Balita
Danyos para sa mga biktima ng diktadurang Marcos, iginigiit
IGINIGIIT ngayon ng Samahan ng mga Ex- Detainee Laban sa Detensyon at Para sa Amnestiya (SELDA) na aprubahan na ang panukalang House Bill 4535 na naglalaan ng sangkatlo ng nakaw na yaman ng mga Marcos para sa 10,000 biktima ng batas militar. Ito'y pagkatapos desisyunan ng Korte Suprema nitong Hulyo na ibigay sa gubyerno ang $150 milyong nakaw na yaman ng mga Marcos na matagal nang nakalagak sa Philippine National Bank.
Inilabas ng SELDA ang panawagan sa gitna ng mga pagmamaniobra ng pamilyang Marcos at mga kroni nito na harangan o palabnawin ang anumang batas na magbibigay ng makabuluhang bahagi ng nakaw na yaman sa mga biktima ng diktadura.
Kamakailan din ay inianunsyo ni Arroyo ang paglalaan ng P8 milyon lamang para sa mga biktima�na napakalayo sa P2.5 bilyong dapat mapasakanila mula sa $150 milyong kayamanan.
GRP, binawi ang mga kundisyong iginigiit sa MILF
NITONG Hulyo 18, bumigay ang rehimeng Arroyo sa mga iginigiit ng MILF at sinuspinde nito ang mga mandamyento de aresto at mga pabuya sa pagdakip sa 10 lider ng MILF at tinigil na rin ang pagsasabing �terorista� ang MILF. Tulak ito ng mahigpit na panawagan ng maraming sektor, kabilang ang maraming imam (lider relihiyosong Muslim), na bigyang-daan ang usapang pangkapayapaan sa pagitan ng gubyerno at MILF.
Kaugnay nito, pinayuhan ang MILF ni Gregorio "Ka Roger" Rosal, tagapagsalita ng Partido, na mag-ingat sa mga mapanlinlang na pakana ng papet na gubyerno at magmatyag din sa pagpasok ng US ngayon sa usapang pangkapayapaan.
Samantala, agad na nilabag ng AFP ang tigil-putukan nito sa MILF nang lusubin ng mga sundalo ang isang balwarte ng MILF sa Pagalungan, Maguindanao.
Marahas na dispersal ng rali sa Iloilo, kinundena
BINATIKOS ng mga militanteng organisasyon at tagapagtaguyod ng karapatang-tao ang pandarahas ng mga pulis at vigilante sa 200 nagrali sa harap ng Barcelo Sarabia Manor Hotel kung saan tumuloy sa Pres. Arroyo nang dumaan siya sa Iloilo City noong Hulyo 15.
Mahigit 200 pulis at mga pwersang vigilante na nakapaloob sa Civilian Volunteers Organization at Bantay Bayan Foundation ang nagsagawa ng dispersal, na siya nang pinakamarahas nitong huling mga taon. Ang mga nagrali ay kabilang sa Bagong Alyansang Makabayan (BAYAN)-Panay, Kilusang Mayo Uno, Kadamay, Pagkakaisa ng mga Samahan ng Tsuper at Operators Nationwide (Piston), Anakpawis, Anakbayan at iba pang militanteng organisasyon sa Iloilo.
Anim na demonstrador ang nasugatan at sampu ang ikinulong.
Patakarang "open skies" ipatutupad na sa bansa
BUMAGSAK nitong Hulyo 18 ang negosasyon sa pagitan ng US at Pilipinas hinggil sa muling pagpapaliban ng lubos na implementasyon ng patakarang "open skies" na nakatakda na sa Oktubre 1. Tatlong beses nang naipagpapaliban ang implementasyon ng kasunduan na pinirmahan noon pang 1982 ng rehimeng Marcos sa dikta ng imperyalismong US.
Saklaw ng patakarang "open skies" ang liberalisasyon hindi lamang ng mga byahe sa pagitan ng US at Pilipinas at sa pagitan ng Pilipinas at ibang bansa, kundi pati mga byahe mula at patungong iba't ibang bahagi ng Pilipinas.
Iginigiit ng US ang karapatang magnegosyo sa Pilipinas ng mga airlines ng US nang kunwa'y nasa teritoryo sila ng US, bagay na labag sa konstitusyon ng Pilipinas. Ginagamit ngayon itong sangkalan ng US para igiit ang kagyat na pagbabago sa konstitusyon upang mawala ang mga sagka sa imperyalistang pagsagasa sa patrimonya at soberanya ng Pilipinas.
Ang patakarang "open skies" ay magreresulta sa tuluyang pagkalugi ng mga lokal na kumpanya sa airlines tulad ng Philippine Airlines at Cebu Pacific Airways.
![](../../angbayan/images/textend3.gif)
|