PAHALIPAYNG MENSAHE SA NDF-NCM NGADTO SA PARTIDO KOMUNISTA SA PILIPINAS-N0RTH CENTRAL MINDANAO

Cesar Renerio
Spokesperson
NDF-North Central Mindanao
Disyembre 26, 2004

Ang 15 ka mga membrong organisasyon ubos sa National Democratic Front sa Amihanang Sentral Mindanao, militanteng mipadangat sa ilang mga pahalipayng mensahe ngadto sa Partido Komunista sa Pilipinas (Marxismo-Leninismo-Maoismo) sa iyang ika-36 ka tuig nga anibersaryo sa pagkatukod-balik, diha sa iyang epektibong pagpangulo sa nataran sa armadong pakigbisog, nagkahiusang prente ug pagpabarog sa baseng masa sa rehiyon.

Sa armadong pakigbisog, pinaagi sa NPA, malampusong nakatigom kini sa tibuok tuig og 13 ka mga high-powered rifles ug pipila ka mga mugbong armas gikan sa ubay-ubayng mga batakang taktikal opensiba diin ang pinaka-masilakon mao ang ambus sa Manawang, Buenavista, Agusan del Norte kaniadtong Agosto 5 ug malampuson usab kining nakalunsad og mga punitibong aksyon batok sa mga kaaway sa hut-ong ug lunod-patayng kontrarebolusyonaryo ug ingon man batok ngadto sa mga tulisan, kriminal ug gumon nga durugista. Nakamugna usab og kabalaka sa han-ay sa kaaway ang operasyong pangisparo sa Front 4B ug nagmalampuson ang mga operasyong pagdis-arma sa Front 6 ug 88.

Ang tanang mga Natarang Gerilya matngong nagalunsad og rebolusyong agraryo aron mahatagan og kaayohan ang kaliboan ka mga pamilyang mag-uuma nga dugay nang nag-antos sa kaubos sa ilang suholan ug kaubos sa presyo sa ilang mga produkto. Pinaagi sa agraryong rebolusyon malampusong napatas-an ang ilang mga suholan ug napatas-an usab ang presyo sa ilang mga produkto.

Nagatabang usab ang Partido sa mga masa pinaagi sa hukbong absolutong gipangulohan niini, diha sa pagpalambo sa produksyon, pagpanambal ug literasiya. Daghan ang mga katawhan sa kabukiran ang nangalipay ilabina sa pagkawagtang sa mga anti-sosyal nga mga binuhatan ug kahilayan sa diha sa mga kabaryohan.

Malampuson usab nga napangulohan sa Partido ang halapad nga nagkahiusang prente sa han-ay sa mga mamumuo, mag-uuma, mga kabus sa dakbayan, mga propesyonal ug sa mga nahimatngong hatungang pwersa aron iprotesta ug tulisokon ang rehimeng US-Arroyo sa mga antikatawhang palisiya niini sa liberalisasyon, pribatisasyon ug deregulasyon. Mokabat na sa kapid-an ka libo ang baseng masa sa rebolusyon sa 5 ka mga natarang gerilya sa rehiyon. Nagkalapad ug nagkalalom kini bunga sa hustong pagpangulo sa Partido ug katukma sa mga palisiya niini lambigit sa nagbagang mga isyu sa katilingban ug sa nagkadunot nga kahimtang sa nagharing hut-ong.

Ang mga legal ug demokratikong pwersa sa kasyudaran aktibo usab nga mibutyag sa mga abuso militar sa kaaway nga tropa panahon sa ilang operasyon sa kabukiran diin kaylap ang pagpanglapas sa mga tropa sa 4ID sa tawhanong mga katungod sa katawhan sa kabukiran sama sa nahitabo didto sa Salaysayon, Nasipit, Agusan del Norte ug karong bag-o didto sa Balit, San Luis, Agusan del Sur. Aktibo usab kining nagprotesta ug nagmartsa aron kondenahon ug tulisokon ang kaitoy sa rehimeng US-Arroyo sa walay pugong nga pagsaka sa presyo sa lana diin ka-60 na ka beses kining misaka sukad mapasar ang balaod sa Oil Deregulation Law.

Malampuson usab nga gipakyas sa Partido pinaagi sa Nagkahiusang Prente ug New People�s Army ang mga dagkong pagpangatake sa kaaway partikular sa 4ID diha sa ilang mga dibisyon ug brigadang mga operasyon ilabina sa Front 88, Front 4A ug Front 89 pinaagi sa aktibong pagdepensa sa NPA sa paglunsad og taktikal nga mga opensiba ug sa politikanhong gimbuhaton sulod mismo sa ilang han-ay ug bunga usab sa nagkaawop nga kadasig sa ubos-og-ranggong mga opisyal ug mga ultimong sundalo bunga sa grabeng korapsyon sa ilang mga heneral.

Kining tanang mga kalampusan maoy bunga sa epektibong pagpangulo sa Partido Komunista sa Pilipinas sa rehiyon ngadto sa tanang mga rebolusyonaryong organisasyon ug pormasyon sa New People�s Army.

Mabuhi ang Partido Komunista sa Pilipinas!

Mabuhi ang Katawhang dinaugdaog ug linupigan!

Back to top