Editoryal:
Paigtingin ang mga pakikibakang bayan para ibagsak ang rehimeng US-Arroyo

Read this article in English

Hinahalukay ngayon sa publiko ang malalaking kaso ng korapsyon kapwa sa Malakanyang at sa AFP na ibinunyag ng pag-aalsang militar noong Hulyo 27 at ng mga pulitikong kalaban ni Arroyo. Nahahalungkat din ang responsibilidad ng rehimeng Arroyo sa teroristang pambobomba sa Davao nitong unang bahagi ng taon, gayundin ang pinsala at salantang dulot ng militarisasyon sa kanayunan bunga ng teroristang todo-gera ni Arroyo.

Lubos na ikinagagalit ng malawak na mamamayan ang mga kaso ng malalaking katiwalian ng mag-asawang Arroyo, gayundin ng mga personaheng pinakamalalapit sa kanila, lalupa't isang pag-aalsa ng milyun-milyong mamamayang laban sa mga katiwalian ng gubyernong Estrada ang nagluklok sa rehimen.

Ginagatungan nito ang tumitinding galit ng mamamayang Pilipino sa pagkapapet at militarismo ng rehimeng Arroyo. Bunsod ng mga patakarang makadayuhan at anti-mamamayan ng papet na republika sa ilalim ng rehimeng Arroyo, lalong lumalala ang krisis sa ekonomya at ang pagkawasak ng mga pwersa sa produksyon at buhay ng masang anakpawis. Binigyang-daan nito ang papalalang interbensyong militar ng US at, sa udyok ng US, iniutos ang papatinding militarisasyon na nagreresulta sa parami nang paraming kaso ng mga paglabag sa karapatang-tao.

Sa pamumuno ng mga ligal na pwersang pambansa-demokratiko, ang mga papet at militaristang patakaran ng rehimeng US-Arroyo ay patuloy na puspusang nilalabanan ng mamamayan. Matitinding bigwas ang dinaranas ng rehimen mula sa mga pagkilos ng mga pwersang patriyotiko at demokratiko laban sa Mutual Logistics Support Agreement (MLSA) na nagbibigay-laya sa militar ng US na gamitin ang buong bansa bilang malaking base militar nito; laban sa mga Balikatan war exercises na nagbigay-daan sa mas malaganap na interbensyong militar ng US sa Pilipinas; at laban sa bulag na pagsuporta ni Arroyo sa mga gerang agresyon at okupasyon ng US sa Afghanistan at Iraq.

Gayundin, ipinoprotesta ng mamamayan ang kabiguan ng rehimeng Arroyo na pigilin ang sunud-sunod na pagtaas sa presyo ng langis, singil sa tubig at kuryente. Lalong nahihiwalay ang rehimeng Arroyo sa mga manggagawa at karaniwang kawani sa pagtanggi nitong bigyang-daan ang pagtaas ng kanilang minimum na sahod at sweldo sa harap ng tuluy-tuloy na pagtaas ng presyo ng mga saligang bilihin at serbisyo.

Sinisingil ng masang magsasaka ang rehimeng Arroyo sa kawalan ng tunay na reporma sa lupa at, masahol pa, sa rekonsentrasyon ng pag-aari ng lupa sa mga luma at bagong-tipong panginoong maylupa. Tampok dito ang pagbibigay-daan ng rehimen sa pag-aagaw ni Eduardo "Danding" Cojuangco ng ilampung libo at absolutong pagkontrol sa daanlibo pang ektaryang sakahan ng mga magsasaka na lubusang ibinaling sa kanyang plantasyon ng kamoteng kahoy. Malaki rin ang kasalanan ni Arroyo sa mga magsasaka sa pagbibigay-pahintulot sa malawakang pananalakay sa mga bukirin ng mga halamang genetically modified na magbibigay ng napakalaking tubo para sa mga dayuhang korporasyong agribisnes habang pumapatay sa mga natural na pananim ng mga magsasaka at sumisira sa kapaligiran.

Kasabay nito, ang masang magsasaka rin ang nasa unahan ng mga paglaban sa papatinding militarisasyon sa kanayunan. Sila ang pangunahing biktima ng idineklara ni Arroyo na todo-gerang nakatuon sa walang iba kundi sa masang magsasaka. Matinding galit ang sumalubong kay Arroyo sa kanyang pagsabit ng medalya kay Col. Jovito Palparan ng Mindoro � ang pinakamodelo ng terorismo ng rehimeng Arroyo.

Ang matinding krisis ay nagbubunga ng umiigting na intrigahan at banggaan sa hanay ng mga reaksyunaryo at humahantong sa ibayong karahasan, lalo't wala pang lumilitaw na may mapagpasyang lamang sa labanan sa pagkapresidente sa 2004 habang patung-patong at naglalakihan ang mga isyung paksyunal, pambansa at panlipunan na lumiligalig sa buong sambayanan. Masugid na nagpaplano ang mga reaksyunaryong oposisyon ng samu't saring maniobrahan at pakana kabilang ang pagtatangka ng mga kudeta o destabilisasyon at kahit panduduro para pagbitiwin si Arroyo sa lalong madaling panahon upang hindi niya magamit ang kanyang pusisyon upang manalo sa eleksyong 2004.

