Pagbabagong kaladkad Ng mahabang pagsisikap, Di simbilis ng bukadkad Ng iilang bulaklak, Lalupa't buong bayan Ang pinahahalimuyak.   Kahi' wari'y kaytagal, Di naman kasimbagal- Ng pagkahiganteng-hukluban Ng kasisibol na halaman, O ng ganap na paghuhulas Ng bundok tungong himlayan,   O ng pagkitid o paglapad Ng malaking karagatan, O ng buu-buong ikot Sa lakbay ng bulalakaw, O ng tuluyang pagdilim Ng lakas ng Haring Araw!   Lingunin ang nalagpasan, Tanawin ang kaharap; 'Wag na lamang dalasang Sa orasan ay sumulyap. Sampagitang kapuluan, Napipintong mapabusilak!