SoNA NI GMA SA KASTILYO NGA BALAS NAKAANGKLA

Cesar Renerio
Spokesperson
NDF-North Central Mindanao
Hulyo 27, 2004

Ang SoNA ni Macapagal-Arroyo Macapagal-Arroyo taphaw ug salingkapaw. Ang mga unod niini kinutlo lang sa iyang programang KALAHI nga sukwahi sa iyang gipatuo dili gyud makamugna og dugang bag-ong mga trabaho kay gidesinyo kini isip usa ka elektoral nga makinarya sa 2002 pa aron makapabilin siya sa gahum lapas sa 2004. Tipong dole-out ang dagway niini sa matag lugar nga iyang giadtoan diha sa pagpanghatag niya og tagsa ka kilong bugas, sardinas, noodles, mga daang biste ug mga inodoro, ngadto sa gipatambong nga mga masa ug mga opisyales sa baryo, samtang sa kalsada, may mga truck nga may kargang paninda nga may karatulang "Tindahan ni Gloria."

Ang pundong kuwarta usab alang sa LGU nga maoy mopatuman niini gikaltasan na hinuon pabor sa AFP-PNP ug mga para-militar sama sa CAFGU busa bugnaw ang tinagdan sa katawhan niini. Kun ipatuman gyud, seguradong ang pundo nga gigahin alang niini lamyon lang sa pangurakot sa mga opisyales sa lokal nga gobyerno ug lokal nga ahensya ug dili masustine ang implementasyon kay sa pagkakaron nagbaguod na ang rehimeng Arroyo sa dakong utang ug wala nay dugang pundo pa nga ikagahin.

Mapasigarbuhon kaayo si Macapagal-Arroyo sa pagkaluwas niya sa kinabuhi ni Angelo dela Cruz. Apan baya kun atong aninawon siya ang hinungdan nganong nahiadto si Angelo dela Cruz ug uban pang mga OFWs sa Iraq ug ang iya ra usab nga pagka-itoy sa imperyalismong US ang hinungdan nganong gibihag si dela Cruz sa mga rebolusyonaryong Iraqi. Susama siya sa nagtukmod og tawo taliwala sa lawod gikan sa barko ug sa dihang kalumsunon na iya dayon kining luwason ug dako ang pasalamat niini kaniya.

Ang panghambog usab niya nga momugna og unom ka milyong mga trabaho sa katinuoray mao ang hingpit nga pagbaligya sa atong soberanya ug kusog-pamuo sa mga OFWs. Ang pag-eksport og kusog-pamuo mao ang iyang dakong gilauman sa unom-ka-milyong esenaryo sa trabaho nga iyang gipanghambog panahon sa iyang inawgurasyon. Apan nahugno kining mao niyang damgong pagpabaha og mga OFWs sa Iraq tungod sa nagpadayong gubat didto. Ang tinuig nga remittances sa mga OFWs nga mokabat sa $8 bilyones napahakan og dako gumikan sa pagsukol sa mga rebolusyonaryong Iraqi ilalom sa halapad nga nagkahiusang prente batok sa pagpanakop sa US. Samot nga nagtakiang ang iyang administrasyon nga hagbay rang naughan tungod sa nagkadakong langyaw ug domestikong utang ug sa dakong gasto sa milabayng reaksyonaryong eleksyon.

Ang pagpasulod usab og mga langyawng tigpamuhonan aron kuno makamugna og bag-ong mga trabaho sa katinuoray mao hinuon ang mopasamot pagtidlom sa ekonomiya ngadto sa dugang pang giladmon nga wala pa sukad-masukad matupngi. Nagtugot kini sa mga imperyalista sa pagpabaha sa ilang naghinobrang mga produkto sa atong nasud nga maoy hinungdan nga maguba usab ang mga produktibong pwersa sa agrikultura ug lokal nga industriya. Busa imbes momugna kini og pangimpleyo, sa hamubong pagtan-aw, sa lahutay mopadaghan hinuon sa mga walay trabaho sa nasud. Ang giingon sa gobyerno nga duha ka milyong nadugang sa pito ka milyong walay trabaho gamay ug konserbatibo nga pagbanabana. Ang tinuod mao nga halos katunga sa atong pwersa sa pamuo (labor force) ang walay trabaho.

Ang social justice nga iyang giingon sa dagway sa reporma sa yuta, repormang agraryo, urban land reform ug ancestral land domain sa mga lumad walay lain kun dili ang pagpahibalik sa mga yutang naapod-apod na sa mini nga CARP ngadto sa kamot sa agalong yutaan, ngadto sa mga kapitalista ug sa mga real estate developers ug ang paghungit sa yutang ansestral sa mga lumad ngadto sa mga multinasyonal alang sa eksplorasyon sa mina ug plantasyon sa Oil Palm. Sa milabayng Mayo, 2004 gibutyag mismo sa Management Information System sa DAR nga 380,000 ka mga CLTs ang gikansela diin ang dakong bahin niini sa Southern Tagalog ug gisundan sa CARAGA region.

