Gipirmahan niadtong Hulyo 8 ang kasabutang militar tali sa Pilipinas ug Japan nga mao ang Reciprocal Access Agreement (RAA). Sa kinaunahang higayon sukad natapos ang Ikaduhang Gubat sa Kalibutan, pagatugutan niini ang pagsulod ug pagpondo sa mga tropa sa imperyalistang Japan sa nasud. Pagatugutan niini ang walay pugong nga paggawas-sulod sa mga tropang Hapon sa takuban sa giusang mga pagbansay ug kooperasyon. Daku ang kapareho niini sa kasamtangang Visiting Forces Agreement tali sa US ug Pilipinas.

Ang RAA langkub sa Indo-Pacific Strategy sa US nga adunay nag-unang tumong nga pugngan ang paglapad sa gahum ug impluwensya sa China, ang komun nga kaaway sa Japan ug US sa Asya. Gipirmahan kini sa konteksto sa gipakusog nga mga operasyong militar sa Japan sa ubang nasud sa gambalay sa Quad (Quadrilateral Security Dialogue) nga gipangulohan sa US, ug sa nagkadakung papel niini sa mga pagbansay ug pagpangandam sa gubat.

Sa tukmod sa US sa miaging mga tuig, gipakusog ug gipadaku sa Japan ang gitawag niining self-defense force isip usa ka pwersang iggugubat, nga dayag nga ginadili sa kaugalingon niining konstitusyon. Ginatukmod sa US ang Japan nga pataason ang badyet niini sa militar ngadto sa 2% (gikan sa 1%) sa gross domestic product niini aron “motambo sa gasto” sa “pagpugong sa agresyon sa China.”

Samtang nagsilbi ang Japan isip sekundaryong kaabag nga imperyalistang gahum sa US, adunay kalkuladong risgo nga mapakusog usab niini ang mga monopolyong kapitalistang Hapon nga nagtinguha sa ekspansyunismo. Niadtong 2023, gigambalay sa Japan ang kaugalingong plano nga Free and Open Indo-Pacific aron hatagag porma ang pagpalig-on sa kaugalingong presensya militar ug pagpalapad sa impluwensya sa Asya isip usa ka imperyalistang nasud.

Plano sa Japan nga ihan-ok ang $75 bilyong sobrang kapital niini sa porma sa pamuhunan sa nagkalain-laing proyektong imprastruktura sa mga nasud sa South ug Southeast Asia. Labaw pa sa US ug China, ang Japan ang pinakadakung imperyalistang mamuhunan sa rehiyon. Mikabat sa $367 bilyon ang kasamtangang pamuhunan niini sa mga proyekto sa Southeast Asia pa lang, ilabina sa Singapore, Vietnam, ug Pilipinas.

Lalum nga impluwensya ug kontrol sa Pilipinas

Sa panahon sa rehimen ni Aquino II, aduna nay mga kasabutan tali sa Pilipinas ug Japan aron tugutan ang pagdunggo ug pagpondo sa mga pwersang Hapon sa nasud. Bisan pa man, niadtong 2023 lamang pormal nga gisugdan ang negosasyon sa pagtibuok sa RAA. Gisuportahan kini sa US sa nahitabong Trilateral Summit tali sa US, Japan, ug Pilipinas niadtong Abril, diin gipadayon ang pagpatuman sa mga giusang pagbansay sa tulo ka nasud sa South China Sea. Pipila ka adlaw sa wala pa ang maong tigum, gihimo sa tulo ka nasud ang kinaunhang dungan nga paglawig sa mga barkong iggugubat sa West Philippine Sea.

Pinaagi sa RAA, gitugutan ni Marcos ang Japan nga palig-onon ang interbensyon niini sa Pilipinas bugti sa paghatag og mga karaang himang militar sama sa mga sistemang radar pangsarbeylans, ingonman ang mga saad sa pamuhunan ug pautang, nga nagpasabot lamang sa grabeng pagsalig sa nasud sa langyawng kapital.

Giablihan usab sa RAA ang mga samad nga wala pa naayo nga gibunga sa brutal nga okupasyon sa Japan sa Pilipinas gikan 1942 hangtud 1945. Dokumentado ang linuog nga mga krimen sa gubat nga gihimo sa mga tropang Hapon. Pinakatataw dinhi ang sistema sa sekswal nga pagpangulipon kung asa liboan ka Pilipinong kababayen-an, bata, ug mga bayot ang gidagit gikan sa ilang mga komunidad ug gipriso sa mga kampo militar aron balik-balik nga luguson, tortyuron, ug pakaulawon. Naila ang mga biktima isip mga “comfort women,” nga hangtud karon gihikawan sa hustisya, pareho sa Japan ug sa reaksyunaryong estado sa Pilipinas. Taliwala sa duso sa United Nations, wala kanus-aman hingpit nga giila sa Japan ang mga Pilipinong comfort women ug wala kini naghatag og bisan usa ka sentimong kumpensasyon kanila.