Ang propagandang anti-BHB ng AFP
Ang wasto, makatarungan at lehitimong rebolusyonaryong gawain ng BHB ay pilit na binabaluktot ng AFP at reaksyunaryong estado upang dungisan ang mataas na prestihiyo ng BHB, palabasing ito ay simpleng kriminal at "teroristang" organisasyon at pagtakpan ang sariling masamang reputasyon. Bahagi ito ng kabuuang kontra-rebolusyonaryong gawi ng kaaway at ng kanilang paghahanda para sa mas masahol pang armadong panghihimasok ng mga pwersang US sa bansa laban sa BHB. Pinagtuunan nila ngayon ang sumusunod na mga tema ng paninira sa BHB:
"REKRUTMENT NG MGA BATA". Pinararatangan ng AFP ang BHB na malawakang nagrerekrut ng mga bata. Ang ilang nadarakip nila sa kanayunan na mga batang nasa mga grupong pansuporta ng rebolusyonaryong kilusan at kahit mga sibilyang bata ay pinalalabas nilang kombatant ng BHB. Ang mga napapasakamay ng AFP ay ginagamit na pambala sa propaganda nito, labag sa kanilang kagustuhan at mga karapatan bilang bata. Bilang paglilinaw, muling inilabas ng Partido noong 1998 ang patakaran ng minimum na edad na 18 taong gulang para sa mga sasapi sa BHB.
"EKSTORSYON". Ang lehitimong patakaran ng rebolusyonaryong pagbubuwis sa mga kaaway sa uri sa mga teritoryong saklaw ng kapangyarihang pampulitika ng rebolusyonaryong kilusan ay pakutyang tinatawag ng AFP na "ekstorsyon" o simpleng kriminal na pangingikil. Sa maraming pagkakataon, tulad ng ginagawa ng 17th at 50th IB sa Ilocos at Cordillera, ginagamit ng AFP ang pangalan ng BHB sa pagpapadala ng mga huwad na sulat, gamit ang magaspang na lenggwahe at pananakot sa mga negosyante upang magalit sila sa BHB. Kapag naloko ang negosyanteng sinulatan, ibinubulsa ng mismong mga upisyal militar ang mga nakikil na pera.
"KANGAROO COURT". Ang hukumang bayan ay tinatawag ng AFP na "kangaroo court", isang pakutyang termino na nagsasabing ang sistemang pangkatarungan na ipinatutupad ng rebolusyonaryong kilusan ay arbitraryo, padalusdalos at pakitang-tao lamang. Taliwas ito sa katotohanang ang bawat kaso ay masusing pinag-aaralan, dinidinig, hinahatulan at nirerepaso ayon sa mga prinsipyo sa pagpapatupad ng rebolusyonaryong hustisya. Bukod sa paninira sa rebolusyonaryong kilusan, layunin din nitong tabingan ang bulok at inutil na sistema ng hustisya sa bansa na pabor sa mga naghaharing uri at nang-aapi sa mga mahihirap, at gayundin upang ikubli ang napakaraming mga kaso ng pagsalbeyds at kara-karakang pagpatay ng mga militar at "alagad ng batas" sa mga sibilyan nang hindi na dumaraan sa anumang proseso.
"ASASINASYONG PULITIKAL". Ang pagpataw ng rebolusyonaryong katarungan sa ilang sagadsaring reaksyunaryong napatunayan ng mga hukumang bayan na may utang na dugo sa rebolusyonaryong kilusan at sa mamamayan ay pakutyang tinatawag na "asasinasyong pulitikal". Pinalalabas na ang mga pinarusahang pasista at berdugo tulad ni Col. Rodolfo Aguinaldo ay mga "simpleng pulitiko".
"KIDNAP-FOR-RANSOM". Para palabasing mga "terorista" ang BHB, pilit na pinalalabas ng AFP na nagsasagawa ito ng mga kidnap-for-ransom. Hindi na sikreto sa nakararaming mamamayan na ang nagsasagawa at nagbibigay-proteksyon sa mga grupong nagsasagawa nito--tulad ng Abu Sayyaf--ay nasa loob ng AFP at PNP at wala sa rebolusyonaryong kilusan.
![](../../angbayan/images/textend3.gif)
|