Mga Ulat Koresponsal:
Pagtutol ng mamamayan sa SOT sa Cordillera

Read this article in English

Ang pagsasagawa ng mga operasyong "kontra-insureksyon" ng mersenaryong militar sa pamamagitan ng mga Special Operations Team (SOT) ay pilit na paggaya ng AFP sa mga Sandatahang Yunit Pampropaganda (SYP) ng Bagong Hukbong Bayan. Liban sa paggamit ng mas maraming pwersa para dumugin ang mga pangunahing kinokonsentrahang baryo, pagdiriin sa mga aspetong militar at pagpapalaki sa papel ng mga ahensyang sibilyan sa pagpapatupad ng ilang sangkap ng saywar, walang ipinagbago sa esensya ang SOT kahit may bagong taguri ito ngayong Reengineered SOT (RSOT).

Pumapasok ang SOT sa eksena matapos ang clearing operations (paghawan), kung saan may pagtayang naitaboy na ang BHB mula sa lugar. Sumasabay sila sa pagsasagawa ng holding at consolidation operations (paghawak at pagkonsolida). Ang mga operasyon ng SOT ang bumubuo sa ikatlong bahagi ng mas masaklaw na Triad Operations (pagmaniobra o pag-atake, paniniktik at SOT). Sa isang takdang lugar, may umaalalay sa mga SOT na Maneuver Operations at Intelligence Operations.

May dalawang paraan ng pagsasagawa ng SOT ng psy-ops: sa salita at sa gawa.

Sa psy-ops sa salita, sinisiraan nila ang rebolusyonaryong kilusan. Sa kanilang mga programa sa radyo, pagpapamiting at pamimigay ng polyeto, inilalarawan nilang demonyo ang BHB. Ipinagkakalat nilang kaya walang nars at doktor na pumupunta sa baryo dahil natatakot ang mga ito sa BHB, na ang BHB ay nagpapatanim ng marijuana, nangingikil sa masa ng panustos, nagsasagawa ng mga kriminal na aksyon para magkapera at iba pang kasinungalingan.

Sa psy-ops sa gawa, naglulunsad sila ng mga CMO tulad ng mga medical mission, palaro, palabas at "pag-aaral." Sa katunayan, ang tinatawag nilang mga "pag-aaral" ay lektura ng mga upisyal militar, mga nahimok nila o nagpapanggap na rebel returnee. Sa Cordillera, kabilang sa ginagamit nilang tagabigay ng lektura ang mga elemento ng CPLA.

Walang ibang laman ang mga ito kundi paninira sa komunismo at sa BHB. Ginagaya rin nila ang kampanya sa literasi ng BHB. Nagpapalabas sila ng mga sineng mapanira sa Partido at BHB o kaya'y mga malaswang pelikula. Mayroon din silang mga dula kung saan pinalilitaw na sukdula ng sama ang BHB.

Kunwaring nagsasagawa rin sila ng panlipunang pagsisiyasat tulad ng BHB, ngunit ito'y para lamang tukuyin ang mga sumusuporta sa rebolusyonaryong kilusan. Kapag nakabuo na sila ng listahan ng mga inaakala nilang simpatisador, ilalabas nila sa mga pamiting sa baryo ang mga pangalan ng "tukoy" nilang mga "NPA supporter" at ginigipit ang mga ito, tinatakot at iniintriga.

Nagbibigay din sila ng kakarampot na pinansya para sa mga mapanlinlang na proyektong pangkabuhayan bilang suhol. Kabilang na rito ang mga proyektong kooperatiba na kadalasang pinahahawak nila sa mga oportunista at karaniwang nagiging sanhi lamang ng mga katiwalian at alitan. Partikular sa Cordillera, pinapapapel nila rito ang mga kontra-rebolusyonaryong organisasyon gaya ng Kalinga Bodong Council ng mga burukrata at pulitiko at Concerned Citizens of Abra for Good Government ng mga repormistang sosyal demokrata.

Sa mga komunidad na binodngan, nananawagan sila ng pagkakaisa at kaayusan ng mga tribo para hindi lumaganap ang gera ng mga tribo. Pero ang sinasabi nilang kaayusan at pagkakaisa ay pagbubuo ng mga barangay intelligence network (BIN) at CAFGU.

