Idi Marso, impablaak ti tallo a dadakkel a burgesya-komprador ti “panagtipon da” para iti operasyon ti Ilijan LNG terminal, ti kaunnaan nga “integrated LNG import facility” nga impatakder ti Atlantic Gulf & Pacific Company (AG&P) iti igid ti baybay idiay Barangay Ilijan, Batangas City. Nagkakadua ti Meralco PowerGen, Aboitiz Power ken San Miguel Global Power (SMGP) a nanggatang iti nasao a pasilidad iti gatad a $3.3 bilyon (₱184 bilyon).

Sakupen ti Ilijan LNG terminal ti siyam nga ektarya a kadagaan ken agingga 700 metro a kadanuman manipod baybay para iti “agtatapaw a pagidulinan” ti LNG (liquefied natural gas). Ti nasao a pasilidad ti mangsuplay iti natural gas iti maipasdek a dakkel a planta ti enerhiya a kukua ti San Miguel Corporation (SMC).

Daytoy a pasilidad ken planta ket karaman kadagiti 12 a “terminal” ken 35 a baro a planta ti enerhiya a nairanta a mabangon tapno mangsippaw ti imported nga LNG ken diesel. Pito kadagiti terminal ken walo kadagiti baro a planta ti naikeddeng a maipatakder iti igid ti baybay idiay Batangas, iti sango ti Verde Island Passage (VIP). Adda pay dagiti plano a maipatakder idiay Leyte, Navotas City ken Zamboanga. Ti maysa kadagiti planta ti LNG, a naikeddeng a maipatakder iti igid ti Tañon Strait idiay San Carlos, Negros Occidental, ket temporaryo a nasinga gapo kadagiti protesta dagiti residente, relihiyoso ken dagiti grupo a maka-kalikasan. Ado kadagiti proyekto ti LNG ti itantandudo ti SMC, agraman dagiti multinasyonal nga institusyon ken dagiti banko a Japanese, Amerikano ken British.

Iti agdama, adda innem a planta nga LNG ti agop-operasyon iti pagilian, ket lima kadagitoy ti adda iti igid ti baybay ti Batangas.

Pangigabsuunan ti sarplas nga LNG ti US

Inlukat ti Pilipinas ti panagangkat ti LNG manipod idi 2021 iti sango ti maipadpadamag a dumteng a pannakaibos ti reserba a natural gas iti Malampaya gas fields iti 2027. Us-usaren ti US daytoy a mangiduron iti pagilian tapno agangkat ti LNG.

Ti US ti kangrunaan a prodyuser ti LNG iti lubong manipod idi 2011. Inartapan na ti Russia, Australia ken Qatar ken nagbalin a numero uno nga eksporter iti kaunnaan a gundaway idi Disyembre 2023. Daytoy ket nangnangruna gapo ti panangsamsam ti US iti linnakuan ti LNG idiay Western Europe (Germany, France, UK, ken dadduma pay) a sigud nga agay-ayus kadagiti tubo manipod idiay Russia. Malaksid iti inyetnag ti US a sangsyon maibusor iti panaggatang ti LNG idiay Russia manipod bimtak ti gubat idiay Ukraine, pinabittak na pay ti Nordstream pipeline tapno saan a makailusot ti LNG. Agsasanggala ti kasapulan nga ipasdek a terminal ti LNG tapno igabsuun ti LNG manipod idiay US a maipan idiay Western Europe babaen kadagiti dadakkel a bapor.

Ti direkta a resulta ti US proxy war idiay Ukraine ket ti panagngato ti presyo ti LNG iti $40 kada maysa a milyon a British thermal unit (mmBtu) idi 2022. Nupay kasta, gapo iti sobra a produksyon ti US iti LNG, bimmaba ti presyo iti sangalubongan a merkado iti $9.80 kada mmBtu idi 2023.

Ikagkagumaan ita ti US a manglukat kadagiti baro a merkado ken monopolisaen dagiti daan a merkado idiay Asia tapno pagurnongan ti sarplas nga LNG ken tapno agtalinaed a nangato ti pangkasapulan ken presyo na. Dagiti kumpanya ti US a kas iti Exxonmobil, Novatek ken Chevron ti pinaka-interesado nga agangkat ti LNG.

Uray no lumaka ti presyo ti LNG iti sangalubongan a merkado, temporaryo laeng dayta ken di na kayat a sawen nga ilaka na ti singir ti kuryente iti Pilipinas. Idi 2023, nangin-ngina iti $1-$3/mmBtu ti imported nga LNG no iyarig iti lokal a natural gas. Sigun iti Institute for Energy Economics and Financial Analysis, ti presyo ti enerhiya nga aggapo iti imported nga LNG ket ₱9 kada kilowatt hour (kwh) agingga iti ₱16/kwh. Daytoy ket nangatngato ngem ti abereyds a ₱7.38/kwh a presyo ti enerhiya manipod ti kapada nga imported a karbon ken diesel idi 2023, ken ₱4.4/kwh nga usar ti lokal a solar power.

