Sumusulong:
Sa Silangang Kabisayaan

Matagumpay na idinaos noong Marso ang panrehiyong kumperensya ng Partido sa Silangang Kabisayaan. Ayon sa Larab, ang pahayagang masa sa rehiyon, ang kumperensya na tumagal nang 14 na araw ay dinaluhan ng 45 delegado at 11 tagamasid. Ang mga nagsidalo ay mula sa mga namumunong organo at mga kadreng panrehiyon na kumakatawan sa 14 na mayor na linya ng gawain.

Inaprubahan ng kumperensya ang panrehiyong panlipunang pagsisiyasat at pagsusuri sa uri at ang tatlong-taong programa ng Partido sa Silangang Kabisayaan. Inihalal din ang bagong komiteng panrehiyon.

Bunga ng kumperensya, taglay ng Partido sa rehiyon ang mas mataas na antas ng konsolidasyon sa ideolohiya, pulitika at organisasyon. Pinakamahalaga rito ang konsolidasyon sa ideolohiya ng buong organisasyon ng Partido sa Silangang Kabisayaan sa batayan ng Marxismo-Leninismo-Maoismo at sa linya ng demokratikong rebolusyon ng bayan sa pamamagitan ng matagalang digmang bayan. Anang Larab, dahil sa matibay na pagkakaisang ito, handa ang pamunuan at kasapian ng Partido sa Silangang Kabisayaan na harapin ang mas mabibigat na gawain at mas malalaking laban. Taglay nila ang mataas na antas ng rebolusyonaryong optimismo�ang taimtim na paninindigang isulong ang rebolusyon sa mas mataas na antas upang kamtin ang ibayo pang tagumpay.

Patunay ng patuloy na pag-unlad ng rebolusyonaryong kilusan sa rehiyon ang serye ng matatagumpay na opensiba sa armadong pakikibaka at kilusang masa:

Marso 22. Namula ang mga pader at gusali sa lunsod ng Tacloban nang ipininta ng mga kasapi ng Kabataang Makabayan (KM) ang mga islogang "Isulong ang Rebolusyon" at "Kabataan, Sumapi sa Digmang Bayan".

Marso 14. Isang elemento ng Citizens' Armed Forces Geographical Unit (CAFGU) ang sumuko sa Bagong Hukbong Bayan (BHB) sa Barangay Gihulgan, Pambujan, Northern Samar. Si Romeo Morado, isang CAFGU sa ilalim ng 19th IB ay sumuko matapos niyang patayin si Edner Cabides, isang abusadong CAFGU na may utang na dugo sa rebolusyonaryong kilusan. Isinuko rin ni Morado sa mga Pulang mandirigma ang dalawang M14, limang magasin at 62 bala.

Marso 9. Dalawang sundalo ng 19th IB ang pinarusahan sa isang operasyong isparo na isinagawa ng mga magsasakang kasapi ng milisyang bayan. Dalawang M16 ang nakumpiska sa taktikal na opensibang ginanap sa Barangay Cabatuan, Palapag, Northern Samar.

Pebrero. Isang elemento ng Maritime Police ang inagawan ng pistolang .45 ng mga magsasakang kasapi ng rebolusyonaryong organisasyong masa sa Salvacion, San Isidro, Northern Samar. Agad na ibinigay ang .45 sa mga Pulang mandirigma.

Disyembre 1998. Dinisarmahan ng BHB ang ilang masasamang elemento sa Barangay Happy Valley, San Isidro, Northern Samar. Isang .357 at dalawang .38 ang kinumpiska mula sa kanila.

Sa huling bahagi rin ng 1998, matagumpay na inilunsad ng milisyang bayan sa Las Navas at Catubig, Northern Samar ang "Operation Bawi" laban sa mga mangangalabaw sa baryo. Limang ninakaw na kalabaw ang nabawi at naibalik sa mga may-ari.

Matagumpay ding idinaos noong Disyembre 26- 31 ang isang kampanyang propaganda sa mga sonang gerilya sa Can-avid, Eastern Samar. Sa serye ng mga pulong masa na inilunsad sa tulong ng milisyang bayan, mahigit 600 magbubukid mula sa apat na baryo at sityo ang nanood ng pelikulang "Resurgence" (Muling Pagsulong). Ang pelikula na produksyon ng National Democratic Front ay naglalarawan ng muling pagbangon ng rebolusyonaryong kilusan sa gabay ng Ikalawang Dakilang Kilusang Pagwawasto. Lubos itong ikinagalak ng masa sa mga baryong binabalikan ng BHB dahil nakita nilang matatag pa ring sumusulong ang rebolusyonaryong kilusan.

Nobyembre-Disyembre 1998. Mahigit 500 manggagawang bukid mula sa 18 baryo sa Northern Samar ang naglunsad ng matagumpay na antipyudal na pagkilos. Sa pamamagitan ng sama-samang pagkilos, naigiit ng mga magsasaka sa panginoong maylupa na umentuhan ang kanilang sahod nang P10 (mula P25-P30 hanggang P35-P40 bawat araw).

Samantala, ibayong napaghusay ng mga Pulang mandirigma sa Silangang Kabisayaan ang kanilang kakayahang magsulong ng pakikidigmang gerilya nang maglunsad ng serye ng mga kurso sa pagsasanay sa gawain sa pulitika at militar. Bago natapos ang taon, 79 treyni mula sa dalawang larangang gerilya sa Samar ang dumalo sa dalawang magkasunod na pagsasanay. Kabilang dito ang isang iskwad ng milisyang bayan. Sa Southern Leyte, 39 na Pulang mandirigma rin ang nagsanay noong Setyembre.

Ang lahat ng ito ay hakbang pasulong para sa rebolusyonaryong kilusan di lamang sa Silangang Kabisayaan kundi sa buong kapuluan.

00 Mayo 1999
Edisyong Pilipino

	Editoryal: Pagkaisahin ang mamamayan, labanan at gapiin ang pasistang kampanya ng rehimeng Estrada!
	Desisyon na pormal na kilanlin ang de facto nang terminasyon ng gubyernong Estrada sa negosasyong pangkapayapaan sa pagitan ng GRP at NDFP
	Taktikal na opensiba ng BHB laban sa panrehiyong kampo ng pulisya sa Bohol: 84 na armas, nasamsam ng BHB
	Mga Pahayag
	Patraydor na pag-aresto kay Vicente Ladlad, kinundena ng PKP
	Isa pang taong krisis at paghihirap... Paghuhubad sa lumalagong estadistika ng gubyerno
	Isa pang taong krisis at paghihirap... Pagsusuri sa ekonomya: lagpas sa usapin ng estadistika
	Isa pang taong krisis at paghihirap... Ipaglaban ang kagalingang pang-ekonomya ng mamamayan!
	Bangayang Lastimoso-Lacson: Away ng mga sindikatong kriminal sa PNP
	Ang maralitang-lunsod: Lugmok sa kahirapan
	Laban ng maralitang-lunsod, laban ng uring manggagawa
	Kalayaan ng mamamayang Timores: Patuloy ang laban sa East Timor
	Sumusulong: Sa Cagayan-Apayao
	Sumusulong: Sa Silangang Kabisayaan
	Ubos kayang labanan ang VFA!
	Pahayag hinggil sa Visiting Forces Agreement
	Balita