"Oplan Tumba" -- isa naman ka bungang-isip sang mga opereytor sang saywar sang papet nga rehimeng Macapagal-Arroyo

Gregorio "Ka Roger" Rosal
Spokesperson
Communist Party of the Philippines
Nobyembre 12, 2002

Ang nagasalimuang nga gubyernong papet ni Macapagal-Arroyo kag mga utok-utok sang saywar sang terorista kag mersenaryong AFP kag PNP wala nagakaubusan sang ila mga pantastiko nga binutig kag paglubid sang balas para lang sa binuang kag desperado nilang katuyuan nga samaran kag ipinta sang tuman kalain ang CPP-NPA-NDFP kag pahugon ang pumuluyo.

May ara subong nga ginapaggua ang magkabarkada nga Angelo Reyes, Roilo Golez kag Gen. Hermogenes Ebdane nga tuman kahaba nga listahan sang mga tawo nga palatyon kuno sang NPA. Nagapanguna kuno sa listahan nga ini ang mag-asawang Gloria Macapagal kag Mike Arroyo kag masunod ang pila pa ka mga kilalang pulitiko, upisyales sang gubyerno, lakip ang mga myembro sang kabinete, pila ka senador kag kongresista.

Nagapaisog-isog sa partikular ang tagdumala sa saywar sang Malakanyang -- si Rigoberto Tiglao -- nga gusto man papatihon ang mga amo sini kag iya kaugalingon nga tuman ka epektibo ang wala pulos nga pagpanamad kag gimmick niya. Ginlubid kag ginapalapnag niya ang istorya nga palatyon man siya sang mga daan niyang kaupdanan nga gintrayduran niya. Mangin ang kaupdanan namon nga maga-aplay sang amnesty pagapatyon man kuno sang NPA.

Ang mga likidasyon nga ini pagpatuman kuno sang isa ka gindihon kag ginahingadlan nila nga "Operation Tumba".

Pulos binutig ang tanan nga ini. Gusto lang nila pagguaon nga ang mga NPA nagapatay lang nga nagapatay agud hatagan-rason ang ginaduso nila kag sang US nga kabigon nga terorista ang Partido kag NPA.

Kon matuod gid man nga terorista ang NPA kunta ginatipon na sini ang mga pangunahon nga makawat sa gubyerno, butangan sang isa ka toneladang pulbura kag sang segundo lang panas na sa kalibutan ang mga kawatan nga ini. Siguro madamo ang magasaulog ilabi na ang mga nagapamangkot sa rebolusyonaryong hublag ngaa ginapabayaan pa nga magkabuhi ang subong nga klase sang tawo sa gubyerno.

Ugaling indi ini pwede himuon sang Partido, BHB kag NDFP. Kontra ini sa mga prinsipyo, mga layi kag mga pagsulundan nga ginasunod sang rebolusyonaryong kahublagan.

Bisan pa armadong paghimakas ang pangunahon nga porma sang pagpakig-away nga ginalunsar sang rebolusyonaryong kahublagan, ang pagapukanon amo ang pangpulitika kag pang-ekonomya nga pagginahum sang nagaharing sahi kag indi ang ila pisikal nga lawas. Maluwas ini sa pila nga may ara nga mabug-at nga utang nga dugo sa rebolusyonaryong kahublagan kag pumuluyo -- kag ginakinahanglan nga pabayaron pagkatapos ang isa ka maid-id, patas kag matarung nga proseso sang pagbista sang hukmanan sang banwa.

Sa kabilugan, kinahanglan dulaon lamang ang kundisyon para sa padayon nga epektibong makapangibabaw kag makapanghimulos ang mga nagaharing sahi sa pumuluyo. Samtang, bisan nakapangibabaw pa ang reaksyunaryo nga pagginahum pangpulitika kag pang-estado sang mga nagaharing sahi, aktibo nga magadepensa kag magalunsar sang rebolusyonaryong kontra-atake ang rebolusyonaryong kahublagan batuk sa kontra-rebolusyonaryong atake.###