Ika-34 na anibersaryo ng BHB:
Sagot sa armadong interbensyon ng US

Read this article in English

Sa ika-34 anibersaryo nito, lubos ang kahandaan ng BHB na ibayong isulong ang digmang bayan

Prinsipal na tungkulin ng BHB at buong rebolusyonaryong kilusan ang pagsusulong ng digmang bayan. Lalong kailangang pahigpitin ang kapit sa tungkuling ito sa harap ng umiigting na pambansa at pandaigdigang krisis ng naghaharing reaksyunaryong sistema. Lalong nabubulok at bumabangis ang paghahari ng imperyalismo at reaksyon at lumalakas ang pakikibaka ng mga rebolusyonaryong pwersa at mamamayan para sa demokrasya, pambansang kalayaan, katarungan at kapayapaan.

Bilang na ang mga araw ng rehimeng Macapagal-Arroyo. Dahil desperadong isalba ang sarili, lalo pa nitong pinasasahol ang todo-todong kontra-rebolusyonaryong gera kasabay ng lalong pagpapalawak at pagpapalalim ng interbensyong militar ng US sa Pilipinas.

Walang lubay ang mga atake nito sa mga rebolusyonaryong pwersa at baseng masa. Pero dahil wala itong pag-asang manalo sa BHB at Moro Islamic Liberation Front (MILF), nagkukutsaba ang rehimen at ang US upang direkta na ring maipakat ang mga pwersang Amerikano laban sa mga rebolusyonaryong pwersa. Pinipilit nilang gamitin ang "gera kontra-terorismo" upang bigyang-katwiran ang panggegera sa mga rebolusyonaryong pwersa sa Pilipinas.

Sa harap ng malakas na pagtutol ng mamamayan at pati ng reaksyunaryong oposisyon at paglalantad sa mga kasinungalingan ng rehimen, naubusan na ng katanggaptanggap na dahilan ang sabwatang Bush at Macapagal-Arroyo upang bigyang-katwiran ang tuwirang agresyon ng US sa bansa. Nagpakulo sila ng pambobomba sa Davao City at iba pang lugar sa Mindanao para ibintang nang tuwiran sa MILF at nang di-tuwiran sa BHB. Binitiwan na nila ang kunwa'y pagtugis sa Abu Sayyaf at tahasan nang ipinahayag ang balak na pagpakat ng tropang pangkombat ng US sa mga base ng mga rebolusyonaryong pwersa: sa North Cotabato, isa sa mga base ng MILF, at sa Occidental Mindoro, Quezon at Compostela Valley, na mga base naman ng BHB.

Para bigyang-daan ito, sa tulak din ng US ay sinagasaan ng rehimen ang usapang pangkapayapaan sa NDFP at sa MILF. Sa halip, ibayong pinatitingkad ng sabwatan ng Bush at Macapagal-Arroyo ang pamamaraang militar na pangunahing aasa na sa agresyong US sa tangkang sugpuin ang rebolusyonaryong kilusan. Para mabigyang-katwiran ang mga ito, ipinaggigiitan ng US at ng papet na rehimen ang deklarasyon na "terorista" ang Partido Komunista ng Pilipinas, BHB at si Kasamang Jose Ma. Sison. Idinedeklara na rin ngayon ng papet na rehimen na "terorista" ang MILF.

Pananatilihin ng BHB ang kabuuang depensibong tayo nito sa kasalukuyang yugto ng digmang bayan. Gayunman, alinmang pwersang pangkombat ng US na papakat sa loob o sa kanugnog ng mga teritoryo ng rebolusyonaryong kilusan ay magiging target ng atake ng BHB at mamamayan. Mananatili ring puspusan ang pagkilos ng Partido, BHB at buong rebolusyonaryong kilusan upang biguin ang dayuhang agresyon at palayasin ang mga dayuhang tropa sa Pilipinas.

