Sa Silangang Kabisayaan:
Mahusay na pamumuno ng Partido sa lokalidad

Read this article in English

Buhay na buhay ang proletaryong pamumuno at diwa ng tunay na demokrasya at rebolusyonaryong pagbabago sa lipunan sa mga lugar na maunlad na ang mga sangay ng Partido sa lokalidad at nakatatayo na ang mga ito sa sarili. Dito'y damang-dama ang pamumuno ng Partido at ng pamunuan ng mga samahang masa sa talas ng mga panawagan at sigla ng tugon sa mga ito ng taumbaryo.

Ganito ang kalagayan sa isang baryo sa Samar na mahigit 20 taon nang kinikilusan ng BHB at nasasakop na ngayon ng Pulang kapangyarihan ng mamamayan. Dalawang dekada nang nakatayo ang sangay ng Partido sa baryo.

Mataas ang antas na inabot ng pag-oorganisa sa baryo. Dalawang dekada nang may nakatayong mga ganap na samahang masa. Halos lahat ng maralita at mababang panggitnang magsasaka ay nakapaloob na sa mga samahang masa. Aanim katao na lamang ang hindi pa naoorganisa sa baryo, at ito'y dahil lamang sa sila'y mga bagong dating sa lugar at pinalalalim pa ang pagkakakilala sa kanila. Ang mga panggitnang pwersa, kabilang ang mayayamang magsasaka, mga kagawad ng sangguniang barangay at iba pa ay organisado na rin sa rebolusyonaryong kilusang lihim.

Sa inabot na nitong antas, matalas na naitatakda ng Partido sa lokalidad ang wastong linyang pampulitika at angkop na paraan ng pagkilos sa mga pakikibakang masa. Nakakamit ito dahil na rin sa pagsisikap na konsultahin at kamtin ang pagkakaisa ng lahat ng tagabaryo para sumuporta sa mga panawagan. Ang kahusayan ng pamumuno ng sangay at organisasyong masa ay nakabatay sa mapanuri, napapanahon at mapagpasyang pagtugon sa mga pangangailangan at mga araba o hinaing ng mamamayan. Sa ganitong paraan, natitiyak ang mainit na pagtugon ng mamamayan sa mga panawagan sa rebolusyong agraryo at iba pang pakikibakang masa.

Napakalaki na ng natatamong benepisyo ng mga taumbaryo sa pagsusulong ng mga pakikibakang agraryo sa pamumuno ng Partido. Dahil sa pag-unlad ng kabuhayan ng masang magsasaka, lumiit ang pangangailangang mangutang. Halos pawi na ang usura sa baryo.

Sa mga pagkakataong nagigipit ang ilang mga mahirap na magsasaka, laluna sa pangangailangan para sa pangkonsumong palay, nahihikayat ang mga mayamang magsasaka na magpahiram ng palay na halos walang interes.

Nasa proseso rin ang rebolusyonaryong kilusan sa baryo ng pagsisinop ng kampanya para pababain ang presyo ng mga paninda. Sa kasalukuyan, nakaprogramang isaayos ang mga patakarang magbabalanse ng tamang presyo ng mga bilihin at sapat na tubo para sa mga may-ari ng tindahan.

Ang pagbabalangkas ng mga kampanya at pakikibakang masa ay masalimuot na proseso ng pag-alam at pagsusuri sa kongkretong kalagayan ng mamamayan, masisiglang konsultasyon at pagbubuo ng mahigpit na pagkakaisa.

Karaniwang nagpapaabot ng pangkalahatang panawagan ang komiteng seksyon ng Partido na kinabibilangan ng komiteng tagapagpaganap ng sangay sa yunit ng BHB at ng mga kalihim ng mga sangay ng Partido sa magkakaratig na baryo. Ang pagpipino o anumang pagbabago sa plano at ang aktwal na paraan ng pagpapatupad ng panawagan ng seksyon ay binabalangkas na ng sangay sa baryo.

Unang hakbang ng sangay ang pagkonsulta sa komiteng tagapagpaganap ng mga balangay ng PKM, MAKIBAKA at KM sa baryo. Batay sa mga datos at pagtinging inilalabas ng mga ito, masusing pinag-aaralan ng sangay kung angkop nga ba ang mga panawagan sa aktwal na kalagayan sa baryo.

Sa yugtong ito, karaniwang ipinapaabot ng sangay sa komiteng seksyon kung may mga kinakailangang susog sa panawagan batay sa resulta ng mga konsultasyon. Tinatalakay ng komiteng seksyon at kadalasa'y ipinapaloob na rin sa pangkalahatang plano ang mga susog ng sangay.

Susunod na hakbang ang paghaharap ng binalangkas na plano sa komiteng balangay ng mga samahang masa para pinuhin pa at pagkaisahan. Dito na rin binabalangkas ang aktwal na mga taktikang gagamitin, kabilang na ang mga pamamaraan kung paano makakamit ang pagkakaisa ng buong kasapian ng mga samahang masa at ang pakikipagkaisa ng sangguniang barangay. Ang pinakahuling hakbang ay ang pagpapatawag ng asembliya ng taumbaryo para pormal na pagkaisahan at pagtibayin ang mga bagong patakaran at mga kaakibat na plano.

