Editoryal:
Lumalala ang pagkakahiwalay ng rehimeng Arroyo sa mamamayan

Read this article in English

Patuloy na nahihiwalay sa pulitika si Gloria Arroyo dahil sa kanyang bulok at brutal na paghahari at sa lumalalang pinsala at kahirapang idinudulot sa mamamayan ng walang pakundangan niyang pagpapakatuta sa imperyalismong US.

Hindi nawawala ang malaking duda ng nakararaming mamamayan sa kanyang pananalo sa eleksyon. Ikinagagalit ng mamamayan ang pagsupil ng rehimen sa mga nagpapahayag ng protesta sa nagdaang pinakamarumi, pinakamadaya at pinakamarahas na halalan sa buong kasaysayan ng mga reaksyunaryong eleksyon sa Pilipinas. Lalong ikinagagalit ng bayan ang pagsagasang ginagawa ngayon ng rehimen sa interes ng hustisya at ng mamamayan para sa pakikipag-"rekonsilyasyon" kina Estrada, sa mga Marcos at iba pang hinatulan na ng mamamayan dahil sa kanilang mga karumaldumal na krimen laban sa bayan.

Araw-araw ay dumarami pa ang mamamayang nakukumbinsi na napakalaki nang pabigat sa masa ang pagpapatuloy ng dati nang mga maka-imperyalistang patakaran sa ekonomya na buong sigasig namang ipinatutupad ng papet na rehimen. Nagsisilbi lamang ang mga patakarang ito sa mga imperyalistang kumpanyang ha-yok sa supertubo. Sinisikil niyon ang mga lokal na negosyo, winawasak ang mga produktibong pwersa, iniiwang atrasado ang pambansang ekonomya at pinasasahol ang kahirapan ng mamamayan.

Ang neoliberalisasyon at kaakibat nitong pagbaha ng mga inangkat na produktong sumasapaw sa mga lokal na kalakal ang sanhi kapwa ng lalong pagbagsak ng lokal na agrikultura at mga negosyo at ng laganap na disempleyo at paghihikahos sa buong kapuluan. Ang mas malalang larawan ng disempleyo at pagkabangkrap ng ekonomya sa Pilipinas ay naiibsan lamang ng pangingibang-bayan ng mahigit walong milyon nang Pilipino para doon maghanapbuhay.

Ang batas sa deregulasyon ng industriya ng langis ang dahilan ng walang tigil na pagtaas ng presyo ng mga produktong petrolyo at libreng-libreng pagkakamal ng gahiganteng tubo ng mga multinasyunal na kumpanya ng langis.

Ang deregulasyon at pribatisasyon ng mga batayang serbisyo ang nasa likod ng walang habas na pagtaas ng singil sa kuryente at tubig, serbisyong pangkalusugan at pang-edukasyon.

Sa harap ng lahat ng ito, sadyang pinananatiling nakapako sa napakababang halaga ang sahod ng mga manggagawa at sweldo ng mga kawani kapwa sa gubyerno at pribadong sektor. Sadya ring tinitipid ang gastos para sa mga batayang serbisyo bilang pagtalima sa kagustuhan ng mga imperyalistang ahensya. Balak pang lalong pigain ang mamamayan sa pamamagitan ng pagpapataw ng dagdag na mga buwis, alinsunod rin sa dikta ng mga imperyalista.

Ang pangangayupapa ni Arroyo sa kanyang imperyalistang amo sa usapin ng ekonomya ay nasasala-min din sa bulag niyang pagpapatupad ng "anti-teroristang doktrina" ng gubyernong Bush sa Pilipinas. Bilang "ikalawang larangan" umano sa "anti-teroristang gera" na itinutulak ng US, namumukod-tangi ang gubyernong Arroyo sa Asia bilang pinakamasugid na tagasuporta at tagapagpatupad ng lahat ng antinasyunal, anti-mamamayan, mapaniil at teroristang patakaran at hakbangin ng rehimeng Bush sa Pilipinas at maging sa ibayong dagat.

