Linagip iti naduma-duma a suli ti pagilian ken iti ballasiw-taaw ti maika-38 anibersaryo ti Panagrukkuas EDSA babaen kadagiti protesta kontra iti charter change wenno chacha ti rehimen Marcos idi Pebrero 25.

Adda iti 5,000 katao ti nagguummong iti sango ti EDSA Shrine idiay Metro Manila iti uneg ti No to Chacha Network. Kuna dagiti grupo, maysa kadagiti balligi ti Panagrukkuas EDSA ti Konstitusyon 1987, a nangipawil kadagiti dinastiya a politikal, nangikeddeng kadagiti limitasyon iti termino dagiti opisyal ken dadduma pay a panangisigurado nga addaan “check and balance” iti estado. Daytoy kano ti kayat a baliwan ti rehimen Marcos, kagiddan ti panangipalubos iti 100% panagtagikua ti ganggannaet iti daga, dagiti tulbek nga imprastruktura ken pasilidad iti Pilipinas.

Mamati met ti alyansa a rumbeng nga asikasuen pay ti Senado ken Kongreso dagiti arungaing ti umili iti nayon-sueldo, panangipababa kadagiti presyo, naur-urnos a serbisyo pangkagimongan ken adu pay, ngem ti pagkumikuman ti chacha. Iti pinagmaymaysa a pahayag ti alyansa, inawagan na a “saan a kasapulan, mapanggudua, nagastar ken nakatutok kangrunaan iti panagtalinaed iti puesto dagiti adda iti poder.”

Kadaydiay nga aldaw, nagirussuat met ti protesta dagiti alyansa a kontra chacha kadagiti syudad ti Naga, Legazpi, Cebu, Bacolod, Iloilo, ken Davao. Kabayatan, adda met ti sangsangkamaysa a panagtignay ken panagadal idiay Isabela, La Union, ken Sorsogon. Iti ballasiw-taaw, nangiwayat ti aktibidad dagiti Pilipino idiay Los Angeles, New York, ken Boston idiay US; idiay Melbourne, Sydney, Perth, ken Canberra idiay Australia; idiay Hongkong; ken idiay Canada.

Sakbay ken kalpasan ti panaglagip, agsusumbangir dagiti protesta, panagguummong ken panagadal ti inrussuat dagiti grupo a nakapauneg iti alyansa.

Laksid iti No to Chacha Network, nabukel met ti nalalawa nga alyansa kontra chacha iti intar ti agtutubo ken babbai, kasta met dagiti alyansa a tukad syudad ken probinsya.

Iti laksid ti nasaknap a panagsuppiat, naglaylayon ti panagmaniobra dagiti tao-an ti rehimen Marcos tapno iduron ti chacha. Nagsasaruno ti panagdengngeg iti House of Representatives idi Pebrero 27 iti Resolution of Both Houses 7 (RBH7), ti kabatog a singasing iti indatag iti Senado nga RBH6.

Segun iti agkarapin a resolusyon, tallo a probisyon laeng kano ti mabaliwan apaman a mabukel iti Kongreso ken Senado agturong iti maysa a constituent assembly nga adda agsina a panagbotos. Dagiti panangbaliw ket tapno ikkan ti karbengan dagiti ganggannaet a sibubukel nga agtagikua kadagiti pampubliko a utilidad (Artikulo XII, Seksyon 11); sektor ti edukasyon (Artikulo IX, Seksyon 4); ken iti advertising wenno panagpatalastas (Artikulo XVI, Seksyon 11).