Read in: English

Nagpahimatngon an National Democratic Front-Eastern Visayas kontra ha mga panalinguha han National Task Force to End Local Communist Armed Conflict (NTF-ELCAC) nga mangampanya kontra ha pagtanggal han badyet han pork barrel han militar.

Nagsering an NDF-EV nga kumarawat ini han mga report nga pira nga barangay ha Gamay, Northern Samar, Dolores, Eastern Samar, ngan Matag-ob, Tabango, Villaba, Calubian ngan Leyte, prubinsya han Leyte an ginpirit nga magpagawas han resolusyon nga nananawagan nga “igpadayon an pagpondo ngan implementasyon” han Barangay Development Program (BDP) ilarum han NTF-ELCAC.

Ginsaaran an mga upisyal han barangay hin P20 kamilyon han pondo bisan kun waray bisan usa ha ira mga barangay an kalakip ha unom nga “benepisyaryo” han BDP ha Eastern Visayas.

Ini nga kampanya para ha BDP usa ha pinakabag-o nga panalinguha han NTF-ELCAC nga seguruhon nga magpapabilin an badyet han pasista nga task force, dugang han NDF-EV. Kalakip dinhi an tubtub P44 kabilyon nga pondo ilarum han BDP nga panhukip ha mga militarista nga lokal nga upisyal agud bumotos hin pabor ha mga maka-Duterte nga kandidato ha eleksyon 2022.

“Ginsisingabot han NTF-ELCAC an presente nga krisis ha ekonomiya agud uwaton an mga kablas nga lokal nga gubyerno ha kabaryuhan nga makarawat hira han pampubliko nga pondo para ha ira mga molupyo, bisan kun igbubursa la ini han higtaas nga upisyal han militar ngan gubyerno han rehimen Duterte ngan gagamiton para ha ira kriminal nga interes,” sering han NDF-EV.

Una na nga nangampanya an tagapagyakan han NTF-ELCAC nga hi Lorraine Badoy kaupod an 803rd Infatry Brigade ha usa nga miting ha mga lokal nga upisyal han Catubig, Northern Samar hadton Mayo.

Nanawagan an NDF-EV ha katawhan nga pakusgon an ira panawagan nga tanggalan han badyet an pasista nga NTF-ELCAC ngan atuhan an mga paningkamot han rehimen Duterte nga ibalhin an pampubliko nga pondo ngadto ha pagbayad ha militar ngan para ha eleksyon.#