Umap-apoy ti rikna ti umili a Pilipino maibusor iti rehimen nga US-Marcos gapo iti panagraraira ti pasismo iti intero a pagilian, nangruna iti away. Napno ti pungtot ti masa a mannalon a iti tengnga ti pannakadurmen da ken panagbisin, pasismo ken panangagum ti daga ti sungbat ti reaksyonaryo a rehimen kadagiti kiddaw da.

Iti desperado a panangpadas na a “lippasen” ti rebolusyonaryo nga armado a panangsaranget ti umili a Pilipino, awan-ressat itatta ti terorista ken pasista a panangraut ti rehimen nga US-Marcos ken dagiti armado a bunggoy na iti intero a pagilian. Manamnama ti agsasaruno a palso a deklarasyon ni Marcos ken ti AFP nga “insurgency-free” dagiti nadumaduma a probinsya, nangruna dagiti probinsya a pagpeggadan ti iraraut ken panangsakop dagiti ganggannaet a kumpanya ti panagminas, plantasyon ken enerhiya. Gapo iti mandar ti imperyalismo nga US, madagdagus met nga ikagkagumaan ti AFP a “lippasen” ti armado a pannakidangadang ti umili a PIlipino tapno naan-anay a mausar ti militar ti US ti AFP iti patpatauden na a gerra iti China a mabalin a dumakkel iti sumuno a tawen.

Nabiit pay a nangimandar ni Marcos ken ti liderato ti Armed Forces of the Philipines (AFP) iti gubat. Panggep daytoy a todo-gerra a dadaelen ti amin a gerilya a kampo ti NPA iti ngudo ti Marso, dadaelen ti amin a puersa a pangsarang ti NPA iti ngudo ti Hunyo, ken ibusen ti amin a rehiyonal a komite ti Partido sakbay ti ngudo ti tawen. Rinibo a soldado, agraman dagiti tropa ti pulis ken mano pulo a ribo a paramilitar a naarmasan ti AFP, ti naibaon a mangraut kadagiti away.

Ginasot a barangay ti sinamsam dagiti pasista a bunggoy ni Marcos. Dagiti agintuturay a soldado ti mangkonkontrol iti biag ken sanikua dagiti tattao, mangpasardeng iti panagsao da, ken mangdadael kadagiti kalintegan ken wayawaya da. Dagiti tsekpoynt ken food blockade, pannakaiparit nga agtalon wenno mapan kadagiti uma, dagiti armado a soldado nga agbaraks kadagiti barangay, mangbalay-balay a mangpilit a “sumuko”, mangbastos kadagiti babbalasang wenno uray dagiti naasawaan, aggi-inum, mangbugbog ken agbibinnugbog, agpaputok ti paltog iti sadinoman—sumagmamano laeng kadagiti kinadakes nga aramid a naimaldit iti panunot dagiti umili. Iti baet ti tikag ken didigra, dagiti pasista a soldado ket kasla peste nga awan sabali nga iyeg no di mangdadael kadagiti komunidad da.

Babaen kadagiti napipigsa nga igam, dagiti drone ken jetfighter, dagiti helikopter ken howitzer, awan pilpilien iti rabii wenno aldaw ti panagbomba dagiti terorista a soldado ni Marcos kadagiti kabambantayan ken taltalon a mangdaddadael iti kinabaknang ti kabakiran ken mangsabidong iti kadanuman, mangbuong iti kinaulimek ken mangpataod iti nakaro a riribok kadagiti umili, nangruna kadagiti ubbing, masikog ken nataengan. Nakaad-ado a panangpukaw iti biag ti resulta daytoy, maibusor iti amin a prinsipyo ken linteg iti sibilisado a pannakigubat.

