Iti uneg ti Freeport Area of Bataan, ti kaunaan nga export processing zone iti Pilipinas, natured a limmaban ti babbai a mangmangged iti FCF Manufacturing Corporation, maysa a kompanya nga eksklusibo nga agar-aramid kadagiti produkto para iti global brand a Coach ken Kate Spade.

Bimmotos da nga isayangkat ti welga kalpasan nga impatangken ti kompanya nga agingga ₱2 laeng ti ipaay na a nayon-sueldo itatta a tawen. Daytoy ket iti laksid ti pammutbuteng ti maneydsment nga iyakar ida ti trabaho, wenno saan ket direkta a masisante. Nasurok 1,000 ti immannamong nga isayangkat ti welga ken 100 ti saan nga immannamong iti pabrika nga adda 3,000 mangmangged (regular ken kontraktwal).

Makaaw-awat laeng ti ₱500 dagiti mangmangged ti FCF, a 44% iti ₱1,142 makabiag a sueldo idiay Central Luzon. Laksid ditoy, nasaknap met dagiti panaglabsing iti karbengan ti mangmangged kas iti forced leave, iligal a panagikkat, ken saan a makatao a kondisyon iti panggedan.

Ti panangisayangkat ti welga ket panangpaay iti agdadata a pammutbuteng ken pananglapped ti kompanya. Sakbay ti panagbobotos, limed a miniting ti maneydsment dagiti mangmangged ti FCF ken kabsat na a kompanya nga FPF idi Pebrero 26 tapno butbutngen ken ikampanya a saan a suportaan ti “strike vote.” Pinangtaan na nga iyakar dagiti mangmangged a makissayan ti benepisyo wenno masisante nga awan maawat a bayad iti serbisyo.

Ti FCF ket paset ti Fashion Focus Ltd, maysa a kompanya a naka-base idiay China. Dagiti naaramid a produkto ket mailaklako iti ₱2,000 agingga ₱20,000 tunggal maysa. Idi 2022, nakapastrek ti kompanya ti ₱2.8 bilyon isu nga imposible nga awan kabaelan daytoy a mangted ti ngato-sueldo, kuna dagiti mangmangged.

“Narurugit a lupot”

Ti industriya ti garments iti Pilipinas, nu sadino karaman ti FCF, ket paset ti bilyon dolyar a sangalubongan nga industriya a mangpapa-ubra ti 60-75 milyon a mangmangged. Dumandanon iti 3/4 kadagitoy ket babbai. Dakkel a paset ti panagmanupaktura na ket adda kadagiti atrasado a pagilian iti Asia. Iti tawen 2023, makalkalkular nga adda iti $1.74 trilyon ti pastrek na.

Iti maysa a sarbey ti grupo a Clean Clothes Campaign, 93% kadagiti global brand wenno dagiti marka nga am-ammo iti intero a lubong, ti saan nga agbaybayad ti makabiag a sueldo kadagiti mangmangged ti industriya. Segun iti panagsukisok ti Oxfam International, awan pay 1% iti presyo dagiti produkto dagiti global brand ti maikissay iti pastrek da nu ipatungpal dagitoy ti makabiag a sueldo.

Nayon iti panagkirmet ti nalabes la unay a panagpatrabaho (dumanon iti 16 oras kada aldaw, pito aldaw kada lawas); saan a natalged a kondisyon iti panagubra (nailet, awan bentilasyon, ken iti kaso ti Bangladesh, narurukop a pasdek); kinaranggas ken panagabuso; nasaknap a panaglabsing iti karbengan iti panagunyon ken pannakitinnawar; puersaran a panagpatrabaho; panagpatrabaho kadagiti ubbing ken diskriminasyon iti babbai.

Iti datos ti International Labor Organization, napeklan dagiti pagaramidan ti lupot iti kinaranggas ken pananglipit basar iti kasarian (gender-based violence and harassment wenno GBVH). Iti Asia, 22.8% dagiti babbai nga agub-ubra iti industriya ket nagreport a nakapadas ti minimum a maysa a tipo ti GBVH idi 2021.