalinga ti naaddaan ti COVID-19 ngem uray iti kasta ket itultuloy da latta ti operasyon militar da.

Iti ababa a sao, maysa ti AFP-PNP kadagiti posible nga agpaspasaknap ti COVID-19 iti probinsya gapu kadagiti agtultuloy nga operasyon da isunga rumbeng ken nainkalintegan laeng ti panawagan ti umili nga isardeng da pay ti operasyon iti panggep nga kontrolen ti panagwaras ti COVID-19. Nainkalintegan nga ipanawagan ti umili ti panangisayangkat ti libre a mass testing, panangited ti libre a PPE ken ayuda para kadagiti bulnerable a sektor a nakaro a naapektaran ti nalawa a disempleyo gapu iti lockdown. Nainkalintegan a labanan ti kinaawan ti panangisakit, panagbaybay-a, pasismo ken terorismo ti rehimen Duterte.

Ti militarista nga addang ti rehimen Duterte ket agpakaro iti pakinaken ti umili nga ipangato ti porma ti pannakidangadang da agturong iti armado a panaglaban. Ti pasismo ti rehimen ket aglalo a mangiduron iti umili tapno tumakder ken lumaban isunga imbes a maburak, agtultuloy ti panaggil-ayab ti apoy ti pannakidangadang ti umili ken ti rebolusyonaryo a tignayan. Aglalo a lumatlatak iti masa ti kinahusto ti panagrebolusyon, a ti kakaisuna a sungbat iti panagrigrigat ti umili ket ti dalan ti rebolusyon.

Layas militar!
Serbisyong Medikal, Hindi Militar!