Lumalalang paglabag sa karapatang-tao sa Eastern Visayas
Patuloy ang pagtindi ng mga paglabag sa karapatang-tao sa Eastern Visayas bunga ng walang habas na militarisasyon sa kanayunan.
Sa Eastern Samar, tatlong inosenteng sibilyan ang pinatay ng mga nag-ooperasyong pasistang sundalo nitong Hunyo at Hulyo.
Pinakakarumal-dumal na kaso ang pagsalbeyds kay Rogelio Nuncio, 32, isang magsasakang taga-Barangay Tangbo, Maslog. Natagpuan ang kanyang naagnas nang bangkay sa loob mismo ng kapilya ng barangay noong Hulyo 2 nang magsibalikan ang mga magsasakang nagbakwit nang maglunsad ng operasyong militar sa kanilang lugar ang Charlie Company ng 14th IB. May tama ng bala sa kanyang sentido si Nuncio at may taga sa ulo. Inukit din ang kanyang mata.
Pinatay si Nuncio dahil lamang sa may kapatid siyang kilalang kasapi ng Bagong Hukbong Bayan (BHB).
Pagkaraan ng dalawang araw, walang awa ring pinatay ng mga elemento ng parehong yunit si Bernardo Amado, isang magsasakang taga-Sityo Baynag, Barangay Can-ilay, Can-avid. Si Amado, na may kapansanan sa pag-iisip, ay basta na lamang pinaratangang myembro ng BHB nang hindi siya makasagot sa mga tanong ng mga sundalo.
Noon namang Hunyo 12, sinalbeyds ng isang sundalo ng 14th IB na nagngangalang "Garcira" at dalawang elemento ng CAFGU si Freddie Rebato, isang magsasakang taga-Barangay Tugas, Maslog. Natagpuan si Rebato na nakadipa at mahigpit na nakatali ang dalawang kamay sa isang punong kahoy, basag ang bungo at tadtad ng sugat ang katawan.
Sa Samar, dinukot at iligal na idinitine ng mga sundalo ng 34th IB at 7th Scout Rangers Coy ang walo katao mula sa Barangay Sto. Ni�o, Motiong nitong Hulyo. Ang mga biktima ay kinabibilangan ng isang pamilyang magsasaka at ang kapitan, isang konsehal at dalawang tanod ng naturang barangay na nagpunta sa kampong militar para hanapin ang nawawalang pamilya.
Nagtatrabaho sa kanilang sakahan ang buong pamilya ni Artemio Lazarra, 39, nang dumating ang may 20 sundalong nag-ooperasyon noong Hulyo 4. Tinutukan ng baril at pilit nilang isinama si Lazarra at ang mga anak niyang sina Josephine, 13; Jocelyn, 12; at Jonathan, 9. Isang Lieutenant Pensona at Sergeant De Guzman ang nakilalang kasama ng yunit na iyon.
Kinabukasan, bandang alas-2 ng hapon, hinanap ni Barangay Capt. Leonardo Gabane at tatlo pa niyang kasamahan ang pamilyang Lazarra, subalit idinitine rin sila ng militar
Limang araw na hinawakan ng AFP ang mga biktima nang walang kasong isinasampa sa kanila. Pinakawalan lamang sila nang isinumbong ang insidente sa Katungod (tsapter ng Karapatan sa Eastern Visayas) at sa provincial chapter ng Bayan Muna.
Bago ito, dinukot din ng 34th IB noong Hunyo 27 si Liberato Racab, isang magsasakang taga-Sityo Tar-as, Barangay San Miguel, Jiabong. Hanggang ngayon ay hindi pa siya natatagpuan.
Sa Leyte, tatlong minutong pinagpuputukan ng masinggan at M14 ng mga tropa ng 19th IB sa pamumuno ni 1Lt. Onofre Nelmida ang 13 magsasakang papunta sana sa kanilang pahingahan sa Dinanawan, Ormoc City noong Marso 27.
Dinakip at pinilit maggiya sa operasyon ang pito sa kanila�sina Marcelo Custodio, 20; Orteliano Dador, 55; Reynaldo Dador, 33; Christopher Muya, 22; Macario Tumampo, 22; Crispin Tumampo, 25; at Mario Cabacoy. Pinagbubugbog sina Cabacoy at Dador. Nakatakbo naman ang anim na iba pa.
Sa araw ding iyon, dinakip at pinilit ding maggiya ng naturang yunit militar ang tatlo pang magsasaka�sina Jonie Polenio, Avelino Evan at ang kanyang asawa.
| 
