![]( https://philippinerevolution.nu/wp-content/uploads/2024/03/sityo-balubad-residents-demolisyon-march-12-2024-1024x794.jpg )
Pito, nadangran iti naranggas a demolisyon idiay Angeles City
Pito a residente ti Sityo Balubad idiay Barangay Anunas, Angeles City idiay Pampanga ti nasugatan idi Marso 12 iti awan kaes-eskan na a panagpaltog dagiti pulis. Nagserbi kas puersa ti seguridad dagiti pulis iti demolition team ti Clark Hills Properties Corporation a simrek iti lugar tapno rakraken ti barikada dagiti residente.Nagdagop iti 500 ti nagtipon a puersa dagiti pulis ken maton. Apektaran ti plano a demolisyon ti nasurok a 500 a balbalay iti 72-ektarya a daga a gamgamgamen ti kumpanya. Mapattapatta a 2,000 a residente ti biktima ti panangsamsam iti daga.
Naranggas a rinakrak dagiti puersa ti estado ken maton ti balay nga adda iti asideg ti barikada ken pinilit da a sinerrek dagiti pagnaan iti baryo. Iti sangoanan ti panangidepensa dagiti residente, nagpaputok ti paltog dagiti pulis a nangsugat iti pito a residente iti barukong ken luppo da. Pinangtaan da met ti dua a peryodista a mangipadpadamag iti kinaranggas. Iti simmaruno nga aldaw, simrek manen dagiti maton iti sityo ken binuong dagiti tawa iti balbalay.
Panagbomba. Di kumurang iti 22 a bomba ti intinnag ti AFP manipod iti tangatang kadagiti komunidad ti Abra manipod Pebrero 25 agingga Pebrero 27. Sinaruno daytoy ti panangkanyon ken panag-istraping dagiti soldado a naipunta iti asideg dagiti pagkalapan, pasto ken pagmulaan dagiti residente. Apektaran na ti nagbeddengan ti Barangay Bazar, Sallapadan, Barangay Bulbulala,Licuan-Baa.
Idiay Bukidnon, kinanyon manen dagiti tropa ti 10th ID ti Valencia City idi Marso 10, alas-10 ti bigat agingga alas-2 ti malem. Saan a nakurkurang iti 18 a daras a nagpabanto dagiti puersa ti AFP aramat dagiti 105 howitzer a nakaplastar idiay Sityo Bulakaw, Barangay Concepcion iti makuna a syudad.
Panagpaltopaltog. Awan aniaman na a pimmaltog ti 2nd IB idiay Sityo Cayang, Barangay Liong, Catangian, Masbate idi Marso 11 ken impablaak a maysa nga “engkwentro” iti New People’s Army (NPA) ti napasamak. Binutbuteng ken pinilit pay ti militar dagiti opisyal ti barangay nga agpirma ti sertipikasyon a mangpaneknek nga adda napasamak a gubat iti lugar da.
Iligal a pannakabalod ken pannakaidestiero. Arbitraryo nga impupok ken inkapilitan a pinasubli idiay The Netherlands ti Pilipino nga aktibista a ni Marikit Saturay idi bimmisita iti Pilipinas idi Marso 7 tapno tumabuno iti kasangay ni apong na a baket. Tallo a rabii nga impupok isuna ti Bureau of Immigration (BI) idiay Ninoy Aquino International Airport sakbay nga inkapilitan a pinasubli iti naggapuan a pagilian. Kuna ti BI, adda iti “blacklist order” ni Saturay gapo iti pannakipaset na kadagiti “anti-gobyerno nga aktibidad”.
Pananglipit. Awan-sardeng nga intimidasyon ken harasment ti ar-aramiden dagiti puersa ti estado iti pamilya dagiti Nalabaga a mannakigubat ti NPA a nagmartir idiay Bilar, Bohol idi Pebrero 23. Iti napalabas a sumagmamano a lawas, maulit-ulit a binisita ti pulis ti pamilya ti nagmartir a ni Perlito Historia tapno piliten ida nga isanod ti plano nga ipa-otopsya ti bangkay ti biktima. Binayadan ti pulis ti pamilya ni Historia ken pinangtaan idi madi da inawat ti kuarta.
Panangsalungasing iti kalintegan dagiti trabahador. Ti lider ti Technol Eight Philippines Workers Union (TEPWU)-OLALIA-KMU a ni Mario Fernandez ket linipit da manen idi Marso 9. Maipagarop a nainaig ti kasta a pananglipit iti umadani a pannakiumanda iti baro a collective bargaining agreement (CBA). Kasta met laeng ti kapadasan na idi 2022.
Kabayatan na, ti kumpanya a Profood International Corporation ket nangbaybay-a ti trabahador da a ni Isidro Rosell, 62, idi maaksidente iti Mandaue Plant idiay Barangay Maguikay, Mandaue City, Cebu. Sangapulo ket walo a tawenen nga agub-ubra ni Rosell iti kumpanya. Naaksidente idi Pebrero 20 idi natnag iti trak a pagkargaan na kadagiti cocoshells nga aggapo iti pabrika. Nangpataod dayta iti blod clot iti utek na. Nagkedked ti kumpanya a tumulong kenkuana.