Pagbubuksan ka ng pinto, Pulang mandirigma, Patutuluyin ka Sa abung-abung na may init pa ng saleng. Nakabalabal sa Kaigorotan ang lamig ng gabi Sa paanang bundok na ito ng Gran Cordillera. Nakaugat sa mga bato ang pino, kamote At palay sa payaw. Ilang buwan lamang Ang itatagal ng ani sa agamang. Hindi araw-araw ay may larnan ang gimata Mula sa kaingin, o ang patibong sa gubat Para sa usa't baboy-ramo. Bato at bato Ang daang patungo sa bawat pintuan Ng bagong sonang ito, nagbubukas sa tawag Ng ama't kapatid ng mga katutubo. Nagtitipun-tipon sa dap-ay ang mga katutubo, Nakapaligid sa liwanag at init ng saleng Habang nagtatanod ang mga pino Na ngayo'y inaangkin ng naghaharing-uri. May sagitsit ng apoy sa ginaw ng gabi, May talsik ng liwanag sa gatilyo ng M-16, May bagong saleng na nagliliyab Sa pagkakaisa ng mga katutubo't Pulang mandirigma.   Pagbubuksan ka ng pinto, patutuluyin ka Sa abung-abung na lalaging may saleng.