Pagpapatalsik kay Macapagal-Arroyo iginiit nitong Mayo Uno
Iginiit ng mga militanteng organisasyong manggagawa ang pagpapatalsik sa rehimeng Macapagal-Arroyo sa paggunita ng Pandaigdigang Araw ng Paggawa at pagdiriwang ng sentenaryo ng pagkakatatag ng kilusang manggagawa sa Pilipinas nitong Mayo 1. Humigit-kumulang 75,000 ang lumahok sa mga raling pinangunahan ng Kilusang Mayo Uno (KMU) at Bagong Alyansang Makabayan (BAYAN) sa buong kapuluan. Tinuligsa nila si Macapagal-Arroyo bilang pangunahing kaaway ng uring manggagawa at ng sambayanan. Idineklara ng BAYAN na ang kilos protesta sa Mayo 1 ang "simula ng katapusan" ng rehimen ni Macapagal-Arroyo.
Sa Metro Manila, umabot sa 37,000 manggagawang kaanib ng KMU ang nagtipon sa Mendiola, kabilang ang mga delegasyon mula sa Timog Katagalugan at Gitnang Luzon.
Sa Bacolod City, mga 10,000 manggagawa sa ilalim ng KMU-National Federation of Sugar Workers ang nagrali sa sentro ng lunsod.
Sa Bukidnon, 6,000 manggagawa, na karamihan ay mga nagtatrabaho sa tubuhan at myembro ng BAYAN, ang matagumpay na nagrali sa Valencia City sa kabila ng harasment sa kanila ng militar.
Sa Bikol, libu-libong manggagawa at iba pang sektor ang nagsitipon sa mga lunsod ng Naga (5,000) at Legazpi (3,000). Nakiisa sa mga manggagawa ang mga organisasyon ng magsasaka, kawani ng gubyerno, drayber at iba pa.
Sa Leyte, umabot sa 5,000 ang nagrali sa mga lunsod ng Tacloban, Ormoc at Maasin at anim pang lunsod sa isla.
Sa Cebu City, 3,000 myembro ng KMU, BAYAN at GABRIELA ang nagrali sa may Metro Gaisano junction road. Nagwelga rin nang kalahating-araw ang mga drayber ng pampublikong sasakyan.
Sa Iloilo City, may 3,000 ring kasapi ng KMU, BAYAN at ng National Priests Organization ng Iglesia Filipina Independiente ang nagtipon sa Barangay Lapuz Norte sa La Paz, kung saan itinatag noong 1929 ang militanteng Federacion Obreras de Filipinas (FOF). Pinarangalan sa rali si Jose Ma. Nava, ang tagapagtatag ng FOF.
Sa Davao City, libu-libong militanteng manggagawa ang hinarang nang tangkain nilang magmartsa patungo sa Matina campus ng University of Mindanao, kung saan nagtatalumpati si Macapagal-Arroyo sa harap ng mga lider at myembro ng mga dilawang unyon. Inilunsad nila ang kanilang pamamahayag sa kalapit na Ateneo de Davao.
Sa Baguio City, daan-daang myembro ng KMU at Cordillera People's Alliance ang naglunsad ng martsa-rali sa Session Road.
Sa Timog Katagalugan, nagrali ang daan-daang manggagawa sa Lucena City at sa may Cavite Export Processing Zone.
Sa Gitnang Luzon, nagmartsa ang mga manggagawa patungong Clark Air Base sa Pampanga.
| 