Iti laksid ti sigurado a nangatngato a bayad, ti Department of Energy ket nangikeddeng pay a masapol a mangala amin dagiti distribyutor ti kuryente manipod kadagiti planta a mangiprosproseso ti imported nga LNG. Maitunos iti “energy map” ti rehimen a Marcos, ingato ti Pilipinas ti panagusar ti imported nga LNG ken dagiti “renewable” nga enerhiya manipod iti 29% ( a ti 13% ket LNG ) agingga iti 35% inton 2030 ken 50% inton 2050.

Pangta iti VIP ken pagbiagan dagiti mangngalap

Ilaklako ti LNG kas “transition fuel” gapo ta nadaldalos kano daytoy no iyarig iti karbon ken diesel. Nupay kasta, mangpataod pay latta daytoy kadagiti greenhouse gas (GHG) a kas iti methane, carbon monoxide ken carbon dioxide. Kinapudno na, ipakita dagiti panagadal a ti methane a patauden na ket ad-adda a makadangran iti aglawlaw, ta 80-100 a daras a napapaot a mangipupok ti bara iti atmospera no iyarig iti carbon dioxide.

Ti Ilijan LNG terminal ket nairugi a maibangon idi panawen ti pandemya (2021) ken naglippas idi 2023. Ti AG&P, maysa a kumpanya a nakabase idiay United Arab Emirates, ti nangibangon iti dayta katinnulong ti Osaka Gas ken ti Japan Bank for International Cooperation. Idi Pebrero, ginatang ti Amerikano a kumpanya a Nebula Energy ti dibisyon ti AG&P a nakaturong iti LNG.

Kumadua-an ti Ilijan LNG terminal iti Batangas Combine Cycle Power Plant nga agdama nga ipatpatakder ti SMGP idiay Sta.Rita, Batangas. Nupay agsina a proyekto, agkasilpo ti dua a pasilidad ken nakasango iti agpada a paset ti VIP.

Sigun iti panagadal ti grupo a maka-kalikasan, dagiti dua a pasilidad, ken ti dadduma pay kas kadaytoy, ket makadangran iti ekosistema ti VIP nga ibilang dagiti syentista a ” ti kabaknangan a taaw nga habitat” iti intero a lubong. Idi madama a maibangbangon, ti sakop ti pasilidad ket naapektaranen ti sedimento ken darat. Ti konstruksyon ti mangdadael iti siklo ken pagnaedan dagiti ikan ken dadduma pay a nabiag iti baybay saan laeng nga iti asideg a sakop na, no di ket iti intero a VIP. Nagbanag daytoy iti ad-adda pay a pannakadadael dagiti coral reef ken panagbassit ti makalapan dagiti mangngalap.

Malaksid iti pannakadadael ti baybay, sangsangoen met ti AG&P ti kaso nga iligal a panangbaliw-usar dagiti daga nga agrikultural kadagiti barangay ti Ilijan ken De La Paz. Adda met dagiti kaso nga iligal a panangputed kadagiti kayo ti niyog iti lugar. Kinapudno na, nangipaulog ti Department of Agriculture iti “cease and desist order” maibusor iti kumpanya idi napan a tawen gapo ta awan ti pammalubos na a mangbaliw-usar ti daga. Amin dagitoy ket inyaleng-aleng ti AG&P ken dagiti banko ti Japan.

Ginasot a mangngalap idiay Batangas ti nabayagen a naapektaran iti panagandar dagiti planta ti enerhiya a First Gen ken SMC. Sakbay pay a nangrugi ti pannakaibangon dagiti baro a planta ken pasilidad, nasurok kaguduan ti naksay iti nakalap nga ikan (tulingan ken galunggong) manipod 2019. Ad-adda pay a nalipit da idi maiparit ti panagkalap kadagiti igid ti baybay nga asideg iti lugar a pagbangonan.

Kanayonan na, pagbutbutngan dagiti residente ti posible a panagtagas ti LNG iti baybay, aglalo ta bulnerable ti VIP iti napipigsa ken nakaro a bagyo. Saan pay a nakarekober ken mabalin a saanen a makarekober, ti VIP manipod iti didigra nga impagteng ti panagtagas ti langis manipod iti bapor nga inarkila ti SMC, ti MT Princess Empress, idi napan a tawen.

Ti angin ken danum idiay Batangas ket kumaro a marugitan kagiddan ti pannakatatek ti baybay ditoy kadagiti planta ti narugit nga enerhiya. Ad-adda pay a mariribok ti biag marino gapo ta pumuskol ti panagruar-serrek dagiti bapor a mangitulod ti imported nga LNG.

Ado a komunidad iti igid ti baybay ti agpegpeggad nga agkurang iti pagbiagan da ken uray pay ti pagnaedan da. Agdagop iti dua a milyon a Pilipino ti direkta nga agpannuray iti kinabaknang ti baybay ti VIP.