![]( https://philippinerevolution.nu/wp-content/uploads/2021/11/protest-icon-1024x745.png )
Dagiti protesta
Panagdar-ay ni Marcos iti ASEAN idiay Australia, namurumuran ti protesta. Nagsasaruno a protesta ti inrussuat dagiti migrante a Pilipino ken progresibo a grupo idiay Melbourne, Australia agsipud Marso 4 agingga Marso 6, kasilpo ti nairussuat nga ASEAN-Australia Special Summit ken panagdar-ay ditoy ni Ferdinand Marcos Jr. Iti panangidaulo ti Bagong Alyansang Makabayan (Bayan)-Australia, ginunggon dagiti protesta ti ASEAN Summit ken dagiti aktibidad ni Marcos.
Hustisya iti Bilar 5 ken dagiti biktima ti pasista nga AFP-PNP. Nagguummong ti agtutubo ken dagiti progresibo nga organisasyon ti Central Visayas idiay University of the Philippines (UP)-Cebu Ampitheater idi Marso 3 tapno ikkan saludo ken padayawan ti Bilar 5, ti lima a Nalabaga a mannakigubat a minasaker dagiti puersa ti estado idiay Bilar, Bohol. Kabayatan, nagirussuat met ti maysa a candle light protest dagiti agtutubo ti UP Cebu idi Pebrero 29.
Idi met Marso 5, nagprotesta dagiti grupo iti karbengan-tao idiay Camp Aguinaldo idiay Quezon City tapno kondenaren dagiti nagsasruno a kaso ti panagdukot, panagbombomba ken inggagara a pammapatay ti AFP-PNP kadagiti aktibista, progresibo ken rebolusyonaryo.
Philippine Mining Act, ibasura. Nagirussuat ti protesta ti Katribu, Kalikasan PNE ken dadduma pay a demokratiko a grupo iti sango ti Department of Environment and Natural Resources idi Marso 4 tapno kiddawen ti panangibasura iti Philippine Mining Act of 1995. Iti 29 tawen a panagsaknap ti linteg, nangitulod daytoy ti awan kabatog a dadael iti aglawlaw ken dagiti komunidad dagiti katutubo ken mannalon.