Pannakaipasa ti RBH7 iti Kongreso, sinuppiat. Nagprotesta dagiti demokratiko nga organisasyon iti sangoanan ti Kongreso iti maysa a People’s Rally idi Marso 20 tapno suppiaten ti RBH7, ti gakat a mangiturong iti charter change (chacha). Kalpasan ti sumagmamano laeng nga oras iti dayta nga aldaw, pinasingkedan ti Kongreso ti singasing babaen ti 288 a botos a pabor, walo ti simmuppiat ken dua ti nag-abstain. Karaman kadagiti walo a nangsuppiat dagiti kongresista ti Makabayan bloc. Kagiddan ti protesta idiay Kongreso, nagprotesta met dagiti estudyante idiay Katipunan Avenue, iti sango ti Ateneo de Manila University.

Epekto ti El Niño, pagsasaritaan. Ti Amihan, nailian a pederasyon dagiti babbai a mannalon, ket nagpiket iti opisina ti Department of Agriculture idiay Quezon City idi Marso 7 tapno babalawen ti gobyerno ni Marcos gapo iti kinaawan panagtignay na iti epekto ti El Nino kadagiti mannalon. Kiniddaw da ken Marcos ken kadagiti ahensya ti estado a mangted da iti dagos a tulong, nangnangruna kadagidiay nadadael ti apit da gapo iti tikag.

Demolisyon idiay Navotas City, sinuppiat. Dagiti mangngalap a kameng ti Pambansang Lakas ng Kilusang Mamamalakaya ng Pilipinas (Pamalakaya) iti igid ti baybay idiay Navotas City idi Marso 15 tapno suppiaten ti mandar ti lokal a gobyerno a rakraken dagiti pagtahungan ken ‘baklad’ tapno maisayangkat ti Navotas Bay Reclamation Project. Ti 650-ektarya a reklamasyon ket itantandudo ti lokal a gobyerno ken ti kasosyo na nga Argonbay Construction Company, maysa a subsidyaryo ti San Miguel Corporation a kukua ni Ramon Ang. Iti laksid ti ibubusor, insayangkat dagiti tao ti kumpanya ken ti Coast Guard ti demolisyon idi Marso 18.

Aldaw kontra dadakkel a dam, linagip. Nagprotesta dagiti grupo ti nailian a minorya ken tagasalaknib ti kalikasan iti opisina ti Department of Environment and Natural Resources (DENR) idiay Visayas Aenue, Quezon City idi Marso 14 tapno suppiaten ti pannakaibangon dagiti dadakkel a dam iti pagilian ken irupir a masalakniban dagiti karayan. Naangay ti protesta iti pananglagip ti sangalubongan nga International Day of Action for Rivers and Against Large Dams.

Marcos idiay Germany, sinabat ti protesta. Ti panagbisita ni Ferdinand Marcos Jr idiay Berlin, Germany idi Marso 13 ket sinabat ti protesta dagiti migrante a Pilipino. Ti ALPAS Pilipinas ken Gabriela-Germany ti nangidaulo kadayta a protesta ken dinar-ayan dagiti gayyem a German nga organisasyon. Kunada, ti ibibisita ni Marcos idiay Germany ken dadduma pay a pagilian idiay Europe manipod Marso 11-15 ket rumbeng nga agbalin nga okasyon para kadagiti amin a migrante a Pilipino ken para kadagiti mangilablaban iti karbengan-tao a mangkondenar iti naranggas a rehimen a mangisaksaknap iti nakaro a panaglabsing iti karbengan-tao ken international humanitarian law (IHL).

LGBTQIA+ iti EARIST, timmakder laban iti diskriminasyon. Nagprotesta dagiti LGBTQIA+ iti panangidaulo ti Bahaghari-EARIST iti kampus na idiay Sta.Mesa, Manila idi Marso 15 iti sango iti pannakaiparit dagiti transwoman nga estudyante a maka-enrol agingga a di da agpapukis. Gapo iti protesta, temporaryo a pinasardeng ti eskwelaan ti annuroten.