Kaugot ang nakatanum sa pamensaron kag tagipusuon sang mga pumuluyo kag sang bilog nga rebolusyonaryo nga pwersa sa pagmasaker sang mga sapatnon nga 47th IB sang Armed Forces of the Philippines (AFP) sa lima ka mga Pulang hangaway kag isa ka sibilyan nga nagsakay sa isa ka traysikol sa Sityo Lubi, Barangay Tabugon, Kabankalan City.

Isa na ka tuig ang nagligad halin sang pagkamartir nanday Alejo delos Reyes (Ka Bombo), Melissa dela Peña (Ka Diane), Bobby Pedro (Ka Bebang), Mario Mullon (Ka Goring) kag Janice Flores (Ka Joyce). Nagabiyahe sila sakay sa isa ka gin-arkilahan nga traysikol nga gindrayban ni Robin Gaitan. Wala kaluoy nga ginpaulanan sang bala sang mga uhaw sa dugo nga 47th IB ang traysikol nga ila ginsakyan. Mga medical officer sila ni Ka Bebang, Ka Goring kag Ka Joyce samtang naka medical leave si Ka Diane nga sadto anum ka bulan nga nagabusong upod sa iya bana nga si Ka Bombo.

Mabug-at ang papel nga ginatungdan sang lima ka mga Pulang hangaway bilang mga opiser sang medikal sa rebolusyon. Linibo ka mga pumuluyo ang ila nabuligan paagi sa paghatag sang libre kag dekalidad nga serbisyo medikal nga gindingot kag ginhimo nga negosyo sang reaksyonaryo nga gobyerno. Bukas tagipusuon ang paghalad nila sang kabuhi nga wala sang kabaylo kundi ang bug-os nga kahilwayan sang pumuluyo halin sa pagpanghimulos kag pagpamigos sang mga dalagko kumprador burgesya, burukrata kapitalista, kag agalon mayduta.

Sila halandumon nga mga kaupod nga indi gid dapat naton kalimtan. Inspirasyon sila sang bug-os nga rebolusyonaryo nga kahublagan tungod sa ila wala pagpangduha-duha nga paghalad ang ila kabuhi para sa pagtib-ong sang interes sang malapad nga masang ginahimuslan kag ginapigos.

Madulom nga kasaysayan

Dugang sa mga krimen sa giyera ang ginhimo nga pagmasaker sa Sityo Lubi. Wala sang ginkilala nga sibilyan nga otoridad kag mga laye sa gyera ang AFP. Ginagamit nila ang kapintas batok sa pumuluyo para sa ila kontra-rebolusyon nga programa. Patarasak nila nga ginapunterya ang punta sang ila mga pusil para lang magpalapta sang kakugmat sa pumuluyo.

Sa amo man nga adlaw, ginadumdum naton ang ika-52 nga anibersaryo sang laye militar sadto ni Marcos Sr. Wala sang kinatuhay gani mas nagalala ang pagpangibabaw sang gahum sang militar sa rehimen ni Marcos Jr. Daw bukid ang kadamuon sang mga ginpatay sang mag-amay agud mapabilin sa poder kag makahugakom sang dunang manggad sa aton nga pungsod. Sunud-sunoran sa interes sang ila amo nga US, ginguyod nila ang Pilipinas sa labi nga pagkalubong sa kadulom.

Bangud sini, ginapabakod naton ang aton panindugan sa pagpabaskog sa pungsodnon demokratiko nga rebolusyon agud mahatagan sang hustisya ang tanan nga mga biktima sang paghari militar. Nagakaangay lang nga silutan ang mga traydor sa rebolusyon kag ang AFP-PNP sang ila mga krimen sa pumuluyo. Ang ginawakal sang rehimen US-Marcos Jr nga Bagong Pilipinas maangkon lang kun mabuslan ang mala-kolonyal kag mala-pyudal nga sistema paagi sa paglunsar sang demokratikong rebolusyon sang banwa sa pagpatigayon sang pangmalawigon nga inaway banwa nga may sosyalista nga perspektiba.