Halin Hulyo 23 tubtob subong, tayuyon ang operasyon militar sang kombinado nga mga tropa sang Scout Rangers, 15th IB, 47th IB lakip ang mga pwersa sang 94th IB sa sur sang Negros.

Makita sila sa mga barangay sang Agboy, Gatuslao, Payauan, tanan sa Candoni, Negros Occidental. May masobra 30 ka mga tropa sang militar ang ara sa Sityo Nava, sakop sang Barangay Agboy.

Sa Kabankalan City, Negros Occidental, gintineran man sang militar ang mga baryo sang Magballo, Tapi, Tabugon, Tampalon kag Bantayan. Amo man sa mga barangay sang Pinggot, Canlamay, Balicutoc sa banwa sang Ilog; Barangay Damutan, Hinobaan; mga barangay sang Camindangan kag Manlucahoc, Sipalay City kag mga barangay sang Caliling, Inayawan, kag Camalanda-an, sakop sang Cauayan.

Sa subong, indi magnubo sa 70 ka tropa militar ang nakapakat sa mga sityo sang Barangay Pinggot.

Nagatsekpoynt ang militar sa mga dalan halin adlaw tubtob gab-i, nagasulahog sa mga lati, nagatsekyar sang mga bag nga dala sang mga mangunguma pakadto sa ila ulumhan, kag naga-food blockade. Ginpunggan man sang mga soldado nga mag-gwa ang mga residente sa ila lugar.

Ang pagpasingki sa focused military operations sang mga mersenaryo nga AFP nagaserbi sa mga neoliberal nga mga proyekto sang mga dalagku nga komprador burgesya sa sur nga bahin sang Negros kaangay sang oil palm sa Candoni, mga mina, quarry kag iban pa. Tuman nga kabudlayan, pag-antus, dislokasyon sa palangabuhian kag pagpanglapas sa tawhanon nga kinamatarung ang gindulot sa mangunguma sa sini nga mga lugar.