Halin sa diktadurya sang amay pakadto sa anak nga si Marcos Jr, nakigbato si Ernesto Jude “Ka Dante” Rimando Jr para sa kinamatarung kag demokrasya sang mga mamumugon kag mangunguma.

Sang nag-ibwal ang kahublagan kontra diktadurya sang anay diktador nga si Pres. Marcos Sr, aktibo nga nagpartisipar si Ka Dante sadtong 1982 bilang estudyante sang Philippine Science High School. Nagpadayon ang iya pagkapamatan-on nga aktibista sang nangin estudyante sang Mechanical Engineering sa University of the Philippines-Diliman.

Nakalubog sa mga ginapigos kag ginahimuslan nga masa sang mamumugon kag mangunguma si Ka Dante. Masobra 20 ka tuig siya naghalad sang iya talento kag ikasarang sa pag-alagad sa masa sang pumuluyo sa Cebu kag Negros.

Bilanggo nga pulitikal

Kabahin si Ernesto Jude Rimando Jr sa mga bilanggo nga pulitikal nga ginpasakaan sang himo-himo nga kaso sang reaksyonaryo nga gobyerno. Panahon sang all out war ni anay Pres. Duterte, gindakop si Rimando sa ginaarkilahan nga apartment sa Payatas, Quezon City sang mga armado nga nakasibilyan gamit ang warrant of arrest nga nakapangalan sa kay “Allan Morales”. Ginbasura sang korte ang illegal possession of firearms and explosives niya nga kaso apang nagapabilin siya nga priso bangud sa walo pa nga iban nga kaso sa lain-lain nga bahin sa Visayas sa amo gihapon nga ngalan. Ginpaidalom siya sa tortyur kag ginpalukpan samtang ara sa kostodiya sang mga ahente-militar.

Panahon sang iya pagkapriso, naglala ang iya nga sakit kag nalab-ot ini sa Stage 4 Liver Cancer. Pila ka beses siya nga nagsulod-guwa sa hospital agud magpabulong. Bisan sa iya ulihi nga mga inadlaw, militante kag malipayon si Ka Dante nga naghalad sang iya kabuhi kag kinaalam para sa pumuluyo. Ang iya pagkamartir, ginakasubo sang linibo ka mga pumuluyo nga nabuligan ni Ka Dante. Ang iya militansya kag optimismo mangin inspirasyon sa linibo pa ka pumuluyo nga magasugpon sa rebolusyonaryo nga kahublagan nga iya gisuguran.

Biktima sa sistema

Halin sa panugod, biktima si Ka Dante sa kadunot sa sistemang mala-kolonyal kag mala-pyudal kag sa diktadurya sang duha ka sunod-sunod nga rehimen Duterte kag Marcos Jr. Ginakundenar sang Armando Sumayang Jr Command-New People’s Army (ASJC-NPA) ang rehimen Marcos Jr sa hungod nga pagpabaya kag pagdingot sang mga kinamatarung sang mga priso sa ikaayong lawas. Ginapakamalaot man namon ang all-out war sang iya rehimen kag ang paghari sang laye militar diri sa pungsod.

Ginapanawagan man namon sa mga tagpangapin sang tawhanon nga kinamatarung, sektor sa simbahan kag tanan nga demokratikong sektor nga maghiliusa sa pagpanawagan sa reaksyonaryong gobyerno nga itib-ong ang tawhanon nga kinamatarung sang mga bilanggong pulitikal. Ang isla sang Negros ang may pinakadamo nga mga biktima sang pampulitikal nga pagpriso kag isa sa may pinakadamo nga biktima sang paglapas sang tawhanon nga kinamatarung.