|
|
Matatagumpay na opensiba ng BHB
6 na armas nasamsam, 6 na sundalo napatay sa ambus sa Samar
Isang M60, isang M203, dalawang M14 at dalawang M16 ang nasamsam ng mga Pulang mandirigma ng Arnulfo Ortiz Command ng BHB nang lipulin nila ang isang anim-kataong tim mula sa 62nd IB sa isang ambus sa pagitan ng Barangay Canilungan at Barangay Hindang sa Calbiga, Samar nitong Abril 8. Pabalik ang mga sundalo sa kanilang kampo matapos dumalo sa pista sa baryo sa kalagitnaan ng kanilang operasyong militar. Kabilang sa mga napatay si Lt. Williamson Tan, ang lider ng tim.
Dadawalang linggo pa lamang ang 62nd IB sa Samar nang maganap ang ambus. ito. Mahaba ang rekord nito ng mga pang-aabuso sa mamamayan noong nakatalaga pa ito sa Eastern Samar. Noong Pebrero 2004 ay pinalayas ng nagngangalit na mamamayan sa Barangay Tagaslian, Maydulong, Eastern Samar ang isang abusadong yunit ng 62nd IB matapos itong magbase nang apat na buwan sa naturang baryo. Kabilang sa ginawa nilang perwisyo sa mamamayan ang pananakot, paghahamon ng away, walang patumanggang pamamaril at ang madalas na paglalasing at pagsusugal na nakasisira sa kapayaan at kaayusan sa baryo.
Samantala, mabangis na atake sa mga sibilyan ang naging tugon ng militar sa ambus. Dalawang magsasaka ang pinaslang ng kaaway bilang ganti sa pananambang. Sinunog din ang isang bahay at iligal na ikinulong at hinaras ang tatlong magsasaka. Trenta hanggang animnapung porsyento (30-60%) na ng mga residente sa dalawang baryo ng Calbiga ang sapilitang namakwit dahil sa pandarahas ng militar.
Ayon sa National Democratic Front sa Eastern Visayas, kaiba sa BHB na umaatake lamang sa mga lehitimong target sa mga taktikal na opensiba nito, ang reaksyunaryong militar ay matingkad na lumalabag sa karapatang-tao at pandaigdigang makataong batas sa sadya at paulit-ulit nitong pang-aatake sa mga sibilyan at kanilang mga komunidad.
|
|
 21 Abril 2005
Edisyong Pilipino
|
|
Ang Bayan is the official news organ of the Communist Party of the Philippines issued by the CPP Central Committee. It provides news about the work of the Party as well as its analysis of and standpoint on current issues.
AB comes out fortnightly. It is published originally in Pilipino and translated into Bisaya, Ilokano, Waray, Hiligaynon and English.
Acrobat PDF files of AB are available online for downloading and offline reading printing. If you wish to receive copies of AB via email, click here. |
|