Kangrunaan a panggep ni Marcos ti mangikabil iti buteng iti barukong dagiti umili ken mamagtalna kadakuada bayat nga ag-agawan ida ti daga dagiti dadakkel a kapitalista a ganggannaet ken dagiti kakumplot a burgesya kumprador ken dadakkel nga apo’t daga. Ngem imbes a paikulbo iti daga, ad-adda a mariing da a tumakder ken makidangadang, ken mangdaliasat ti dana ti armado a rebolusyon.

Kadagiti larangan a gerilya iti intero a pagilian, agtultuloy a tagtagiragsaken dagiti yunit ti New People’s Army (NPA) ti nauneg ken nasaknap a suporta ti masa a mannalon. Nakaro ti pungtot dagiti opisyal militar ti AFP ken ti reaksyonaryo nga estado ta iti laksid ti pinairteng da a todo-gerra a bimmayagen iti agarop pito a tawen, agtultuloy a mangmangted ti pampulitika ken materyal a suporta kadagiti Nalabaga a mannakigubat ti masa a mannalon. Dagiti agtutubo a mannalon, uray dagiti agtutubo nga estudyante, mangmangged ken dagiti propesyunal ket agtultuloy a tumiptipon iti hukbo ti umili.

Agtultuloy nga umap-apoy ti tarigagay ti umili a mangitandudo iti armado a pannakidangadang. Iti baet ti pasista a panangidadanes dagiti armado a gamat ti rehimen nga US-Marcos, ken dagiti padagsen a patakaran a mangparparigat kadakuada, lalo a maimaldit iti panunot ken pannakaawat ti masa a mannalon nga awan ti magunggona da no awan ti New People’s Army a kadua da a mangsalaknib iti biag ken kalintegan da, ken kakuyog da iti pannakidangadang para iti daga ken pagbiagan da.

Kadagiti kallabes a tawen, ti NPA ket nagsagrap ti pannakadadael ken panagsanud iti nadumaduma a paset ti pagilian gapo kadagiti biddut ken kakapuyan ti konserbatismo ken panagpannakkel iti sigud a balligi. Imbes a situtured a suroten da ti dana ti agtultuloy a panagpalawa ken panangparegta ti armado a pannakidangadang, immilet ti saklaw ken base a masa dagiti yunit gerilya, nagbalin a pasibo ken bulnerable iti pananglakub ti kabusor. Babaen ti panangiwanwan ken pammaregta ti Partido, determinado ti NPA a mangilinteg kadagiti biddut ken rumang-ay iti dana ti panagpapigsa manen ken panangparubrob iti apoy ti gubat ti umili.

Iti espirito ti tignayan a panagilinteg, rumbeng a paregtaen ti NPA iti armado a pannakidangadang iti amin a paset ti pagilian. Kakuyog ti nalawa a tignayan ti masa iti gerilya a pannakidangadang, usaren amin nga igam, paltog ken bato, pika ken gayang, desabog ken bomba—ken agirussuat kadagiti dadakkel wenno babassit a taktikal nga opensiba a kabaelan nga iballigi a mangparmek iti nakapuy ken naisina a paset ti kabusor. Dusaen ti pasista a tropa ti kabusor ken amin a bunggoy na kas pamay-an dagiti umili a manggun-od iti hustisya ken mangted iti inspirasyon iti pannakilaban da. Babaen laeng ti nasaknap nga armado a panangsaranget a mapatibker, mapasubli ti pigsa ken rumang-ay ti NPA.

Manipod idi naipasdek, lima ket kagudua a dekada ti napalabasen, ti NPA ket nagserbi a pudno nga armada dagiti umili a nangitandudo iti rebolusyonaryo a tarigagay ti umili a Pilipino para iti nailian a demokrasya. Iti sumungad nga anibersaryo na iti Marso 29, rambakan tayo dagiti balligi a naaramidan iti napalabas a 55 a tawen, agpasindayag tayo kadagiti amin a martir ken bannuar, ken pabilgen tayo manen ti determinasyon nga idur-as ti naunday a gubat ti umili, aniaman a panagsakripisyo ken pannakapasakit a kasapulan, tapno magun-od ti balligi iti masangoanan.