Sa kabila ng tigil-putukan:
Patuloy ang atake ng AFP sa MILF

Read this article in English

Tahasang tinanggihan at patuloy na binabalewala ng rehimeng Arroyo ang deklarasyon ng Moro Islamic Liberation Front (MILF) ng 10 araw na tigil-putukan mula Hunyo 2 upang mabigyang-daan ang muling pagbubukas ng usapang pangkapayapaan sa pagitan nito at ng Gubyerno ng Republika ng Pilipinas (GRP).

Sa halip, iniutos ni Arroyo sa AFP na pag-ibayuhin pa ang mga atake laban sa MILF. Pinipilit din ni Arroyo ang MILF na pumirma sa isang "pinal na kasunduang pangkapayapaan" na nagtatakda ng pagsuko nito sa rehimen, pagpapadakip sa mga pwersa ng MILF na nagsagawa umano ng mga pambobomba at pagbubunyag sa kanilang mga pusisyon � na pawang imposibleng sundin ng MILF.

Dahil dito, halos tiyak nang maibabasura ang usapang pangkapayapaan. Ani Ignacio Bunye, tagapagsalita ni Arroyo, anumang araw ay posibleng pormal nang ibilang ng GRP sa talaan nito ng mga "terorista" ang MILF at tuluyan nang isara ang negosasyon.

Isang araw matapos ianunsyo ng MILF ang planong tigil-putukan mula Hunyo 2 hanggang Hunyo 12, binomba ng mga eroplanong OV-10 Bronco at Tora-Tora ng AFP ang isang baryo sa Butig, Lanao del Sur. Marami umanong tauhan ng MILF ang napinsala, ayon sa matataas na upisyal ng militar.

Mariing kinundena ng Muslim Multisectoral Movement for Peace and Development ang pambobomba. Ayon naman kay Al Haj Murad, Vice Chairman for Military Affairs ng MILF, tiyak na mga sibilyan ang tinamaan sa mga pambobomba dahil walang kampo ang MILF sa lugar.

Ayon kay Murad, idineklara ng Komite Sentral ng MILF ang tigil-putukan bilang tugon sa panawagang kapayapaan ng Catholic Bishops Conference of the Philippines, Bishops-Ulama Conference at iba pang nagtataguyod ng kapayapaan sa Mindanao. Nagbabala naman si Ghadzali Jaafar, Vice Chairman for Political Affairs ng MILF, na magiging malaking pagkakamali ng gubyernong Arroyo kung hindi nito positibong tutugunin ang tigil-putukan.

Habang wala pang tigil-putukan, ipinagpatuloy ng MILF ang mga gerilyang atake nito sa AFP para labanan ang mga walang humpay na opensibang militar ng rehimen.

Noong Mayo 31, pitong elemento ng CAFGU ang namatay nang ambusin sila ng mga gerilya ng MILF sa South Upi, Maguindanao. Noon namang Mayo 29, tatlong sundalo at 12 elemento ng CAFGU ang namatay nang salakayin ng MILF ang dalawang magkalapit na detatsment ng 40th IB sa Carmen, North Cotabato. Nakasamsam ang MILF ng dalawang garan at isang M16.

Samantala, walang patid ang pananalakay ng mga pwersa ng gubyerno sa mga pwersa ng MILF, kaya naoobliga itong patuloy na magtanggol at lumaban.

07 Hunyo 2003
Edisyong Pilipino

	Editoryal: Ibayong inaarmasan ng US ang rehimeng Arroyo
	Mas malaking palagiang presensyang militar, itinutulak ng US
	Sa kabila ng tigil-putukan: Patuloy ang atake ng AFP sa MILF
	Mga Ulat Koresponsal: Mga tagumpay sa rebolusyong agraryo, inaani sa Samar
	Sa Ibayong Dagat: Kasinungalingan sa likod ng gera sa Iraq
	Sa Ibayong Dagat: Bagong planong nukleyar ni Bush
	Sa Ibayong Dagat: Dambuhalang propagandista ng imperyalismo
	Sa Ibayong Dagat: Mga sundalong British, nantortyur ng mga Iraqi
	Sa Ibayong Dagat: Parang pelikulang Rambo
	Balita