3,000 mag-uuma sa tubo, nagrali sa Batangas. Sa pagpangulo sa SUGAR-Batangas, nagtigum ang 3,000 ka mga mag-uuma sa tubo atubangan sa upisina sa DSWD sa Batangas City niadtong Hulyo 10 aron ipanghingusog ang pagpanghatag sa ayuda nga gigahin alang kanila. Resulta sa protesta, gidawat sa DSWD ang mga papeles sa ikalimang hugna sa mga benepisyaryo nga una nilang gibalibaran. Giawhag sa mga mag-uuma ang hinanaling pagpagawas sa ayuda.

Protesta alang sa Palestine. Kapin 300 ka mga kabatan-onan ug estudyante gikan sa Baguio City ang misalmot sa protesta alang sa Palestine niadtong Hulyo 7 sa Malcolm Square sa syudad. Nagpiket usab atubangan sa FEU ang Tamaraws for Palestine niadtong Hulyo 15 aron ipadayag ang ilang suporta sa katawhan sa Palestine. Ilang gimakmak ang nagpadayong kampanya sa henosidyo sa Zionistang estado sa Israel, nga gisuportahan sa imperyalismong US, batok sa mga Palestino sa Gaza Strip.

Protesta batok sa RAA. Miadto sa embahada sa Japan sa Pasay City niadtong Hulyo 8 ang Bayan ug Asia-Wide Campaign against US-Japanese Domination and Aggression of Asia aron kundenahon ang pagpirma sa Japan ug Pilipinas sa kasabutang militar nga Reciprocal Access Agreement (RAA). Sumala sa Bayan, ang kasabutan usa ka makuyaw nga lakang ug mosangpot sa grabeng militarisasyon ug panagbangi sa Asia-Pacific.

Panagtapok ug protesta batok sa NATO, gipahigayon sa US. Nagtapok niadtong Hulyo 7 sa Washington DC sa US ang 60 ka grupong anti-imperyalista ubos sa Resist NATO (North Atlantic Treaty Organization) aron ipanawagan nga ihunong na ang mga gubat sa US sa Ukraine ug uban pang bahin sa kalibutan, ingonman ang henosidyo niini sa Palestine. Nagmartsa sila padulong sa White House. Ayha kini, gipahigayon sa mga grupo ang Resist NATO Summit nga gitambungan sa 300 ka indibidwal. Gipahiuyon nila kini sa ayha ang panagtigum sa mga nasud nga myembro sa NATO sa Washington niadtong Hulyo 7-9 sa okasyon sa ika-75 nga anibersaryo niini.