Binibigyang-diin ngayon ng Partido at buong rebolusyonaryong kilusan ang mas malawak na pagabot at pagpapakilos sa mamamayan, ang paghihiwalay at pagpapabagsak sa sagad-sagaring papet, mapaniil at bulok na rehimeng US-Macapagal-Arroyo, at paglaban sa tumitinding interbensyong militar ng US. Kukumprontahin at lalabanan nito ang mga susunod pang papet na rehimen.

Nakahanda at mahusay na nakapakat ang Partido at mga rebolusyonaryong pwersa para sa lahatang-panig at ibayong pagpapalakas, higit na mabilis na pagsulong at malalaking pagsikad ng mga rebolusyonaryong pagsisikap sa taong ito at mga susunod na taon.

Binibigyan ng partikular na atensyon ang ilang susing sangkap sa paghahanda ng hukbong bayan at pagsusulong ng armadong pakikibaka. Paghahanda na rin ang mga ito sa lalong nalalapit na posibilidad ng agresyong militar ng US laban sa mga rebolusyonaryong pwersa at baseng masa:

• Pukawin, organisahin at pakilusin ang milyun-milyong mamamayan para lumahok at sumuporta sa armadong pakikibaka at kilusang masa. Maramihang buuin ang mga rebolusyonaryong organisasyong masa, milisya at sangay ng Partido sa kulu-kulumpon hanggang sa nakararaming mga baryo at mga bayan. Higit na pasiglahin ang mga pakikibakang antipyudal at iba pang pagkilos ng masa. Palawakin at palakasin ang nagkakaisang prente. Pahigpitin ang ugnayan at tulungan ng mga kilusan sa kanayunan at kalunsuran.
• Higit na palawakin, pagdugtung-dugtungin at patatagin ang mga larangang gerilya at sinsinin ang mga ito sa pamamagitan ng pagtitiyak na may naitatayong batayang yunit ng hukbo sa mga munisipalidad sa saklaw ng mga larangang gerilya.
• Palakasin ang rekrutment sa BHB mula sa malawak na baseng masa sa kanayunan alinsunod sa mga pamantayan at alituntunin, gayundin ang suportang tao, materyal at pulitikal mula sa kalunsuran.
• Pataasin ang kasanayang pulitiko-militar ng mga upisyal at mandirigma para sa katalasan sa pulitika, pamumuno at kakayahang lumaban.
• Ihabol ang sapat na pag-aarmas sa lumalaking pwersa ng hukbong bayan, pangunahin na sa pamamagitan ng mga taktikal na opensiba.
• Isaayos ang laking-platung saligang pormasyon ng BHB, ang lakas-kumpanyang pwersa sa bawat larangang gerilya, ang karampatang bertikalisasyon at ang sistema ng relatibong konsentrasyon at dispersal, upang maging mas epektibo sa pagdedepensa laban sa kaaway, pagpapatupad ng mga gawaing pampulitika at paglulunsad ng mga taktikal na opensiba.
• Isaayos ang iba�t ibang gawaing pampulitika sa hanay ng mga reaksyunaryong sandatahang pwersa.
• Determinado at matatag na pasiglahin ang mga taktikal na opensiba, laluna yaong mga may malaking kahalagahan sa pulitika at makapag-aani ng mga armas.

Inaasahan sa mga susunod na taon ang mas marami, mas madalas at mas laganap na mga taktikal na opensiba laban sa mga yunit ng AFP, PNP at paramilitar na umaatake sa rebolusyonaryong kilusan, gayundin laban sa mga may malalaking pagkakasala sa rebolusyonaryong kilusan at mamamayan.

22 Marso 2003
Edisyong Pilipino

	Editoryal: Labanan ang pananalakay ng US sa Iraq
	Sumalakay na ang halimaw
	Tutol sa gera ang sambayanang Pilipino
	Ika-34 na anibersaryo ng BHB: Sagot sa armadong interbensyon ng US
	Matatagumpay na opensiba ng BHB
	Mga Ulat Koresponsal: Bigo ang all-out war sa Panay
	Mga Ulat Koresponsal: Magigiting na Pulang kumander
	Mga Ulat Koresponsal: Mga sundalong Amerikano sa Central Panay
	Balita