[Balik-Tanaw: Dantaong pananalanta ng Imperyalismong US] Sa mga nagdaang Balikatan: Mga paglabag sa karapatan ng mamamayan
Itinatampok ng AB sa isyung ito ang mga sumusunod na artikulo na nagbabalik-tanaw sa pambubusabos ng imperyalismong US sa mamamayang Pilipino at sa madugong kasaysayan ng dominasyon nito sa Pilipinas . Sa pamamagitan lamang ng pag-aaral sa kasaysayang ito ng Pilipinas maaaring lubos na maunawaan ang kasalukuyang mga patakaran at hakbangin ng US sa bansa, kabilang na ang kasalukuyang armadong panghihimasok nito sa Mindanao.
Upang maging katanggap-tanggap ang pagbabalik ng mga tropang Amerikano sa Pilipinas, pilit silang inilalarawan na may mataas na pagrespeto sa karapatang-tao at pagsasaalang-alang sa mga lokal na kaugalian. Nais ng rehimen na maibaon na sa limot ang mga pang-aabuso ng mga tropang Amerikano sa mga nagdaang pagsasanay, bukod pa sa pahirap na sinapit ng sambayanang Pilipino mula pa nang saklutin ng US ang bansa.
Sa halip na tulungang mabigyang katarungan ang mga biktima, ang papet na gubyerno pa ang nagsisilbing tagapag-ayos ng mga kaso pabor sa mga pwersang US. Sinasabi pa ngayon ng rehimeng Macapagal-Arroyo na kailangang magpasalamat ang taumbayan sa "pagtulong" ng US sa "gerang kontra-terorismo".
Noong Agosto 21, 2000, namatay sina Arnelo Gabiola, 18, at Rolley Narvares, 17, ng Toledo, Cebu nang masabugan ng granadang iresponsableng iniwan ng mga tropang Amerikano na lumahok sa pagsasanay na ginanap doon. Nasugatan din sa insidente si Jordan Villarmina, 11. Walang permiso ang US Navy SEALS at Philippine Navy na gamitin bilang firing range ang pinagdausang lugar. Hindi rin naglabas ang mga ito ng babala sa publiko bago sila nagpaputok sa lugar. Hindi na pinanagutan ng mga tropang Amerikano ang kanilang iresponsibilidad, ni ang mga nalabag na probisyon ng Visiting Forces Agreement (VFA) at mga panuntunan sa pagsa- sanay. Upang mapatahimik ang mga pamilya ng mga biktima, sinuhulan sila ng mga nagdaan at kasalukuyang rehimen.
Sinuhulan din ng $5,000 si Marcelo Batistil, isang drayber ng taksi, upang iatras ang kanyang asunto laban sa tatlong sundalong Amerikanong bumugbog sa kanya noong Marso 6, 2000 habang nagaganap ang Balikatan. Nagreklamo si Batistil nang tumangging magbayad ng pamasahe ang mga sundalo kaya pinag-initan siya ng mga ito. Kahit sa mga probisyon ng VFA, ang tatlo ay dapat kaagad na inaresto ng lokal na awtoridad upang litisin sa mga korte ng Pilipinas. Subalit tumanggi ang US na isuko ang tatlo at pinatakas pa patungong US.
Sa isang naval exercise ng Balikatan noong Pebrero 2000, apat na beses na sumala sa target ang pambobomba ng mga tropang kalahok sa pagsasanay. Tinamaan ng mga bomba ang Talisayin, isang baryo ng mga mangingisda sa Zambales. Bunga nito, 10-15 pamilya roon ang takot at walang kalaban-labang lumikas. Sa kabila ng malinaw na pagkakamali laluna't may mga naninirahan doon, nagmatigas ang mga upisyal ng Philippine Navy na saklaw umano ng target ang lugar. Ngunit ni hindi muna pinalikas, ni inabisuhan ang mga naninirahan sa lugar bago ginawa ang pagbobomba.
Ang AFP ay marami ring kaso ng walang pakundangang pagsagasa sa mga karapatan at kapakanan ng mamamayan, alang-alang sa interes ng mga tropa ng US na kalahok sa Balikatan.
Noong Disyembre 1999, bilang paghahanda sa Balikatan 2000, sinunog ng mga tropa ng SAF, 24th IB, 68th IB, 69th IB, 71st IB, 703rd Bde Training Unit at ISAFP ang daan-daang bahay sa mga bundok ng San Marcelino at San Felipe sa Zambales, Dinalupihan sa Bataan, at Floridablanca, Lubao at Porac sa Pampanga. "Paglilinis" diumano ito sa erya na pagdadausan ng mga pagsasanay militar. Maramihang inaresto at pinagbubugbog ng naturang mga tropa ang mga residenteng Aeta.
Noong Pebrero 2000, nagpataw ng blokeyo sa pagkain ang AFP sa mga Aeta sa Sityo Palis, Baytan at Maquisquis sa Loob Bunga 'resettlement area sa Botolan, Zambales. Sapilitan ding pinalayas ng mga sundalo ang ilandaang pamilyang Aeta mula sa Sityo Tarukan, Barangay Sta. Ana, Capas, Tarlac. Ginawa ito upang "linisin" ang lugar na malapit sa Crow Valley bombing and gunnery range na gagamitin sa Balikatan.
![](../../angbayan/images/textend3.gif)
|