Sa Ibayong Dagat:
Papet na gubyerno, itinayo ng US sa Iraq

Read this article in English

Noong Hunyo 28, ipinwesto ng US ang isang papet na gubyernong Iraqi sa pamamagitan ng isang seremonya sa Baghdad. Kasabay nito, pormal na nilusaw ng US ang Coalition Provisional Authority (CPA), ang kolonyal na administrasyong naghari-harian sa Iraq sa nakaraang 14 buwan. Hinirang na prime minister si Iyad Allawi, isang operatiba kapwa ng CIA at ng MI-6 ng UK kahit noong kasapi siya ng partidong Ba'ath ni Saddam Hussein.

Patuloy na pinananaig ng US ang kolonyal na kapangyarihan nito sa Iraq. Kasabay ng pagpapaupo kay Allawi bilang prime minister, patuloy ang aktibong pagrerekrut at pagsasanay ng papet na armadong hukbo na magiging pangunahing salalayan ng neokolonyal na kapangyarihan ng US sa Iraq. Hangad ng US na patuloy nitong kontrolin ang pulitika, militar at ekonomya ng Iraq, kamkamin ang yaman nitong langis at gamitin itong tuntungan sa paghahari sa buong Middle East.

Habang kinokonsolida ng US ang neokolonyal na kapangyarihan nito sa Iraq, nasa interes nitong panatilihin ang mga mapanakop nitong tropa sa Iraq. Bago siya lumisan, tiniyak ni CPA Administrator Paul Bremer na hindi maaaring patalsikin ng papet na gubyerno ang 146,000 tropa ng US. Bagamat nakapwesto na ang papet na gubyerno, patuloy na magsisilbing sentro ng kolonyal na paggugubyerno ang embahada ng US sa Baghdad. Ipagpapatuloy ng bagong talagang ambasador na si John Negroponte ang dating papel ni Paul Bremer. Tungo rito, itatalaga ng US ang aabot sa 3,000 tauhan upang manghimasok sa iba't ibang larangan ng gawain ng papet na gubyerno, tiyakin ang pribatisasyon ng ekonomya ng Iraq at ipatupad ang mga repormang pang-ekonomya na higit pang magpapahigpit sa kontrol ng mga kumpanyang Amerikano sa bansa.

Pangunahing layunin ng US ang pagkontrol ng US sa mga rekurso at kita sa langis ng Iraq. Kaalinsabay at kaakibat din nito, pananatilihin ng US ang kontrol nito sa lahat ng mga pribilehiyo sa negosyo at mga kontrata na ibinibigay sa mga paboritong kroni ng gubyernong Bush sa kunwa'y rekonstruksyon ng mga sinira ng gera ng US at ang pagsusuplay ng mga kagamitang militar ng US sa Iraq. Tinitiyak ng US na ang mga ito ay hindi mababago ng bagong papet na rehimen. Pinagtibay na ang mga batas ukol sa operasyon ng mga korporasyon, kabilang ang tahasang pagbabawal ng mga welga.

Kasabay nito, patuloy na umiigting ang armadong paglaban ng mamamayang Iraqi at lumalawak ang kanilang nagkakaisang prente ng mga rebolusyonaryo at rebeldeng pwersa na yumayanig sa paghahari ng US sa Iraq. Patuloy silang nagbabangon sa kabila ng walang tigil at maramihang pagmamasaker, pambobomba at paninira at napakatindi ng pang-aapi ng mga pwersang US sa mamamayan ng Iraq. Determinado silang lumaban upang parusahan ang mga mananakop at mga taksil na papet at ipagkait ang bayan nila sa mga mananakop.

Inaatake nila ang mga pwersa, pasilidad at lohistika ng militar, pulisya, mga kontratistang panseguridad at burukrasyang panggubyerno ng US, mga kaalyado nito sa pananakop sa Iraq at ng papet na gubyerno sa Iraq. Ang lumalaking pinsalang tinatamo ng US ay nagpapalakas ng panawagan sa loob at labas ng US na lubusang paalisin na ang mga tropa nito sa Iraq. Habang lumalala ang krisis ng paghahari ng US sa Iraq, lalong mas mainam para sa mamamayan at mga rebolusyonaryong armadong pwersang Iraqi na bigwasan kapwa ang mga pwersa ng US at ang mahina pang papet na gubyerno nito. Ang mga tropang Amerikano na kailangan ngayong pumirmi sa kanilang mga kampo ay nagiging mas madaling target ng mga armadong pwersang Iraqi.

Malinaw sa mamamayan at rebolusyonaryong Iraqi na tanging ang kanilang puspusan at malawakang mapagpalayang armadong paglaban ang makapagpapatalsik sa mga dayuhang mananakop at makapagbabalik ng soberanya at katiwasayan sa Iraq.

07 Hulyo 2004
Edisyong Pilipino

	Editoryal: Hungkag at mapanlinlang ang 10-puntong programa ng rehimeng Arroyo
	Ikatlong round ng usapang pangkapayapaan, nakakadismaya-JMS
	Adyenda ng US ang planong pag-amyenda sa konstitusyon
	Mga aral sa kampanyang militar ng BHB sa Panay
	Sumusulong ang rebolusyong agraryo sa Central Luzon
	Ka Argie: Mandirigmang medik, dentista at siruhano
	Sistema ng edukasyon sa ilalim ng rehimeng Arroyo
	Sistema ng edukasyon sa ilalim ng rehimeng Arroyo: Pondo ng pasista
	Sistema ng edukasyon sa ilalim ng rehimeng Arroyo: Mga palabas ni Arroyo
	Sa Ibayong Dagat: Papet na gubyerno, itinayo ng US sa Iraq
	Balita