Sa ilalim ng bagong rehimen:
Mga ipinaglalaban ng manggagawang Pilipino

Read this article in English

Kasabay ng papatinding krisis sa ekonomya, ibayong lumulubog sa kumunoy ng kahirapan ang mga manggagawa. Sa kabila nito, patuloy na ipinatutupad ng rehimeng Macapagal-Arroyo ang mga patakarang nang-aapi at nagpapahirap sa mga manggagawa. Alinsunod sa imperyalistang "globalisasyon", patuloy ang pagtataguyod sa liberalisasyon, pribatisasyon at deregulasyon. Taliwas sa mahigpit na kahilingan ng mga manggagawa, ipinagpapatuloy lamang ni Macapagal-Arroyo ang anti-manggagawang programa ng pinatalsik na si Estrada.

Nananatiling P250 ang minimum na arawang sahod. Kulang na kulang ito kung ihahambing sa P418 (P501 sa Metro Manila) kinakailangan sa bawat araw ng anim-kataong pamilya upang makapamuhay nang disente. Lalong nagpaliit sa kakarampot na ngang sahod ng mga manggagawa ang tuluy-tuloy na pagtaas ng presyo ng mga karaniwang bilihin.

Tuluy-tuloy at malawakan ang tanggalan sa trabaho sa mga manggagawa tulad ng sa San Miguel Corp. at Toyota. Sa Gitnang Luzon, mahigit 10,000 manggagawa ang tinanggal sa trabaho mula Enero hanggang Marso ng taong ito. Triple ang laki nito sa mga nasisante sa parehong panahon at lugar noong nakaraang taon.

Walang tigil ang pandarahas sa piketlayn, tulad ng sa Cosmos, Mina�s Transit at Yokohama Tires Philippines, Inc. Patuloy ang pag-atake sa karapatan ng mga manggagawa na mag-unyon at malayang maglahad ng mga hinaing.

Sa inilunsad na People�s Dialogue with the NDFP noong Abril, inihapag ng mga manggagawa, sa pamamagitan ng Kilusang Mayo Uno, ang kanilang mga kahilingan. Dinaluhan din ito ng iba pang sektor at mga kinatawan ng gubyernong Macapagal-Arroyo. Iminungkahi ng mga manggagawa sa NDFP na gawing adyenda sa usapang pangkapayapaan ang sumusunod na kahilingang ipinaglalaban nila:

1. Dagdagan ng P125 ang arawang sahod ng mga manggagawa at ng P3,000 ang buwanang sweldo ng mga kawani ng gubyerno; buwagin ang regional wage boards at ibalik ang pambansang minimum na sahod sa pamamagitan ng pagbabasura sa Wage Rationalization Act of 1989.
2. Itigil ang malawakang tanggalan at ibalik sa trabaho ang mga di-makatwiran at iligal na sinisante sa ilalim ng rehimeng Estrada
3. Ibasura ang Department Order No. 10 ng DOLE at ipagbawal ang kontraktwalisasyon, kaswalisasyon, agency hiring at iba pang patakarang nagdudulot ng kawalan ng seguridad sa trabaho ng mga manggagawa;
4. Buwagin ang Technical Education and Skills Development Authority (TESDA) at ang iskema sa pag-aaprentis, at iba pang kaayusan sa trabaho na nagbubukas sa pasahod na mas mababa sa minimum.
5. Ibasura ang lahat ng kasong isinampa laban sa mga manggagawa, mga lider ng unyon at mga unyon kaugnay ng paggigiit ng mga demokratikong karapatan.
6. Igalang ang ganap na pagtatamasa ng mga karapatan sa pag-uunyon at mga demokratikong karapatan ng mga manggagawa (laluna sa economic zones), usigin ang mga upisyal ng gubyerno, pulis, militar at goons na lumalabag sa karapatan ng mga manggagawa; pawalambisa ang mga kontra-manggagawang probisyon ng Labor Code
7. Pawalambisa ang Executive Order 180 at kilalanin ang karapatan ng mga empleyado ng gubyerno na mag-organisa, kolektibong makipagtawaran at magwelga.
8. Itigil ang pagsingil ng labis-labis na mga bayarin sa mga OFW at ibasura ang iba�t ibang batas, kautusan at resolusyon na lalong nagpapabigat sa pasanin at nagpapatindi sa komodipikasyon ng mga migranteng Pilipino.
9. Pagtibayin ng Senado at ganap na isakatuparan ng gubyerno ng Pilipinas ang United Nations Convention for the Protection of Migrants, their Families and their Rights and Welfare.
10. Patawan ng mabigat na parusa ang lahat ng mga ahensya at indibidwal na nag-eempleyo ng mga batang manggagawa sa peligrosong mga industriya at yaong mga sangkot sa sex trafficking ng kababaihan at mga batang Pilipino.
11. Gumawa ng batas na magpapatupad sa konstitusyunal na prinsipyo ng pantay-pantay na karapatan sa trabaho; parusahan ang mga employer na kumukuha ng trabahador batay sa kasarian, katayuang sibil, edad, relihiyon at kuneksyong pulitikal. Parusahan yaong mga nagpapatupad ng mga anti-kababaihang patakaran sa pagkuha ng empleyado.
12. Itigil ang demolisyon ng mga tirahan ng mga manggagawa at iba pang maralitang lunsod maliban kung matitiyak na mayroon pa silang matitirahan at mapagkakakitaan.
13. Ibasura ang maka-negosyong programa sa pabahay ng dating administrasyong Estrada at magpatupad ng isang planado, komprehensibo at sustenableng programa sa pabahay para sa mga manggagawa at maralitang taga lunsod. Pawalambisa ang kontra-mahirap na mga probisyon ng RA 279 o Urban Development Housing Act (UDHA).
14. Tiyakin ang sapat at mura, kung di man libreng pagbibigay ng mga serbisyong panlipunan tulad ng tubig, kuryente, edukasyon at pagpapa-ospital laluna para sa mga walang trabaho at iba pang maralitang lunsod.
15. Ibasura ang misrepresentasyon ng reporma sa lupa bilang kusang pagbebenta ng lupa o mga sapi ng mga panginoong maylupa. Itigil ang arbitraryo at di-makatarungang pagpapalayas sa mga magsasaka at manggagawang bukid bunga ng pagpapalit-gamit at tahasang pa ngangamkam ng lupa ng mga kumpanyang multinasyunal at mga lokal na negosyante at panginoong maylupa. Itaas ang arawang sahod ng mga manggagawang bukid at pagkalooban sila ng iba pang ayudang pang-ekonomya.