Sa pagsusulong ng rebolusyong agraryo sa baryo, demokratikong konsultasyon ang paraan ng pagkakamit ng mga kahilingan dahil mga panggitnang pwersa ang hihilingan at karamihan sa kanila'y mga alyado rin. Malaon nang napalayas ang dating despotikong panginoong maylupa sa baryo. Ang mga mayaman at panggitnang magsasaka na nagpapautang, umuupa ng lakas-paggawa at nagmamay-ari ng mga tindahan ay kaibigan ng rebolusyonaryong kilusan at gayo'y hindi ginagamitan ng antagonistikong pamamaraan sa mga pakikibakang agraryo.

Sa buong prosesong ito ay hindi nawawala ang banggaan ng mga ideya. Sa mga panawagan hinggil sa pagpapataas ng sahod ng mga manggagawang bukid, halimbawa, may mga pagkakataong bantulot o tumututol din ang mayayamang magsasaka kaya't nagkakaroon ng palitan ng mga katwiran. Ang pagpapahayag ng iba't ibang pananaw ay pinadadaloy sa mga talakayan ng mga grupo di lamang sa loob ng mga ganap na samahang masa ng magsasaka kundi pati sa mga grupo ng panggitnang pwersa at iba pa. Sa mga ito'y binabalik-aralan ang ilang bahagi ng Rebolusyonaryong Gabay sa Reporma sa Lupa bilang balangkas ng kampanya at binibigyang-pansin ang mga batayan ng mga panawagan.

Sa mga kampanya para pataasin ang sahod ng mga manggagawang bukid o ang presyo ng produkto ng mga magsasaka, sinusuri ang mga kantitatibong batayan para sa panawagan. Para maging malinaw, ginagawang halimbawa ang kaso ng tipikal na pamilyang magsasaka, ang kanilang kita at gastos. Ipinakikita rin ang kasalukuyang kabuuang kita, gastos at netong kita ng mayayamang magsasaka at ang tinatayang rasonable lamang na mababawas rito kapag naipatupad ang panawagan. Ito'y para mapasubalian ang argumentong mawawalan na ng tubo ang mayayamang magsasaka kung itataas ang sahod. Inililinaw na ang mga kwenta ay batay lahat sa kasalukuyang mga presyo at tinitiyak din na may rasonable pa ring kikitain ang mayamang magsasaka at hindi lagpas sa kanyang kakayahan ang hinihinging umento. Sa ngayon, tinitiyak ng Partido at rebolusyonaryong kilusan na huwag mapawi ang saray ng mayamang magsasaka sa baryo dahil may mahalagang papel pa rin sila sa kabuhayan ng mga magsasaka.

Sa abot ng makakaya, sinisikap na mabuo ang konsensus ng mamamayan. Kung hanggang sa asembliya ng mga taumbaryo ay hindi pa rin maabot ang konsensus, idinadaan sa botohan ang usapin. Ang pagtalima ng lahat sa kapasyahan ng mayorya ay bunga ng mga pampulitikang edukasyon na ibinibigay ng rebolusyonaryong kilusan bukod sa lakas ng impluwensya at taas ng prestihiyo ng Partido at BHB sa lugar.

Para matupad ang mga kaisahan at mapangalagaan ang kapakanan ng mga maralita, mahigpit ang pagsubaybay ng sangay at mga samahang masa sa implementasyon.

Dahil sa husay ng pamumuno ng sangay at higpit ng pagkakaisa ng mga taumbaryo, ang mga desisyon at patakaran sa lugar ay sinusunod maging ng mga dayo. Halimbawa, may isang mayamang magsasaka mula sa ibang baryo na nakabili ng lupa sa lugar at nagpatupad ng lumang antas ng pasahod. Matatag subalit magalang siyang hinarap ng mga magsasaka para paliwanagan tungkol sa inabot nang kaisahan sa baryo hinggil sa pasahod. Tumalima rito ang mayamang magsasaka.

07 Setyembre 2003
Edisyong Pilipino

	Editoryal: Paigtingin ang mga pakikibakang bayan para ibagsak ang rehimeng US-Arroyo
	Away ng mga magnanakaw: Mga nakaw na yaman ng mga Arroyo, ibinunyag ni Lacson
	Matatagumpay na opensiba ng BHB: 22 armas, nasamsam ng BHB sa mga reyd at ambus
	Mga sundalo ng AFP, hinihikayat na sumanib sa rebolusyonaryong kilusan
	Mga tropa ng AFP, CAFGU sa Agusan del Sur, sumanib sa BHB
	Sa Silangang Kabisayaan: Mahusay na pamumuno ng Partido sa lokalidad
	Mula sa hanay ng mga kabataang estudyante: Si Ka Leo sa kanayunan
	Sa Ibayong Dagat: Lumalaganap ang armadong paglaban ng mga Iraqi
	Balita