Hinggil sa "mga reporma" ng rehimeng US-Macapagal-Arroyo:
Mga kagyat na kahilingan ng mamamayan

Read this article in English

Nagdaos ng People's Summit (Kataastaasang Kapulungan ng Mamamayan) ang iba't ibang militante at progresibong organisasyong masa para tasahin ang kalagayan ng bayan at tukuyin at pagkaisahan ang igigiit na kahilingan ng masang naghihirap. Ginanap ang patitipon noong Hulyo 19, 2001 sa Film Center, UP Diliman, Quezon City. Ang deklarasyong pinagtibay rito ay inihapag sa pagbubukas ng ika-12 Kongreso para itapat sa state of the nation address ni Macapagal-Arroyo.

Isang mainam na bagay ang pangkalahatang deklarasyong binuo ng People's Summit. Malinaw na tinukoy nito ang mga mahigpit na kinakailangang ipaglaban ng mamamayan para sa kanilang kagyat na benepisyo at panimulang lunas sa harap ng mga hagupit ng umiiral na sistemang panlipunan at dala-dala nitong krisis. Ang mga ito ang lalamnin ng mga pang-araw-araw na laban ng mamamayan. Mahalagang maiugnay ang mga pang-araw-araw na laban sa mga estratehikong usapin na nilalaman ng pangmatagalang laban ng mamamayan.

Sa anim na buwang nakalipas, tuluy-tuloy ang pagbulusok ng ekonomya. Tumataas ang presyo ng mga serbisyo't bilihin habang bumabagsak ang halaga ng sahod. Tulad ng mga naunang gubyerno, itinataguyod ng pamahalaang Macapagal-Arroyo ang mga patakaran ng imperyalistang globalisasyon na nagdudulot ng napakalaking pinsala sa ating bayan. Sa halip na itakwil, ipinagpapatuloy pa nito ang mga bigo at kontra-mamamayang patakaran ng liberalisasyon, deregulasyon at pribatisasyon. Inuuna nito ang interes ng dayuhang monopolyo kapital, mga dambuhalang negosyong lokal at malalaking panginoong maylupa bago ang interes ng mga manggagawa, magsasaka at iba pang inaapi at pinagsasamantalahang uri.

Walang makabuluhang repormang pang-ekonomya ang bagong pamahalaan. Wala itong maibigay na kahit kagyat o pansamantalang lunas man lamang sa kahirapan ng mamamayan. Sa halip, pinagkakaabalahan nito ang mga pakitang-taong hakbang na naglalayong makabig ang suporta ng mga maka-Erap sa masa.

Ang matinding karukhaan ng masa ay pinabibigat pa ng kawalan ng hustisya at tuluy-tuloy na paglabag sa mga karapatang-tao. Halos ipagbawal na ang welga at pagtatayo ng mga unyon sa mga pabrika. Bagamat wala na raw ang patakarang "todo-gera" ng rehimeng Estrada, nagpapatuloy sa buong kapuluan ang militarisasyon at mga opensibang militar na labis na sumasalanta sa masa laluna sa kanayunan. Mistulang pinaiiral ang batas militar sa Timog Mindanao sa ngalan ng pagpuksa sa Grupong Abu Sayyaf.

Samantala, malabo pang makamit ang katarungan sa mga kasong kriminal laban kina Estrada at kanyang mga kakutsaba. Nakaba-bahala ang mga senyales ng maniobra at pakikipagkompromiso sa kasong ito. Kailangan ding pag-ibayuhin ang pag-uusig sa kaso ng ill-gotten wealth (nakaw na yaman) ng mga Marcos at ng kanilang mga kroni at ng mga paglabag sa karapatang-tao sa panahon ng diktadura.

Tunay ngang hindi pa nakakamit ang lubos na katarungan at pagbabago na inaasam sa People Power 2. Kailangan pang pag-ibayuhin ang militante at sama-samang pagkilos para sa mga kagyat at pangmatagalang interes ng sambayanan. Kailangang ipaalala sa pamahalaang Macapagal-Arroyo ang malaking pananagutan nito sa taumbayan.

Kung gayon, sa bisa ng PEOPLE'S SUMMIT, isusulong ang sumusunod na kahilingan ng mamamayan:

1) Mga kagyat na hakbang para sa kaluwagan ng masang naghihirap:

 P125 across-the-board na dagdag sa sahod ng mga pribadong manggagawa

 P3000 across-the-board na dagdag sa sweldo ng mga kawani ng gubyerno

 pagkontrol sa presyo ng mga pangunahing bilihin at serbisyo

 pagtigil sa lahat ng demolisyon, paglulunsad ng on-site relocation at programang pangkabuhayan sa mga maralitang-lunsod

 paghinto ng lahat ng pagpapalit-gamit ng lupang sakahan at pagtigil sa pagpapalikas ng mga magsasaka

 pagkilala sa karapatan ng pambansang minorya sa lupang ninuno

 pagtigil sa liberalisasyon ng kalakalan sa mga produktong agrikultural

 pagtigil sa mga di-makatarungang singil sa mga migranteng Pilipino

 pagtigil sa pagbabayad ng mga di-makatarungang utang panlabas at pagtigil sa awtomatikong paglalaan ng pondo na pambayad-utang

 pagdagdag ng pondo para sa batayang serbisyong panlipunan tulad ng edukasyon, pabahay at kalusugan

2) Pagtigil sa pagsasaprobado ng NAPOCOR, NFA, SSS at iba pang ahensya at mga serbisyong pampubliko laluna ang mga pampublikong ospital

3) Mabilis na paglilitis sa dating pangulong Estrada at mga kakutsaba sa kasong plunder na may "Full Media Coverage"

4) Pagtataguyod at pagtatanggol sa mga karapatang pangtao

 pagtigil sa militarisasyon sa kanayunan

 pagpapalaya sa lahat ng bilanggong pulitikal

 indemnipikasyon ng mga biktima ng paglabag ng karapatang pantao sa panahon ng batas-militar

 pagpapawalang-bisa sa mga mapanupil na batas

 pagpapatupad ng CARHRIHL, laluna ang pagbubuo at pagpapaandar sa Joint Monitoring Committee

 pagtigil sa mga opensibang militar laban sa mamamayang Moro at lansakang paglabag sa mga karapatang-tao at sa Internasyunal na Makataong Batas

 paggawad ng hustisya at serbisyong ligal para sa mga migranteng bilanggo

Agosto 2001
Edisyong Pilipino

	Editoryal: Ilantad at labanan ang mga maka-imperyalista at anti-mahirap na "reporma" ng rehimeng US-Macapagal Arroyo
	Hinggil sa "mga reporma" ng rehimeng US-Macapagal-Arroyo: Patuloy na paglala ng krisis pang-ekonomya sa bansa
	Hinggil sa "mga reporma" ng rehimeng US-Macapagal-Arroyo: Matinding tama ng krisis sa mamamayan
	Hinggil sa "mga reporma" ng rehimeng US-Macapagal-Arroyo: Mga kagyat na kahilingan ng mamamayan
	Pribatisasyon ng Social Security System, patuloy na nilalabanan
	Mula sa koresponsal: Mga operasyong militar sa Kabikulan, kinundena
	Mga balita ng pakikibaka
	Kasamang Antonio Zumel, pinarangalan