![]( https://philippinerevolution.nu/wp-content/uploads/2024/03/blinken-not-welcome-war-criminal-1024x769.jpg )
Dagiti opisyal ti US, immado iti pagilian itatta a Marso
Giniddanan ti protesta ti iyu-umay ni Anthony Blinken, kalihim ti Department of State ti US, idiay Malacanang idi Marso 19. Dimteng iti pagilian ni Blinken tapno mitingen ni Ferdinand Marcos Jr ken ti AFP iti umadani a Balikatan wargames ken tapno iyumang manen ti Indo-Pacific Security Strategy, ti estratehiya ti US tapno pagtalinaeden ti hegemonya na iti Asia maibusor iti karibal na a China.
Sakbay ni Blinken, agarop naggiddan a dimteng iti pagilian itatta a Marso ti nangangato nga opisyal iti ekonomya ken militar ti US.
Indauloan ni Gina Raimondo, kalihim ti Department of Commerce ti US, ti delegasyon ti Presidential Trade and Investment Mission nga impatulod ti US tapno ilako ti Indo-Pacific Economic Framework, maysa a “tulbek” a paset ti Indo-Pacific Security Strategy. Kakuyog iti delegasyon ni Raimondo ti 22 a daulo ti dadakkel a kumpanya nga Amerikano, karaman ti dua a kumpanya iti konstruksyon (Bechtel, Black & Veatch) a tagapasdek kadagiti base a nabal ken pasilidad militar ti US iti nadumaduma a pagilian.
Dimteng met iti pagilian ni Adm.John C. Aquilino, kumander ti US Indo-Pacific Command, para kadagiti miting kakuyog da Marcos, kalihim ti depensa a ni Gilbert Teodoro ken hepe ti AFP a ni Gen.Romeo Brawner Jr, kadua ti sabali pay a nangangato nga opisyal ti AFP.
Nagsasaritaan da dagiti panagisagana para iti Balikatan 2024, nga ipampannakkel nga agbalin a “kadakkelan” iti pakasaritaan na. Mairussuat daytoy idiay Batanes ken Palawan manipod Abril 22 agingga Mayo 8. Maysa kadagiti “highlight” na ti “integrated air missile defense exercise”, wenno panangpatayab kadagiti misayl idiay direksyon ti China. Maitunos daytoy iti Strategic Defense Strategy ken papel ti Pilipinas kas palab-og iti depensa a first-island chain ti US.