Balita
4 na armas nasamsam sa mga ambus sa Western Mindanao
Apat na riple ang nasamsam ng Bagong Hukbong Bayan sa Western Mindanao sa dalawang ambus na inilunsad nito noong Mayo 11. Ayon sa ulat-koresponsal mula sa rehiyon, apat na elemento rin ng kaaway ang napatay sa mga opensibang ito.
Sa Tinuyop, Leon B. Postigo, Zamboanga del Norte, nakakumpiska ng tatlong M14 ang mga gerilya ng Front Feliciano-A ng BHB nang tambangan nila noong Mayo 11 ang mga nagpapatrulyang sundalo na nagmula sa Barangay Sipakong ng naturang munisipalidad. Tatlong elemento ng CAFGU ang namatay sa labanan.
Noong araw ding iyon, sa Concepcion, Misamis Occidental, inambus ng BHB sa Front Monterosa District I ang 12 armadong maton na nagwala nang manalong alkalde ng Concepcion ang kanilang amo na si ex-Col. Benjamin Pilota. Isang karbin ang nakumpiska mula sa napatay na elemento ng CAFGU na kabilang sa private army ni Pilota.
Presyo ng langis, muling itinaas
Muling itinaas ang presyo ng langis nitong Mayo 18. Tumaas nang P1 kada litro ang presyo ng gasolina at krudo at P1 kada kilo ang liquefied petroleum gas (LPG). Ayon sa mga kumpanya ng langis, tataas pang muli ang presyo ng mga produktong petrolyo pagsapit ng Hunyo.
Mula nang ipatupad ng reaksyunaryong gubyerno ang deregulasyon sa industriya ng langis noong Abril 1996, mahigit 250% na ang itinaas ng presyo ng mga produktong petrolyo. Nitong huling mga buwan lamang, aabot na sa P5 ang itinaas ng presyo ng langis. Dahil sa deregulasyon, walang renda ang panghuhuthot ng mga dayuhang kumpanya ng langis ng papalaking tubo mula sa mamamayan.
Mga Palestinong refugee minasaker ng Israel
Isang malawakang masaker ng mga Palestino sa mga refugee camp (kampo ng mga bakwet) sa Rafah, Nusseirat at al-Bureij sa Gaza Strip ang isinagawa ng Israeli Defense Forces noong Mayo 18-20. Ito na ang pinakamabagsik na masaker ng mga Palestino sa loob ng isang taon.
Pinagbabaril ng mga Israeli ang 3,000 Palestinong nagpoprotesta sa demolisyon ng Israel sa kanilang mga bahay. Nagsikap lumaban ang mga Palestino gamit lamang ang mga riple, granada at bato. Napatay ang 41 Palestino, na pawang mga bata at kabataan, at nasugatan ang mahigit 80 pa nang ilunsad ng Israel ang �Operation Rainbow� na kinatangian ng pagdemolis sa daan-daang mga bahay, pagwasak ng mga kalsada at pagpapalikas ng mga tao sa Rafah. Umabot nang 1,600 ang nawalan ng tirahan.
Ang mga demolisyon ay isinagawa dahil ang lugar umano ay basehan at armori ng mga teroristang Palestino.
Ang pagwasak sa mga bahay at imprastruktura, na sinabayan ng walang habas na pagpapaputok ng mga missile mula sa mga tangke at helikopter, ay mariing kinundena ng mga Palestino at mamamayan ng daigdig. Itinuring ito ng mga pinuno ng United Nations na mabigat na krimen sa digmaan at matinding paglabag sa pandaigdigang makataong batas. Nagpasa ng resolusyon ang UN Security Council noong Mayo 19 na nananawagan sa Israel na itigil ang mga demolisyon at tumalima sa internasyunal na batas. Tulad ng dati, ang US ang tanging hindi pumirma sa resolusyon.
Samantala, sinabi ng mga militanteng Palestino na lalo lamang pinatatag ng karumal-dumal na masaker ang kapasyahan ng mamamayang Palestino na lumaban at nangako silang ipagpapatuloy ang paghihimagsik hanggat di sila nakalalaya mula sa pananakop at pang-aapi ng Israel.
Pagtutuwid
Ayon sa pinakahuling mga ulat mula sa Leonardo Panaligan Command ng BHB-Negros, dalawang .45 pistola at hindi isa ang nasamsam mula sa reyd sa isang police outpost sa Sityo Inayawan, Barangay Masulog, Canlaon City. Ayon din sa ulat, isang apat-kataong commando team ng BHB ang nagsagawa ng walang-putok na reyd at hindi isang 15-kataong yunit. Madaling araw ng Mayo 5 isinagawa ang reyd, at hindi umaga ng Mayo 6, tulad ng naiulat sa isyung Mayo 7 ng AB. Humihingi ng paumanhin ang patnugutan ng AB sa mga pagkakamaling ito.
![](../../angbayan/images/textend3.gif)
|