Malaking papel ang ginampanan ng mga manggagawa sa pagpapatalsik sa anti-manggagawang si Estrada. Nasa unahan sila ng paglaban bago pa man tuluyang malantad ang katiwalian ni Estrada. Noong Enero, dumagsa sa EDSA ang malaking bilang ng mga manggagawa upang makiisa sa iba pang sektor laban sa tiwaling pangulo at kanyang mga kasapakat.

Bumuhos ang mga manggagawa at iba pang sektor sa iba�t ibang lunsod sa bansa tulad ng Bacolod, Iloilo, Cebu, Naga, Baguio at iba pa upang ipagdiwang ang Pandaigdigang Araw ng Paggawa. Kasabay ng pagpapahayag ng mga kahilingan, kinundena nila ang pagpupumilit ng kampo ni Estrada na makabalik sa poder.

Inilunsad noong Abril 12 ang "Kalbaryo ng Mamamayan sa Panahon ni Gloria" caravan na nilahukan ng mga manggagawa at ibang maralitang sektor. Hinamon nila ang bagong rehimen na lutasin ang mga batayang problema at kilalanin ang mga demokratikong karapatan ng mga api�t naghihirap na mamamayan.

Patuloy ang pagsulong ng mga pang-ekonomya at pampulitikang pakikibaka ng mga manggagawa. Mahigpit nilang iginigiit ang kani lang kagyat at pangmatagalang kahilingan. Sumusulong ang pakikibaka ng mga manggagawa sa harap ng papalalim na krisis. Habang tumitindi ang pagsasamantala sa kanila ng mga kapitalista at ng rehimen, lalong tumatatag ang kapasyahan ng mga manggagawa na ipaglaban ang kanilang kapakanan at mga karapatan.

Mayo 2001
Edisyong Pilipino

	Editoryal: Walang makabuluhang pakinabang ang bayan sa nagdaang eleksyon
	Sa ilalim ng bagong rehimen: Mga ipinaglalaban ng manggagawang Pilipino
	Panayam kay Ka Roger
	Muling pagbubukas ng usapang pangkapayapaan sa pagitan ng NDFP at GRP, matagumpay na idinaos
	Mga Ulat Koresponsal: Laban sa pandarambong sa yaman ng Kordilyera
	Mga Ulat Koresponsal: Mamamayan sa Gitnang Kabisayaan, masiglang lumahok sa pakikibakang anti-Estrada
	Mga Ulat Koresponsal: Mga taktikal na opensiba, patuloy na inilulunsad sa Kabikulan
	Mga Ulat Koresponsal: Mga pagpaparusa sa Hilagang Mindanao, ipinaliwanag
	Mga balita ng pakikibaka