Indi pwede isurender sang pumuluyong Pilipino ang ila mga kadalag-an sa armadong paghimakas

Gregorio "Ka Roger" Rosal
Spokesperson
Communist Party of the Philippines
Nobyembre 03, 2002

Wala na gid kahigayunan ang negosasyon pangkalinungan sa idalum sang rehimeng Macapagal-Arroyo. Indi ini handa nga atubangon, sugilanunan kag lubaron ang mga basehang problema nga ginaatubang sang pumuluyong Pilipino nga amo nagatuga sang gera sibil subong sa Pilipinas.

Indi bukas ang linya sang komunikasyon, baliskad sa ginahambal sang Malakanyang. Bisan nagapabilin nga bilog pa ang negotiating panel sang NDF kag 24-oras nga bukas ang mga upisina sini, wala ini sang ginabaton nga ano man nga tawag ukon abiso halin sa mga tiglawas sang GRP. Bisan ang ginapabugal sining "final peace agreement" wala pa namon nakita.

Wala interes si Macapagal-Arroyo nga maghambalanay nahanugod sa pangpulitika nga resolusyon sang armadong banggianay. Ang interes lang sang US, ni Macapagal-Arroyo kag sang iya nga militaristang rehimen amo ang hambalanon sang pagsurender sang rebolusyonaryong kahublagan.

Wala ginahandum sang pumuluyong Pilipino ang pagsurender sang armas kag malinong nga pagbaton sang wala-tuo nga tampa sa bagi-ing ang katumbas sang malawigan kag matarung nga kalinong.

Paagi sa Bagong Hukbong Bayan, ang pumuluyong Pilipino, labina ang kadam-an nga mangunguma sa kubay sang Pulang hangaway, nag-armas agud agumon ang hustisya halin sa pagpamigos kag pagpanghimulos: sa kawawad-on sang duta kag pyudal nga pagpamigos kag pagpang-ulipon, sa paghari sang mga dumuluong sa ekonomiya kag pulitika, sa korapsyon sa gubyerno kag pagpang-abuso militar.

Ang pagbiya sang armas katumbas man sang pagtulon sa tunok nga nga pila ka henerasyon na nga nagadulot sang pilas sa banwa nga ginapigos kag ginahimuslan.

Indi pwede isurender sang pumuluyong Pilipino ang ila mga armas bangud ang katumbas sini amo ang pagsurender sa mga kadalag-an nga naagum sa armadong paghimakas - tunay nga reporma sa duta, mga programa sa literasiya, ikaayong lawas, pagbuligay kag paghiliusa - mga kadalag-an nga adlaw-adlaw gusto gub-on sang gubyerno ni Macapagal-Arroyo.

Sa bahin sang mga ginapigos, ang rebolusyonaryo nga armadong paghimakas nagatukod sang bag-ong sistema, bag-ong orden, bag-ong kabuhi nga puno sang paglaum para sa pumuluyo. Sa bahin sang mga manugpigos kag manughimulos, ini "makaguluba nga terorismo".

Samtang indi matabu ang negosasyon pangkalinungan bangud wala man interes diri ang rehimeng Macapagal-Arroyo, kag ang palaabuton sini amo ang labi pa nga pagsingki sang gera sibil sa Pilipinas, ginhangkat namon ang Malakanyang kag AFP nga magsunod sa tanan nga pagsulundan sang Geneva Conventions kag International Humanitarian Law kag indi paghalitan ang mga sibilyan. Sa subong, tuman ka brutal ang all-out war sang AFP kag PNP. Ginatarget kag ginahalitan sini, indi ang BHB, kundi ang mga kabuhi kag pagkabutang sang mga mangunguma nga ginaakusahan nila nga nagasuporta sa BHB.

Ginahangkat man namon ang Malakanyang kag AFP nga sakdagon ang Comprehensive Agreement on Respect for Human Rights and International Humanitarian Law (CAHRIHL) kag tukuron ang Joint Monitoring Committee (JMC) nga katupong sang mga tiglawas sang NDF kag iban pa nga third-party organizations. Sa tigaylo nga magwarak-warak sa midya ang upisyales sang militar bangud kuno sa pagpang-abuso sang BHB (nga kinaandan naman mga wala basehan nga mga sugilanon-militar gid lang), ang mga demanda sang pagpang-abuso ukon paglapas sa tawhanon nga kinamatarung pormal nga maipresentar sa JMC kag ang mga may sala pwede pasabton. Pareho sang ginhambal sang NDF, ginatib-ong sini ang CAHRIHL kag nakahanda ini nga sabton ang mga napamatud-an nga paglapas diri sang mga rebolusyonaryong pwersa.

Responsibilidad sang Malakanyang kag AFP, sa isa ka bahin, kag sang PKP, BHB kag NDF sa pihak nga bahin nga himuon ang armadong banggianay sa paagi nga sibilisado kag may pagtahud sa mga pagsulundan kag nagatib-ong sa kaayuhan kag interes sang pumuluyo nga Pilipino.

Ang dalayon nga pagbalibad sang Malakanyang kag AFP nga kilalanon ang CAHRIHL kag magpasulod sa JMC amo pagtalikod kag pagbalibad nga atubangon ang mga responsibilidad sini.###

Back to top