Ang Rachelle Mae Palang Command-New People’s Army (RMPC-NPA) sa Southeast Negros, nagaduyog sa paghinumdum sa komemorasyon sa ika-39 ka tuig sa Escalante massacre. Mahinumduman nga niadtong Septyembre 20, 1985, nagpahigayon og rali protesta ang mga mangunguma kakuyog ang nagkadaiyang mga sektor aron mapadangat sa rehimeng Marcos Sr ang ilang mga yangungo, apan mga bala sa armas sa gikombinar nga mga tropa sa Regional Special Action Forces (RSAF), mga lokal nga kapulisan, mga myembro sa Civilian Home Defense Force (CHDF) ug uban pang mga paramilitar niini ang nisugat nila. Daghang kinabuhi sa mga mangunguma ang nakalas ug nasamdan niadtong panahona tungod sa pagsinggit sa kadalanan sa ilang makatarunganong katungod sa kinabuhi ug panginabuhian nga gihikaw kanila sa reaksyonaryong gobyerno. Hangtod karon, padayon ang pagpangita og hustisya sa mga pamilya sa mga biktima sa linuog nga mga binuhatan sa mga binayrang mga reaksyonaryong pwersa.

Gihanduraw usab sa tibuok katawhan karong adlawa ang pagdeklara ni Marcos Sr sa Martial law niadtong Septyembre 21, 1972. Mahinumduman nga niining panahona, nakasinati og grabeng pagpamig-ot ang mga kritiko ug namatok sa patakaran ni Marcos Sr susama sa pag-abdak, pagpatay, pagdakop, pagbilanggo ug pag-interogar sa mga Philippine Constabulary (PC). Sa Negros Oriental gipasara ni Marcos ang Siliman University ug gipangdakup, gibilanggo ug gi-interogar ang mga magtutudlo ug mga tinun-an sa maong unibersidad lakip ang pag-reyd sa mga buhatan sa newspaper ug mga istasyon sa radyo sa Dumaguete City. Samtang, sa kabukiran nagtunhay ang kalisang ug kahadlok sa katawhan mugna sa mga kalapasan sa tawhanong katungod sa mga reaksyonaryong pwersa ug grabeng kagutom ug kalisud sa mga mag-uuma tungod sa pagkadislokar sa ilang mga panginabuhian.

Sa karon nga panahon, walay kalahian si Marcos Jr sa iyang diktador nga amahan. Sa iyang pagpungko sa poder, mas nigrabe pa gyud ang kahimtang sa mga mangunguma, mga mamumuo ug ang tanang sektor sa mga kabus. Padayon silang nag-antus sa tuman kalisud ug kagutom tungod sa pagpasibaya sa rehimen ni Marcos Jr.

Sa Negros Oriental, giatubang sa katawhan ang kalbaryo nga gimugna sa proyektong Tamlang Valley Zone of Peace nga mulangkob sa mga lungsod sa Santa Catalina, Siaton, Sibulan, Valencia, Pamplona ug syudad sa Bayawan nga butangan sa mina, ekoturismo ug uban pa nga gipasiugdahan sa mga anaa sa gahom nga kasosyo sa mga langyawng mga korporasyon. Tungod niini, mawad-an og panginabuhian ang liboan ka mga lumulupyo ug makaguba usab kini sa ilang mga natukod nga panaghiusa.

Gidugangan pa kini sa kuyanap nga militarisasyon sa kabukiran nga nagmugna og kadaut sa katawhan ug pagkadislokar sa ilang paginabuhian aron mapasiguro ang mga neoliberal nga mga proyekto sa mga dalagkung komprador burgesya, dalagkung agalong yutaan kakunsabo ang mga burukrata kapitalista.

Busa, sa atong paghinumdum sa nahitabong Escalante massacre ug Martial law, kinahanglan nga magpadayon ang mga kabus sa pagpanday sa panaghiusa ug dungan nga makig-away para sa katungod sa yuta ug paginabuhian. Kab-oton usab nato ang tinuod nga hustisya sa mga biktima sa Escalante massacre ug Martial law ug sa uban pang mga biktima sa pagpamatay ug pagpangyatak sa tawhanong katungod nga gihimo sa mga reaksyonaryong pwersa. Padayon nga paninglon ang reaksyonaryong nagharing hut-ong nga sa karon gipangulohan ni Marcos Jr sa ilang mga krimen batok sa katawhan.