Rumbeng a pagsungbaten ken pagbayaden dagiti kriminal iti gubat a pasista a gamat ti Armed Forces of the Philippines (AFP), paramilitar ken Philippine National Police (PNP), uray met ti hepe na a ni Ferdinand Marcos Jr, kadagiti agtutuon a kaso iti panaglabsing iti internasyunal a makatao a linteg ken dagiti pagannurotan iti sibilisado a pannakigubat kadagiti naglabas a lawas.

Hustisya iti Bilar 5. Inranta a minasaker, ken saan nga iti engkuentro a natay ti lima a Nalabaga a mannakigubat ken kadre ti Partido idiay Bilar, Bohol idi Pebrero 23. Natiliw a sibibiag da Domingo Compoc, Hannah Cesista, Parlito Historia, Marlon Omosura ken Alberto Sancho iti balay a nagtarusan da idiay Sityo Matin-ao 2, Barangay Campagao. Nakalak-am ti nakaro a tortyur ti lima sakbay ida a pinapatay. Naalaan ti ladawan ni Compoc a tengngel ti maysa a soldado, pammaneknek nga isuna ket sibibiag idi natiliw. Kuna dagiti nakaimatang, tinagbat iti tengnged ken tyan ni Compoc. Ni Compoc ket nasuroken 60 ti edad ken mangrikrikna ti sakit a rayuma.

Ni Cesista ken ti tallo pay ket pinagkaradap iti pitak sakbay a pinalto-paltugan. Ni Cesista ket maysa nga abogada a pinili nga agserbi iti dasig a maidaddadanes. Iti laksid ti ebidensya ken testimonya dagiti nakaimatang, ipappapilit ti AFP ken PNP a “limmaban” ti lima bayat nga “idasdasaran” ti mandamyento de aresto.

Sakbay na, dinukot ti militar ti maysa a residente iti lugar a ni “Berting” ken dua a menor-de-edad nga annak na, karaman ti maysa a 4-anyos iti pareho a barangay. Tinungpa-tungpa isuna tapno ibutaktak ti ayan ti Bilar 5. Ingkapilitan ida nga inlugan iti puraw a van. Pinaawid ida kalpasan ti maysa aldaw.

Idiay Negros Occidental, pinapatay ti 79th IB idi Pebrero 21 ti mannalon a ni Jose Caramihan nga idi ket adda iti talon na idiay Sityo Mansulao, Barangay Pinapugasan, Escalante City. Pinaruar ti militar a napapatay isuna iti maysa nga “engkuentro.”

Idiay Misamis Oriental, natiliw, tinortyur ken pinapatay ti 58th IB ti Nalabaga a mannakigubat ti NPA-North Central Mindanao Region (NCMR) a ni Miguel Serino (Ka Bokir) idi Pebrero 10 iti nagbeddengan ti Barangay Calawag ken Quezon idiay Balingasag. Naimarka iti bangkay na ti linak-am a nakaro a tortyur.

Panagdukot. Pinaruar ti pulis ken militar a ” simmurender ” idi Pebrero 23 ti dinukot a kabsat ti lider-mannalon idiay Sorsogon a ni Jose Marie Estiller. Dinukot isuna ti militar idi Pebrero 20 idiay Sto.Tomas, Batangas. Pabpabasulen isuna a “2nd Most Wanted” idiay Bicol ken sinampaan kadagiti agtutuon a kaso a kriminal.

Kabayatan, inreport ti Anakbayan-Southern Mindanao iti maysa a pahayag idi Pebrero 27 ti panagdukot ken panangdesaparesido ti militar ken pulis kenni Nelson Bautista Jr, aktibista a mannurat nga adda atiddog a rekord ti panagserbi kadagiti komunidad ti Davao, ken panagaresto iti kadua na idi a ni Ademar Anciero Etol idi Enero 25 iti pagdagdagusan da a balay idiay Barangay Balingasan, Siay, Zamboanga Sibugay. Ni Etol ket sinampaan kadagiti kaso a kriminal ken agdama a nakadetine idiay Siay Municipal Police Station. Kabayatan na, saan nga ak-aklunen ti pulis wenno militar a tengngel na ni Bautista. Agtaltalinaed isuna a mapukpukaw agingga iti agdama.

Panagbombomba. Nagsasaruno ti kaso dagiti aerial bombing ken panagkanyon ti AFP idiay Quezon, Negros Occidental, Iloilo ken Bukidnon kadagiti naglabas a lawas. Nalabes a buteng ken troma ti impagteng dagitoy kadagiti sibilyan a komunidad. Nakaro nga apektado na met ti kabiagan dagiti residente. Labsing met iti prinsipyo iti “proportionality” ti panagaramat ti AFP iti nagpipigsa a bomba laban kadagiti gerilya a kampo ti hukbo ti umili.

Idiay Negros Occidental, nagsasaruno ti awan aniaman a panagpalto-paltog, panagistraping ken panagbombomba nga inwayat ti militar iti nagbeddengan ti Escalante City ken Toboso idi Pebrero 21-22. Napuersa a nagbakwit ti 1,000 residente gapu iti daytoy. Sinuspindir dagiti klase iti siyam a barangay idiay Toboso ken Escalante City.

Idiay Iloilo, nagitinnag ti 500-libra a bomba manipud tangatang ti AFP kadagiti barangay ti Torocadan, Dongoc ken Langca iti ili ti San Joaquin idi Pebrero 28. Sinaruno daytoy ti istraping ken panagkanyon. Nagmartir iti makuna a panagbombomba ti tallo a Nalabaga a mannakigubat.

Idiay Bukidnon, 13 daras a kinanyon ti AFP nga awan nalawag a direksyon ti kabambantayan a lugar iti nagbebeddengan dagiti ili ti San Fernando, Quezon ken Valencia City idi Pebrero 23. Sakbay na, 13 daras met a kinanyon ti AFP ti pada a lugar idi Pebrero 21. Kasilpo ti panagkanyon iti operasyon kombat nga adda kagiddan a panagbombomba agsipud pay Disyembre 2023.

Kabayatan na, binomba ken kinanyon met ti 81st IB dagiti barangay iti nagbeddengan ti Tagkawayan, Quezon ken Del Gallego, Camarines Sur idi parbangon ti Marso 4. Naipunta asideg kadagiti komunidad dagiti bomba ken dandani pay mapuntaan ti tallo nga agkokopra.