Milanog ang singgit sa mga aktibistang Pilipino-Amerikano samtang namulong ang utok-gyerang kongresista sa US nga si Rep. Darrell Issa sa kumperensya sa Center for Strategic and International Studies sa Washington, DC niadtong Hulyo 11. Gimakmak sa mga aktibista ang presensyang militar sa US sa Pilipinas, ang mga krimen niini batok sa mga Pilipino, ug ang pagpanghagit og gyera batok sa ilang imperyalistang kaaway nga China.

Si Issa usa ka myembro sa US-Philippine Friendship Caucus ug sa US House Foreign Affairs Committee. Ginaduso niya sa Kongreso sa US ang paghatag og dugang $500 milyong ayudang militar para sa Pilipinas. Dayag niyang ginasulsulan ang bangi tali sa Pilipinas ug China sa West Philippine Sea (WPS) aron iduso ang interes sa US.

Sa iyang pamulong, gidayeg ni Issa ang malampusong pagduso sa imperyalistang US sa Japan nga magpadala og mga tropang militar sa Pilipinas aron batukan ang usa ka “komun nga kaaway” nga mao ang China.

Sa takuban sa ipokritikong pagdepensa sa “gawasnong kadagatan ug teritoryong pangdagat sa Vietnam, Taiwan, ug Pilipinas,” gisaway ni Issa ang giingong “agresibong” aktibidad sa mga sakyanang pangdagat sa China sa South China Sea. “Kung wala tay buhaton, makasaksi kita sa paglamon, direkta o dili direkta, sa maong mga nasud ug teritoryo,” pagpanghadlok pa niya.

Samtang sa usa ka sulat niadtong Hulyo 12, gihangyo sa duha ka senador sa US kang Biden nga maghatag og “kumpletong listahan sa mga pangmilitar, ekonomiko, ug diplomatikong mga opsyon nga giandam sa Pentagon ug US State Department aron suportahan ang Pilipinas sa pakigbangi niini batok sa China sa WPS.”

Kakoro sa Pilipinas

Kakoro ni Issa ug mga senador sa US ang daghang bayarang itoy sa imperyalistang US sa Pilipinas sa pagpanghulhog og gyera batok sa China. Sa sugo sa US, walay hunong ang ilang pagsabasaba aron painiton pa ang tensyon sa WPS ug isangyaw ang mini nga patriyotismo sa mga Pilipino batok sa China.

Lakip dinhi ang kanhing upisyal sa US Air Force nga si Col. Raymond M. Powell, nga gihatagan sa mga kumpanya sa midya sa Pilipinas og daghang oras sa telebisyon ug mga interbyu sukad pa sa miaging tuig. Nagpaila si Powell isip “security analyst” ug “eksperto sa isyung pangkadagatan.”

Si Powell usa ka operatiba sa saywar ug ahente-probokador sa US nga nagatukmod sa mga pwersang pangseguridad sa Pilipinas nga maglunsad og mga mahagitong operasyon sa WPS, ug gamiton na ang Mutual Defense Treaty sa nasud sa US. Walay hunong ang iyang paghulagway sa China nga sarado sa pagkignegosasyon aron ipakita nga wala nay espasyo para sa diplomasya ug dayalogo.

Kaduweto niya si Commodore Jay Tarriela, tigpamaba sa Philippine Coast Guard (PCG) para sa WPS, nga nagbansay bag-o lang sa Washington, DC. Bisan nakapailalum sa kumand sa PCG, kanunay nga adunay kaugalingong “opinyon” si Tarriela sa mga isyu sa WPS. Subsub ang iyang mga pamahayag nga sagad sukwahi pa sa pamahayag sa tigpamaba sa tibuok PCG ug sa Philippine Navy. Ginapainit ni Tarriela ang mga tensyon sa WPS ug matngong tigpakaylap og disimpormasyon o mga pekeng impormasyon.

Aktibo usab nga tigpakaylap sa saywar ug linya sa US kalabot sa WPS ang mga lokal nga maki-US nga “think tank.” Lakip dinhi ang Stratbase ADR Institute, usa ka institusyon nga ginasuportahan sa dagkung negosyo ug langyawng gubyerno, ug aktibong nakigtinabangay sa embahada sa US ug Australia. Sama ni Powell, gihatagan usab og espasyo sa lokal nga masmidya ang grupong International Development and Security Cooperation, ug pipila ka mga piling akademikong maki-US.

Gawas niini, aktibo usab ang Armed Forces of the Philippines sa saywar aron hatagag rason ang ilang ginahimo nga pagpainit sa tensyon sa WPS. Naghimo sila niadtong Hunyo 28 og “kampanyang impormasyon” nga Mulat.

Ika-8 nga tuig sa arbitral ruling mahitungod sa WPS

Sa ika-8 nga anibersaryo sa arbitral ruling bahin sa WPS, naglunsad og malinawong fluvial parade o parada sa dagat ang mga mangingisda ug kabatan-onan sa Subic, Zambales niadtong Hulyo 12. Giduso sa parada ang malinawon ug diplomatikong solusyon aron ihingusog sa mga patriyotikong Pilipino ang soberanong katungod sa exclusive economic zone (EEZ).

Sa desisyon sa Permanent Court of Arbitration niadtong 2016, gibasura niini ang pag-angkon sa China sa tibuok South China Sea, lakip na ang dakung bahin sa WPS, ilalum sa giingon nilang “9-dash line.” Giuyunan usab sa korte ang soberanong katungod sa Pilipinas sa 200 nautical miles (370 km) gikan sa baybayon sa nasud nga giilang EEZ. Gitakda kini ilalum sa 1982 United Nations Convention on the Law of the Sea (UNCLOS).

Nahisukip usab sa desisyon nga ang Scarborough Shoal (Panatag Shoal) usa ka komon nga pangisdaan nga gisaluhan sa tradisyunal o gagmayng nga mangingisdang Pilipino, Vietnamese, ug Chinese. Nagpasabot kini nga dili pwedeng pugngan ang mga mangingisdang Pilipino nga mosulod ug mangisda didto. Bisan og anaa kini sulod sa 200 nautical miles sa Pilipinas, ang Scarborough Shoal, dili sakop sa EEZ sa Pilipinas.

Gisaway usab nila ang pagpamig-ot sa China sa mga sakyanang pangdagat sa Pilipinas nga naglawaig sa EEZ. Gihatagag duut niini ang pagdaut sa China sa kinaiyahan sa pipila ka bahin sa WPS tungod sa ilang gihimong mga proyektong reklamasyon sa lugar aron magtukod og artipisyal nga mga isla.