Marapat lamang na samantalahin ng Partido at ng pinamumunuan nitong mga rebolusyonaryong pwersa ang napakainam na sitwasyon sa pamamagitan ng ibayong pagpapasigla ng kilusan at mga pakikibakang masa at propaganda, higit na pagpapalawak ng rebolusyonaryong nagkakaisang prente at lalo pang pagpapatindi ng mga taktikal na opensiba.

Higit na isusulong ng mga demokratikong pwersa ang mga pakikibakang masa laban sa pagkapapet, militarismo at korapsyon ng rehimeng Arroyo at ang mga malawakang pagkilos sa lansangan para igiit ang pagpapatalsik kay Gloria Arroyo. Kakumbina ng masaklaw na ahitasyon at propaganda, pinakamahalaga ang diin natin sa masinsing propaganda, at ibayong pag-oorganisa at pagpapakilos sa masa sa mga baryo, pabrika, komunidad, paaralan at lansangan.

Ang lubhang pagkakahiwalay ni Arroyo ay nag-eengganyo ng parami nang paraming mga pwersang nakahandang makipagkaisa sa mga patriyotiko at demokratikong pwersa upang kumilos laban sa rehimen. Binibigyang-pansin natin ang pag-ugnay, pagpapakilos at pag-oorganisa ng mga patriyotikong pwersa na namumulat sa walang kahihiyang pagkapapet ni Arroyo. Kabilang na rito ang mga empleyado ng reaksyunaryong gubyerno at mga pwersa ng reaksyunaryong militar at pulisya, gayundin ang mga kagyat na pinuno nila sa mababang antas, na naliligalig, namumulat at naglulunsad ng mga protesta sa harap ng nasisiwalat ngayong malalalang katiwalian sa gubyerno at sandatahang pwersa nito.

Sinasamantala at pinaiigting natin ang mga tunggalian ng magkakaribal na reaksyunaryong paksyon maging ang mga tunggalian sa loob ng sandatahang lakas ng reaksyunaryong estado. Wastong pansamantalang makipag-ugnayan tayo maging sa ibang reaksyunaryo upang ihiwalay ang pangunahing kaaway na nasa poder. Gayunman, hindi natin pababayaang masamantala ang sitwasyon ng mga di nagsisisi at di pa lubusang napananagot na malalaking kriminal na berdugo at mandarambong sa bayan, mga kinasusuklamang labi ng pangkating Marcos at pangkating Estrada upang makapagpangibabaw ng boses at makapanumbalik o makaagaw ng poder. Kailangang patuloy din silang ihiwalay, itakwil at labanan.

Kaalinsabay, pinananawagan ng Partido ang pagpupursige at pagpapapasigla ng mga taktikal na opensiba ng Bagong Hukbong Bayan laban sa mga armadong pwersa ng reaksyunaryong estado bilang pagtugon sa pagkukumahog ng reaksyunaryong militar na maglipat ng mga pwersa sa mga kinokonsentrahang larangang gerilya; paniningil sa pagpapaigting ng pasistang terorismo ng rehimeng Arroyo sa kanayunan at kalunsuran; at paglaban sa armadong interbensyon ng US sa bansa. Makabuluhan ang idudulot ng pagpapadalas at pagpapalakas ng mga taktikal na opensiba ng BHB sa higit pang pagpapaigting ng pampulitikang krisis ng buong reaksyunaryong naghaharing sistema.

Sa harap ng matinding krisis at pagkakasa natin ng mga taktikal na hakbangin at pagpapabilis ng mga gawain upang samantalahin ang napakainam na sitwasyon, mahalagang mailinaw din natin sa pwersa at mamamayan ang pinag-uugatan ng kasalukuyang krisis at ang pangangailangan para sa puspusang rebolusyonaryong pagbabago sa lipunan upang mapagpasyang wakasan ito. Tungo sa mapagpasyang paglutas sa mga saligang suliranin ng mamamayan at pagkakamit ng ganap na tagumpay, naghahanda at tumatanaw tayo lampas sa pagpapabagsak ng isa o magkakasunod na mga reaksyunaryong rehimen.

07 Setyembre 2003
Edisyong Pilipino

	Editoryal: Paigtingin ang mga pakikibakang bayan para ibagsak ang rehimeng US-Arroyo
	Away ng mga magnanakaw: Mga nakaw na yaman ng mga Arroyo, ibinunyag ni Lacson
	Matatagumpay na opensiba ng BHB: 22 armas, nasamsam ng BHB sa mga reyd at ambus
	Mga sundalo ng AFP, hinihikayat na sumanib sa rebolusyonaryong kilusan
	Mga tropa ng AFP, CAFGU sa Agusan del Sur, sumanib sa BHB
	Sa Silangang Kabisayaan: Mahusay na pamumuno ng Partido sa lokalidad
	Mula sa hanay ng mga kabataang estudyante: Si Ka Leo sa kanayunan
	Sa Ibayong Dagat: Lumalaganap ang armadong paglaban ng mga Iraqi
	Balita