Kabarbaro a serye ti panagikkat iti Nexperia. Kinondenar ti Nexperia Workers Philippines Inc. Workers Union(NWPIWU)-NAFLU-KMU ti baro a serye ti panagikkat nga ipatungpal ti Nexperia Philippines manipod Abril agingga Setyembre. Impakaammo ti kumpanya iti unyon idi Marso 4 nga adda dandani dua a lawas a pannakaiserra ti maysa nga erya ti kumpanya ken 53 a trabahador ti maikkat. Impakdaar ti kumpanya a daytoy ket umuna laeng iti serye dagiti posible a panagikkat iti daytoy a tawen. Ti nasaknap a panagikkat nga aramiden ti Nexperia ket panagsalungasing kadagiti nailanad a kondisyon iti CBA na iti unyon. Iti agdama, adda iti negosasyon ti unyon para iti CBA 2024-2026.

Dagiti benepisyo dagiti dyanitor ti PUP, impaganetget da. Nagpiket dagiti dyanitor ken kameng ti Samahan ng Janitorial (SJ), dagiti kameng ti Anakbayan ken dagiti estudyante ti Polytechnic University of the Philippines (PUP) idiay Sta.Mesa, Manila idi Marso 13 tapno ipaganetget ti pannakaitantan dagiti benepisyo dagiti dyanitor manipod iti Starcom Manpower Agency. Ti protesta ket nainaig iti pannakitungtong dagiti trabahador iti pannakabagi ti ahensya. Idi napan a tawen pay nga immuna nga inrupir dagiti dyanitor dagiti arungaing da iti administrasyon ti PUP ken ti ahensya para kadagiti insentibo, 13th month pay, retroactive pay da, ken kinaawan transparency iti panangpasweldo kadakuada.

Nailian nga Aldaw ti Pananglagip kadagiti Migrante. Nagprotesta dagiti kameng ti Migrante iti Department of Migrant Workers (DMW) idi Marso 17 kas paset ti pananglagip da iti Nailian nga Aldaw ti Pananglagip kadagiti Migrante. Kabayatan na, dagiti overseas Filipino workers manipod Saudi Arabia ket nagprotesta tapno kiddawen ti nagrigatan da a sueldo ken benepisyo a saan da pay a naawat sipod idi 2016 a pannakasisante iti makuna a pagilian. Iti rekord ti DMW, agdagop iti 9,000 ti bilang dagita a trabahador.