Ang damgo usab niya nga mahimong "energy independent" ang nasud mas labaw pa hinuong mohatod sa nasud ngadto sa pagtikluhod aron magpakiluoy sa mga multinasyonal nga mga korporasyon sa lana kinsa maoy nananag-iya sa mga dagkong oil concessions sa kalibutan. Dili mahulagway kining iyang energy independent nga plano samtang wala ganiy siyay bisan gamay na lang nga kaamguhang angay untang inasyonalisa ang mga kompaniya sa gasolina sa nasud sama sa Petron, Shell ug Caltex. Ang hingpit nga pribatisasyon sa NAPOCOR mao usab unya ang pinal nga paghungit niini ngadto sa mga kamot sa dagkong burgesya komprador nga mga kakunsabo sa langyawng imperyalista ug gani anaa na may nangataktak nga mga empleyado.

Ang korapsyon dili gyud niya kini masumpo tungod kay natural nga sangkap na kini sa usa ka semikolonyal ug semipyudal nga estadong nagsubay sa orbit sa kapitalismo. Mismong ang pamilyang Arroyo mao ang pinakataas nga ulo sa korapsyon diha sa nabaniog nga Jose Pidal account. Ang Pilipinas wala pa gihapon maibot sa ranggo niining ika-10 sa pinakakurakot sa 202 ka mga nasud nga gikuhaan og pagtuon sa Transparency International. Busa kining pagtukod niya og independent commission batok sa korapsyon walay lain kun dili ang pagsentralisa sa korapsyon ngadto sa usa lang ka gamayng grupo aron dili na kini mabutyag ug mahimong sumsoman sa katawhan.

Ang programa niya sa edukasyon wala gyud manukad sa obhetibong realidad. Sa reenacted national budget sa 2004 ang DepEd gigahinan lang og P106 bilyones kulang og P4 bilyones sa giduso sa DepEd. Mas dako pa kaayo ang badyet nga gigahin niya alang sa APF-PNP. Ang gikaltas igo na unta nga makahimo og 2,500 ka mga classrooms, makaempleyo og 10,000 ka mga magtutudlo og 1,666 ka mga bag-ong prinsipal. Ang iyang Daycare nga programa sa KALAHI samot nga makapabaguod sa mga ginikanan sa pagpaeskwela sa ilang mga anak kay halos mas dako pa ang galastuhan niini kay sa elementary proper. Nagtaas usab og 10.67% ang balayranan sa mga pribadong kolehiyo sa Amihanang Mindanao..

Ug aron kuno mapapas ang dakong depisit sa badyet gikinahanglan ang pagpahugot sa pagkolekta sa buhis. Apan ang gihigpitan lang mao ang ordinaryong katawhang mga kabus sa dakbayan, mga mag-uuma ug mga mamumuo, samtang luag ang pagtratar niini sa binilyong balayranang buhis sa mga Cojuangco ug Tan.

Nagkagrabe ang sosyo-ekonomiko ug politikanhong krisis sa nagharing sistema adlaw-adlaw. Inutil ang rehimeng Arroyo pagsulbad sa ekonomikanhong problema ug pakyas sa paghatag sa katawhan og bisan unsa ma'ng kahilwasan. Ang iyang gipagarbo nga pagtubo sa ekonomiya ilabina ang ekspansyon sa serbisyo sa telekomunikasyon nga resulta sa dugang nagagamit og cell phones, sa nipis nga usbaw sa produksyon sa mga electronic parts, sa temporaryong pagsaka sa produksyong agrikultural tungod sa maayong panahon, kining tanan dili lahutay ug lumalabay lang. Sa lalom nga pagtuki sa datos nga gipagawas sa gobyerno nga naghulagway sa 6.4% nga pagtubo sa ekonomiya sa unang tulo ka bulan sa 2004, nagpakita nga ang maong pagtubo dili-produktibo, lumalabay ug damgo lang.

Ug karon nanawagan siya sa katawhan sa paghupot sa dugang pang pasyensya ug "pagpahugot sa ilang bakos" bisan kun hagbay rang naghugot-bakos ang katawhan resulta sa nagkataas sa presyo sa mga palalitong epekto sa sunodsunod nga pagsaka sa presyo sa gasolina. Apan samtang ang katawhan ilang pahugton sa ilang mga bakos ang mga tag-as nga opisyal sa gobyerno ug militar padayong nagtagamtam og dakong sweldo ug allowances ilabina na niining Priority Development Assistance Fund ug Intelligence budget sa AFP.

Makiusa ka bahing kalinaw usab ang gustong imudmod sa nagharing rehimen ngadto sa simod sa katawhan--- ang kalinaw lang nga maoy gusto sa mga nagharing hut-ong ug sa iyang langyawng imperyalistang amo. Busa alayon niini, todo-todong operasyong militar ug saykolohikal batok sa katawhan ug mga rebolusyonaryong pwersa sa kasyudaran ug kabukiran. Sa kasyudaran ang mga rali ug demostrasyon nga legal nga pagpasibaw sa gawasnong opinyon sa katawhan hugot nga gisumpo pinaagi sa pagbungkag ginamit ang tear gas ug pagpatay sa mga lider sa mga progresibong organisasyon ug partylists. Sa kabukiran walay kutat ang pagbaha sa mga tropa sa AFP aron sumpuon ug dugmukon ang mga rebolusyonaryong pwersa ug katawhang mag-uuma nga nangayo lang sa tinuod nga reporma sa yuta.

Niini dako ang posibilidad nga si Gloria Macapagal-Arroyo dili makatapos sa iyang termino. Posible siya ang ikatulong presidente nga mapalagpot sa gahum kun mawad-an na siya og suporta sa militarya ug polis. ###

Reference:
Mark Reyes
Media Liaison Officer
NDF-NCM
Contact no.: 09264166821

E-mail Address: [email protected]