Panawagan sa rehimeng Macapagal-Arroyo nga pauntaton ang mga opensibang militar sang gubyerno kag dululungan nga magdeklara sa untat-lupok ang duha nga bahin subong nga Kapaskwahan

Gregorio "Ka Roger" Rosal
Spokesperson
Communist Party of the Philippines
Disyembre 08, 2001

Isa nga maayo nga bagay ang pagbaton ni Gloria Macapagal-Arroyo sa hangkat sang NDFP para sa dululungan nga deklarasyon sang ceasefire halin Disyembre 15 tubtob Enero 15. Ginakinahanglan nga sabton niya ini subong sang aktwal nga mga tikang.

Makapaayo ini para sa pagpahilway sang mga priso sang inaway nga uyat sang BHB kag pagpahilway man sang mga priso nga pulitikal sang gubyerno pakadto sa pagpaayo sang klima para sa pagbalik sa pagsinugilanon nga pangkalinongan.

Ang subong nga SOMO bug-os man nga pagabenepisyohan sang pumuluyo labina sa mga areya nga madamuan nga ginasentrohan sang grabe nga opersyong militar sang mga armado nga pwersa sang gubyerno gikan pa sadtong Hunyo 2001.

Bisan man, maipatuman man ang dululungan nga SOMO, ginakinahanglan nga mangin alerto ang pumuluyo kag mga rebolusyonaryo nga armadong pwersa sa katusohan sang rehimeng Macapagal-Arroyo. Ginakinahanglan nga tayuyon nga preparahan kag atubangon ang mapintas nga pagtayuyon kag plano pa nga pagpasingki sang mga atake sang rehimen.

Sa kasaysayan, sa pihak sa mga deklarasyon sang SOMO, permanente man ini nga ginalapas sang AFP sa paglunsar sang mga opensibang operasyon nga militar. Dugang pa, sa mga nakapalagi nga bulan, ginpakita sang rehimeng Macapagal-Arroyo ang militarista nga polisa sang iya nga reaksyunaryo kag papet nga gubyerno sa pag-atubang sa madasig nga nagalala nga sitwasyon kag mga palaligban sang pungsod.

Pat-ud nga labi pa sini subong nga pagasingkion ang militarismo sa atubang sang pagtinaga sang US State Department sa rebolusyonaryo nga kahublagan bilang �terorista� kag ang segurado nga kaangot sining dugang nga ayuda nga militar gikan sa US.

Nagapangibabaw subong ang militarista nga hubon nga ginapamunuan ni Angelo Reyes nga siya man nga daan nga ara sa likod sang warmongering sang ginpalayas nga rehimeng Estrada. Padayon ang paggahod sang hubon nga ini para sa pila kalibo pa nga dugang nga tropa kag CAFGU kag dugang nga badyet militar sa pihak sang tuman kadaku nga depisit sa badyet kag utang sa sulod kag guwa sang pungsod kag padayon nga pagbuhin sang daan nga kulang nga gastos sa mga serbisyo nga pangkatilingban.

Halin sadtong Setyembre 11, labi pa nga nag-ibabaw ang militarista nga polisa sa gubyerno. Maathag nga ang kontra-terorista nga pagpang-inaway sang US ginatrato sang papet nga rehimen nga bulawanon nga oportunidad agud itanyag ang kadutaan, tropa kag serbisyo sang Pilipinos sa agresyong imperyalista kabaylo sang mas daku nga ayudang militar kag pinansyal kag iban pa nga mga pabor sa negosyo kag baligyaanay. Todo nga pag-alagdon sa polisa nga pangguwa kag militarismo sa sulod kag guwa sang pungsod ang ginasaligan sang reaksyunaryo kag papet nga rehimen sa kahimtangan nga ginabayo ang pungsod kag bilog nga kalibutan sang tuman kasingki nga krisis.

Sa lapad, singki kag brutalidad sang pagpangwasak sa kaumhan sang bag-o nga pungko pa lamang nga rehimeng Macapagal-Arroyo, sobra nga nalapawan na sini ang kapintasan sang ginpahalin nga rehimeng Estrada.

Nagapanguna nga target sang militarisasyon ang pulo sang Mindoro makaligad nga ginhiwat didto ang madalag-an nga pagpahilway kay Maj. Noel Buan sadtong Abril 6. Ginahiwat didto indi lamang ang malaparan, dalagkuan kag tayuyon nga mga operasyong search and destroy kon indi mangin ang lapnagon nga pagpangkuot, pagpangpatay kag pagpangkibang sa mga baryo nga ginadudahan nga nagasuporta sa rebolusyonaryo nga kahublagan.

Mas kinahanglan nga preparahan sini ang mapintas nga pagpadayon kag plano pa nga pagpasingki sang mga atake sang rehimen. Sa atubang sang grabe nga pagpangsalakay nga ginahimo subong sang rehimen sa mga larangang gerilya kag baseng masa sang BHB, indi pwede ang unilateral lamang nga pagdeklara kag pagpatuman sang Partido sang untat-lupok.###

Back to top