Kaybagal ng mga pangyayari Minsa'y kaybilis Sa loob ng isang, taon Naisaayos mo ang isang yunit propaganda Nadakip ka ng mga kaaway Nabimbin ng ilang buwan At nang makaalpas Kaagad kang nagtungo Sa sonang gerilya   Kayningning ng tala ng rebolusyon Sa iyong katauhan   Sa makupad kumilos "Nagmamadali ang panahon" wika mo Sa madaling panghinaan ng loob "Simulan ang unang hakbang" Sa nalulunod sa sarili "Umahon na't lumubog sa masa" Sa nag-uurung-sulong sa landas na tatahakin "Ipukol ang paningin Sa abot-tanaw mo Hanggang doon sa kabilang ibayo Kaylinaw ng landas na ating malilikha Halika"   Ilang araw, Ilang gabi Ang nagdilim sa sigabo ng talakayan Ang di nakahinga sa usok ng sigarilyo't Pagkawasak ng maraming maliliit na daigdig Ilang araw, Ilang gabi Ang kaytatag na naghintay Upang ang bawat salita'y maging talang Sumisinag sa bawat sulok ng isang silid   Ilang araw, Ilang gabi Ang sa wakas ay nagsabog ng liwanag Upang sa malawak na daigdig Ay malantad ang landas Na dapat nang hawanin Ilang araw, Hang gabi Bago mabuo ang isang hakbang   "Mula sa isang hakbang Tayo ay kikilos Tungo sa kasaysayan!"   Kaisa ka na ng masa ngayon Sa kanayunan Isang gerilyero Kaniig mo ngayo'y manggagawa't magsasaka Sa mga pilapil at gubat ng pag-aalsa   "Lutasin mo ang iyong suliranin At tanggapin ang bagong tungkulin Halika"   Naroon sa mga liblib na pook Ang diklap ng pagbabangon Sa masukal na landas Ang landas ng paglaya Sa bisig ng masa Ang bigwas ng tagumpay!   "Halika Dito sa kasaysayan Dito sa kasaysayan Tayo magkita!"   Kayningning ng tala ng rebolusyon Sa iyong katauhan