Sa lubusan nitong pangangayupapa sa imperyalistang amo, hinahayaan ng rehimen ang US na lapastanganin ang pambansang soberanya, sagasaan ang pambansang teritoryo, gawing base militar ang buong Pilipinas at panghimasukan ang mga panloob na usapin ng bansa. Tinataguriang pagsasanay-militar ang mga operasyong militar ng mga pwersang Amerikano sa mga lugar na pinamumugaran umano ng mga "teroristang Moro."

Sa ngalan din ng "gerang anti-terorista," tuluy-tuloy at malawak ang mababangis na operasyong militar ng mga pwersa ng gubyerno at walang pakundangang paghahasik nila ng terorismo at paglabag sa mga karapatang-tao sa mga lugar na pinagsususpetsahang pugad ng BHB at MILF/BMIAF. Binabalak na ring papasukin ang mga pwersang Amerikano sa mga rebolusyonaryong erya.

Para ipakita ang lubusang pagpapakatuta kay Bush, nagpadala ang rehimeng Arroyo ng 97-kataong humanitarian contingent bilang suportang pampulitika sa imperyalistang okupasyon ng US sa Iraq. Sa bilang na ito, 55 ang tropang militar.

Ngunit nayanig ang rehimen sa pampulitikang implikasyon ng pagbihag ng mga militanteng Iraqi sa manggagawang si Angelo dela Cruz. Napilitan itong pauwiin ang mga tropang Pilipino hindi lamang para iligtas si dela Cruz kundi lalo't higit ay isalba ang sarili sa matinding galit ng bayan kapag natuloy ang pagpugot sa bihag.

Alam ni Arroyo na di hamak na mas bibigyan pa rin ng diin ng kanyang mga imperyalistang amo ang buong-pangangayupapa niyang pagpapatupad ng mas mahahalagang mga patakaran hinggil sa imperyalistang "globalisasyon" at "gerang anti-terorista" kaysa sa pagkawala ng simbolikong presensya ng ilang tropang Pilipino sa Iraq. Gayunman, tiyak na may kapalit na malalaking konsesyong ibibigay ang rehimen sa amo nitong imperyalista dahil malaking sampal pa rin sa US ang pag-atras ng mga tropang Pilipino sa gitna ng sunud-sunod nang pag-atras ng mga tropa ng dating sumusuporta sa gera at okupasyon ng US sa Iraq.

Maaaring panandaliang makapagpabango ang rehimeng Arroyo sa mamamayan, subalit lilitaw at lilitaw ang tunay nitong maka-imperyalista at anti-mamamayang paninindigan. Titimo sa isipan ng sambayanan na walang karapatang manatili pa si Arroyo sa Malakanyang dahil patuloy nitong pagdudusahin ang sambayanan nang anim o higit pang taon.

Sisidhi ang pagnanais ng mamamayan na wakasan na ang kanilang pagtitiis. Patuloy na lalala ang pagkakahiwalay ni Arroyo sa malawak na masa ng sambayanan. Mabubuo ang malawak na pagkakaisa ng mamamayan na hahamon sa patuloy na pananatili ni Arroyo sa poder.

21 Hulyo 2004
Edisyong Pilipino

	Editoryal: Lumalala ang pagkakahiwalay ng rehimeng Arroyo sa mamamayan
	Tagumpay ng mamamayan ang pagpapalaya kay Angelo dela Cruz
	Pagbuwag sa rali, binatikos
	Mga kaso laban kay Palparan, ipupursige
	Lumalalang paglabag sa karapatang-tao sa Eastern Visayas
	Mga ulat koresponsal: Matagumpay na depensa ng BHB sa Northern Samar: Apat, di nagapi ng apatnapu
	Mga ulat koresponsal: Laban sa matinding militarisasyon sa Quezon
	Mga ulat koresponsal: Muling sumisibol ang rebolusyonaryong gawaing pangkultura sa Panay
	Maikling bidyo
	Sa Ibayong Dagat: Lumalakas ang pagtutol sa patakarang panlabas ng US: Sunud-sunod na dagok
	Iligal ang security barrier ng Israel
	Balita: Abusadong mga tropa, pinalalayas sa Negros
	Balita: Pagbabayad-pinsala sa mga biktima ng batas militar, binalewala ng rehimeng Arroyo
	Balita: US, binatikos sa kumperensya ukol sa AIDS