Dili National ID kundili usbaw sa sulohan ug kapanginabuhian ang pangayo sa katawhan
Cesar Renerio
Spokesperson
NDF-North Central Mindanao
Pebrero 23, 2005
Kanunay gyud nga layo kaayo sa ig-anan ang gidudhong solusyon ni Macapagal-Arroyo sa mga batakang problema sa katawhan.
Imbes ibasura ang Oil Deregulation Law nga dugang hinungdan sa pagsige og saka sa presyo sa lana ug sa mga batakang panginahanglanon ug serbisyo, ang ahensya sa gobyernong nag-atiman niini mao na hinuoy nahimong tigpamaba aron depensahan ang mga kompaniya sa lana.
Imbes nasyonalisasyon unta ang angayang himuon ngadto sa mga industriyang adunay mahukmanong papel sa matag adlaw nga aktibidades sa katawhan sa nasud, todo-todo hinuong gibuhian ang pagpribatisa sa mga korporasyong gipanag-iya ug gikontrola sa gobyernong nagahatag unta og mga batakang serbisyo sa katawhan.
Imbes sulbaron ang kaylap nga mga paglunop ug pagbaha nga nakamugna og dinagkong kalamidad sa nasud, giaprobahan hinuon ang Mining Act nga naghatag og katungod sa mga langyaw sa walay pugong-pugong nga pag-upaw sa atong kabukiran. Niini, dahumon nato ang mas daghan pang malaglagong pagbaha ug paghulaw samtang ang mga langyawng monopolyo ug ilang mga ahenteng dagkong komprador sa pagmina, logging ug modernong mga plantasyon motilok sa nahabiling kalasangan ug minerales sa Pilipinas.
Imbes molingkawas sa mapahimuslanon ug madaugdaugong palisiya sa liberalisasyon nga maoy hinungdang napilde sa kompetisyon ang atong mga linghod pang industriya wala hinuoy pugong-pugong nga gilamoy ang paon, taga ug hilo niining maoy gidiktar sa International Monetary Fund kun IMF nga wagtangon ang tanang restriksyon sa pag-angkat isip kabahin sa pait nga pildoras sa structural adjustment.
Imbes usbaw sa suholan ug maayong panginabuhian ang gipangayo sa katawhan, dugang hinuong buluhisan ang iyang gipapas-an sa nagbaguod na'ng katawhan ilabi na niining extended VAT nga sukwahi sa gipatuo ni Arroyo, ang mga ordinaryong konsumador lang gihapon ang malasdakan sa epekto niini.
Niini, tataw kaayo nga anti-katawhan ug pabor sa mga langyaw ang ekonomikanhon ug politikanhong palisiya nga gisubay sa rehimeng Arroyo. Busa misilaob ang kasuko sa katawhan nga hagbay rang nag-antos sa kawalay kapanarbahoan, kaylap nga kakabus ug sa nagkahigos nga katilingbanong mga serbisyo. Kaylap ang mga welga ug protesta sa tibuok nasud nga gisalmotan sa tanang patriyotikong pwersa ug sa mga progresibong sektor ug hut-ong sa katilingban.
Ug aron babagan ang nagakalapad nga nagkahiusang prente batok sa iyang rehimen ug aron terorisahon ang katawhan, gidasig ni Macapagal-Arroyo ang mga pagmasaker ug pagpamatay sa mga progresibong lider didto sa Mindoro, sa Bicol, sa Quezon, dinhi sa Mindanao, ug sa uban pang dapit, sa pagpamatay sa mga journalists ug sa uban pang mga personahe sa media. Ang pagmasaker sa mga nagwelgang mga mamumuo sa Hacienda Luisita maoy dugo sa mga kamot sa rehimeng Arroyo nga kanunayng magmulto kaniya hangtod mapalagpot siya ug/o bisan wala na siya sa gahum.
Gisugyot ni Arroyo ang national ID system bisan kun gibasura na kini sa reaksyonaryong Korte Suprema panahon pa sa rehimeng Ramos tungod kay nahisupak kini sa konstitusyon. Kahibudngan kaayo nga sa pagpanghingusog nga mapalusot ang anti-terrorism bill nagkahitabo dayon ang koordinado ug tibuok-nasud nga pagpamomba nga mikutlo og daghang mga kinabuhi ug nakaaangol sa mga gatusan pa. Dili layo ang posibilidad nga binuhatan ra kini sa estado aron mapalusot pagdali ang national ID system ug aron may katarungan nga samot pang manghilabot ang US sa pangsulod nga suliran sa Pilipinas sa ngalan sa gubat sa terorismo. Makahinumdom kita kang Michael Meiring, kadtong CIA operative nga nabuthan pag-unay sa iyang gihimong bomba didto sa usa ka hotel sa Davao niadtong 2002.
Ang CPP-NPA-NDF hagbay rang nagsugyot kang Macapagal-Arroyo ug bisan sa nangaging mga rehimen nga aron masulbad ang mga batakang suliran sa atong katilingban, diha sa hilabihang kapobrehon ug kawalay kapanarbahoan, kinahanglang putlon na niini ang hikot niya sa pagka-itoy sa mga langyawng imperyalista partikular sa US. Apan nagpakabuta-bungol si Macapagal-Arroyo niini. Hinunoa, pagpamitol ug pagpanumpo ang iyang gihimo pinaagi niining national ID system nga sama lang sa nagputol sa sanga samtang ang mga gamot anaa pa. Band-Aid lang kini nga gitaplak sa nagnga-ngang samad.
KATAWHAN MAGHIUSA! PALAGPUTON SA GAHUM ANG REHIMENG ARROYO!
MGA MAKINASUDNON UG ORDINARYONG SUNDALO SA AFP UG PULIS SA PNP! SALMOT UG DUYOG SA PAKIGBISOG SA KATAWHAN ALANG SA NASUDNONG KALINGKAWASAN UG DEMOKRASYA! MAGPAMEMBRO SA LT. CRISPIN TAGAMOLILA MOVEMENT!
Ka. Cesar Renerio
Spokesperson
NDF-North Central Mindanao
Back to top
| 