Ngunit sa kalakhan, hirap na hirap pa rin ang mga SOT na makarekrut sa mga baryo, laluna sa mga organisadong baryo. Mangilan-ngilan lamang ang mga baryong may BIN at CAFGU sa Cordillera at ang mga myembro nito'y kadalasan pang mga bataan ng mga meyor o kaya'y taga-CPLA.

Sa mga lugar na inaabot ng pagkilos ng rebolusyonaryong kilusan at pati ng hayag na demokratikong kilusang masa, malakas ang pagtutol ng mamamayan sa pagsapi sa CAFGU, pakikipagsabwatan sa militar at mga nakapipinsalang proyekto ng gubyerno at ng mga dayuhan at lokal na naghaharing uri.

Ang gawaing pampulitika sa hanay mismo ng militar ay nagbubunga na rin ng dumaraming pagtiwalag sa CAFGU at sikretong pakikipag-ugnayan at pagtulong sa BHB ng marami sa nananatili pang mga elemento ng CAFGU.

Di makuha ng mersenaryo, papet at pasistang militar ang suporta at pagkalingang inaasam nila mula sa masa. Di nila kayang linlangin ang mamamayan sa kanilang pakitang-taong pagpapabango. Di rin talaga gaanong makatagal ang kanilang pagpapanggap dahil sandali lamang ay lumalabas na ang natural na kagaspangan, pagkapasista at pagkalumpen ng mga pwersa ng AFP.

Hindi nila magaya ang BHB, laluna sa usapin ng mahusay na pakikisalamuha sa masa. Sa gayon, hindi nila makamit ang tiwala, pagmamahal at pagkandili na ibinibigay ng masa sa BHB.

Sa isang baryo sa Mt. Province, sa pamiting ay harap-harapang pinagalitan ng upisyal ng militar ang mga tao dahil ayaw ng taumbaryo na bentahan ng manok ang SOT. Bakit wala rin daw gustong maggiya sa kanila sa gubat? Ganito rin ang kaso sa marami pang baryo sa Mt. Province at Abra. Sa Galimuyod, Ilocos Sur naman, ni hindi makapagtayo ng detastment ang 50^th IB dahil sa mahigpit na pagtutol ng masa rito.

Ang malawak na pagtutol ng mamamayan ay bunga pangunahin ng masigasig na gawaing pampulitika ng mga rebolusyonaryo at demokratikong pwersa sa hanay ng mga magsasaka at mga pambansang minorya at dahil na rin sa mahabang karanasan ng mamamayan sa pang-aapi at sa paglaban nila rito.

Sa maraming lugar sa Cordillera, may mahabang kasaysayan ng malawakang pakikibaka ng mamamayan laban sa reaksyunaryong estado at mga pasista, mga mananakop at mga naghaharing uring nais mangamkan ng lupang ansestral at likas na yaman at patindihin ang pagsasamantala at pambansang pang-aapi sa mga minorya. Magigiting na halimbawa nito ang matatagumpay na paglaban sa Chico Dam, Cellophil at mga dambuhalang dayuhang kumpanya sa pagmimina. Bukod rito'y tuluy-tuloy na itinataguyod ng rebolusyonaryong kilusan at ng mga hayag na demokratikong organisasyon at alyansa ang malawakang pagkakaisa at puspusang paglaban ng mga tribo at buong mamamayan sa mga saligang problema ng bayan at sa partikular na problema ng pambansang pang-aapi.

21 Oktubre 2003
Edisyong Pilipino

	Editoryal: Hepeng imperyalista at terorista, itinakwil ng sambayanang Pilipino
	Nagliliyab na mga protesta, sumalubong kay Bush
	Bilateral na kasunduan, niluluto nina Bush at GMA
	Mga Ulat Koresponsal: Mga aral at tagumpay sa pakikibakang agraryo sa Isabela
	Mga Ulat Koresponsal: Bigo ang �Orgullo� Brigade sa Bicol
	Mga Ulat Koresponsal: Pagtutol ng mamamayan sa SOT sa Cordillera
	Mga Ulat Koresponsal: Ang kwento sa likod ng reyd sa Oras, Eastern Samar
	Usapang pangkapayapaan ng NDF at GRP, muling bubuksan
	Dalawang bagong aklat ni Ka Joema, inilunsad
	Tangkang ekstorsyon ng Malakanyang, ibinunyag ng Fraport
	Matatagumpay na opensiba ng BHB: Mga Tampok na Opensiba
	Balita