Ngayong
2008, tinatanaw ng Partido ang isang taon ng malalaking lahatang-panig
na rebolusyonaryong pagsulong. Ang maniningning na tagumpay at mayamang
karanasang natamo noong nakaraang taon kapwa sa ligal na pakikibaka at
armadong rebolusyon ay puhunan para sa ibayo pang pag–abante ng
rebolusyong Pilipino.
Sa unang taon ng brutal na kampanyang Oplan Bantay Laya (OBL) 2,
napilitan ang Armed Forces of the Philippines (AFP) na amining bigo
silang kamtin ang mga itinakda nilang target na "durugin" ang ilang
larangang gerilya. Bago ito, nalantad sa publiko ang internal na
pagtatasa ng AFP tungkol sa kabiguan ng limang taong OBL 1 na siyang
sinundan ng kasalukuyang OBL 2. Pawang kabulastugan ang ipinagmamalaki
ng AFP na nadurog nila ang 13 larangang gerilya ng BHB noong 2007 at na
madudurog nila ang 17 pang larangang gerilya sa unang kwarto lamang ng
2008. Mas malalaki pang kabiguan ang kakaharapin ng AFP dahil sa
patuloy na paglagablab ng apoy ng digmang bayan sa buong bansa.
Mula Luzon hanggang Mindanao, binigo ng mga yunit ng BHB ang mga
laking-dibisyon, brigada at batalyong kampanyang panunupil na inilunsad
ng AFP upang durugin ang tinagurian nilang mga "balwarte" ng armadong
rebolusyonaryong kilusan. Sa mga larangang dinumog ng mga pwersa ng
AFP, hindi lamang nakapagpreserba ng lakas ang mga yunit ng BHB,
patuloy pang nakapagpalalim ang mga ito ng pag-ugat sa masa,
nakapagmantine ng inisyatibang militar at naipagtagumpay ang maraming
kontra-atake sa kaaway. Kaalinsabay, nakapagpalawak pa at nakapaglunsad
ang BHB ng maraming taktikal na opensiba sa mga lugar kung saan
relatibong manipis ang pakat ng kaaway.
Isa sa mga tampok na karanasan ang pagharap at pagbigo ng Pulang
Diwata Command ng BHB sa kampanyang militar ng 4th Infantry Division ng
Philippine Army sa Northeastern Mindanao. Bigo ang sustenidong mga
operasyong militar ng AFP na durugin ang dalawang larangang itinuring
nitong prayoridad na atakehin. Nakapaglunsad ang mga Pulang mandirigma
sa mga larangang ito ng 42 taktikal na opensiba at nakasamsam ng 25
armas. Mahigit 103 tropa ng AFP ang namatay at 50 ang nasugatan.
Sa Panay, naglunsad ang AFP ng mga operasyong laking-brigada at
batalyon upang gapiin ang rebolusyonaryong kilusan doon. Ngunit sa
katapusan, ang tanging naipagyabang ng AFP ay mga larawan ng mga kampo
ng BHB na matagal nang nilisan ng mga gerilya.
Ang pagdagsa ng mga pwersa ng AFP sa isla ay nagbigay sa mga Pulang
mandirigma roon ng maraming pagkakataong makapaglunsad ng mga
operasyong isnayp at pananambang. Marami sa kaaway ang namatay,
samantalang wala kahit isang nasawing Pulang mandirigma. Kabaligtaran
ng kasinungalingan ng AFP na gapi na ang rebolusyonaryong kilusan sa
isla, kinakitaan pa ang Panay ng signipikanteng paglaki at kasigasigan
sa pagtatanggol at paglaban ng kasapian ng Partido, hukbong bayan at
rebolusyonaryong kilusan sa harap ng matitinding atake ng kaaway (tingnan ang kaugnay na artikulo).
Sa 22 mayor na taktikal na opensiba ng BHB laban sa AFP sa
Ilocos-Cordillera, at kahit sa tatlong depensiba kung saan naagaw ng
mga gerilya ang inisyatiba, malaki ang nalagas sa mga pwersa ng kaaway.
Namatay ang 60 tropa at 38 ang nasugatan sa panig ng AFP. Sa mga
labanang ito, apat na upisyal at tauhan ng AFP ang nabihag ng BHB.
Ilan lamang ang mga ito sa matatagumpay na taktikal na opensiba ng
BHB sa iba't ibang bahagi ng bansa noong 2007. Marami pang opensiba sa
iba't ibang rehiyon na hindi pa naiuulat sa Ang Bayan. Sa ilan pa lamang na naiulat na sa Ang Bayan,
di bababa sa 204 na elemento ng kaaway ang namatay at mahigit 149 ang
nasugatan. Siyam na mga sundalo at elemento ng CAFGU ang nabihag sa mga
engkwentro at kalauna'y pinalaya sa makataong batayan. Naisagawa rin
ang pagpaparusa sa mga elemento ng death squad ng AFP na
sangkot sa ekstrahudisyal na mga pamamaslang at pagdukot. Pinatawan
sila ng parusa matapos ang masusing mga imbestigasyon alinsunod sa mga
rebolusyonaryong prosesong hudisyal.
Nasamsam ng BHB ang di bababa sa 327 armas na karamihan ay malalakas
na riple, libu-libong bala at samutsaring gamit-militar at kagamitang
pangkomunikasyon. Ang mga sandata at gamit na ito ay sapat para armasan
ang tatlong kumpanya ng mga bagong mandirigma. Tampok sa mga opensibang
ito ang reyd sa Davao Penal Colony kung saan nakasamsam ang mga Pulang
mandirigma ng 108 armas nang hindi nagpapaputok.
Alinsunod sa panawagan ng Komite Sentral ng PKP, nakatuon ngayon ang
buong rebolusyonaryong kilusan sa lahatang-panig na pagsasaayos ng mga
rebolusyonaryong gawain para pag-ibayuhin ang pagsusulong sa
rebolusyonaryong pakikibaka ng mamamayan ngayong taon at pabilisin ang
pagpasok sa gitnang bahagi ng estratehikong depensibang yugto ng
digmang bayan. Habang puspusang nilalabanan ng lahat ng
rebolusyonaryong pwersa ang panunupil at pagpapahirap ng rehimeng
US-Arroyo sa mamamayan, kumikilos sila nang tanaw ang estratehikong
layuning agawin ang kapangyarihang pampulitika mula sa mga
reaksyunaryong naghaharing uri, wakasan ang buong malakolonyal at
malapyudal na paghahari sa bansa, tapusin ang pambansa-demokratikong
yugto at tumungo sa mga susunod na yugto ng rebolusyong Pilipino. 
