Ang panunumbalik:
Armadong panghihimasok ng US sa Pilipinas

Read this article in English

Special Operation Forces ng US, lumapag na sa Basilan. Lulan ng MH-47 Chinook helicopter, mula nitong Pebrero 17 magkakasunod na lumapag sa himpilan ng 103rd Infantry Brigade ang iba't ibang grupo ng 160 kumandong Green Beret na nakatakdang pumasok sa Basilan upang tugisin ang Abu Sayyaf. Samantala, sampung sundalo ng US Green Berets ang namatay nang bumagsak ang sinasakyang Chinook helicopter nitong Pebrero 22. Katulad ng army helicopter na umano'y pinaputukan sa ere noong Pebrero 10 sa bandang Isabela, walang kasamang Pilipinong sundalo ang mga Green Beret. Labag ito sa mga mismong patakaran ng Visiting Forces Agreement.

"Terms of Reference", pinirmahan. Nitong Pebrero 13, pinirmahan ng gubyerno ng US at Pilipinas ang Terms of Reference (ToR) upang masimulan na ang Balikatan 02-1, labintatlong araw makaraan dumating ang mga tropang Amerikano. Nilalaman ng ToR ang mga alituntunin sa paglulunsad ng Balikatan 02-1.

Pumirma para sa gubyernong US si Roberts Fitts, charge d'affaires ng embahada ng US sa Pilipinas. Sa panig ng gubyernong Macapagal-Arroyo, ang pinapirma ay si Assistant Foreign Secretary for American Affairs Minerva Falcon. Nais sana ng gubyerno ng Pilipinas na ang Foreign Affairs Secretary, si Teofisto Guingona, ang pumirma sa dokumento pero minaliit ng US ang ToR at tumangging pumirma ang upisyal ng US na dapat katapat ni Guingona, si Secretary of State Colin Powell.

Ipinagmalaki ni Macapagal-Arroyo na ang pagkakaroon ng ToR ay bunga ng paggigiit niya na maisulat ang mga alituntunin ng Balikatan 02-1 upang "mapawi ang pangamba na ang pagsasanay ay di lamang pagsasanay at na ang ating soberanya ay pahihinain nito". Subalit iwinaksi pa rin ito ng mga patriyotikong organisasyon at ng maraming mamamayan dahil hindi lubusang matakpan ng ToR ang katangiang operasyon ng Balikatan 02-1. Pinatutunayan nito na armadong interbensyon sa panloob na usapin ang sadya ng mga tropang Amerikano sa Mindanao.

US at World Bank, namumuhunan sa Mindanao. Nakatakdang magpasok ng $20.2 milyon ang US sa Mindanao ngayong taon para sa tinatawag nitong "kaunlaran". Gayundin, magpapasok ang WB ng $35 milyong "development assistance" sa susunod na limang taon. Sinabi ng WB na madadagdagan pa ito oras na "maibalik ang batas at kaayusan", isang malinaw na pagsuporta sa Balikatan 02-01 at, sa katunayan, kabayaran sa pagsuko ng rehimen sa pambansang soberanya at pagbibigay ng buong laya sa kagustuhan ng US na manghimasok sa bansa.

Ang butangerang si Macapagal-Arroyo. Gaya-gaya sa butangerong amo niyang si George W. Bush, nitong Pebrero 8 buong kagaspangang inalipusta ni Macapagal-Arroyo ang mga kumokontra sa Balikatan 02-1. Tinagurian niya ang mga itong "tagapagtanggol ng mga terorista, kasosyo sa negosyo ng mga mamamatay-tao, at kalaguyo ng Abu Sayyaf".

Kabi-kabila ang pagtuligsa sa pahayag na ito ni Macapagal-Arroyo. Kinundena ito ng mga patriyotiko at militanteng pwersa at maraming mamamayan. Binatikos din ito ng ilang kapartido niya, kabilang sina Sen. Manuel Villar at Sen. Joker Arroyo.

Araw-araw ang mga protesta. Halos araw-araw ay may mga aksyong protesta laban sa Balikatan 02-1 sa iba't ibang lugar sa bansa.

Sa Kamaynilaan sunud-sunod ang mga protesta ng mga estudyante at iba pang mga grupo sa harap ng embahada ng US. Marahas na binubuwag ang kanilang mga piket at rali laban sa Balikatan 02-1 at sa armadong panghihimasok ng US sa bansa.

Nitong Pebrero 4, kasabay ng paggunita sa ika-103 anibersaryo ng digmaang Pilipino-Amerikano, inilunsad ng libu-libong militanteng mamamayan ang "pambansang araw ng protesta laban sa panghihimasok ng US". Sa Butuan City, nagmartsa ang mga residente at nagsisigaw ng mga islogang anti-imperyalistang US. Sa Baguio City naman, nagsagawa ng mga katutubong sayaw sa lansangan ang mga pambansang minorya habang sinusunog ang bandila ng US. Nagkaroon din ng mga pagkilos sa harap ng embahada ng US sa Maynila, Clark Field sa Angeles, Pampanga; Cebu; Davao; Naga at iba pang lunsod sa Pilipinas.

Nitong Pebrero 6, binuo ng 54 organisasyon ng mamamayan, tatlong panrehiyong koalisyon, tatlong alyansang sektoral at 75 prominenteng indibidwal ang Out with US Troops Now! o OUT NOW!, isang pambansang koalisyon laban sa panghihimasok ng US. Layunin ng koalisyon na mag-ipon ng isang milyong lagda laban sa Balikatan.

Sa Davao, umabot sa 7,000 ang mga nagprotesta at pumirma sa isang manipesto laban sa Balikatan.

Nitong Pebrero 15, isang caravan laban sa Balikatan ang inilunsad ng BAYAN sa Cebu City. Tumungo ito sa Benito Ebuen Airbase sa Mactan, Lapu-lapu City.

Pebrero 2002
Edisyong Pilipino

	Editoryal: Pagbayarin nang mahal ang sukdulang papet na rehimeng Macapagal-Arroyo
	Ang panunumbalik: Armadong panghihimasok ng US sa Pilipinas
	Ibayong pagyurak sa soberanya ng mga bansa: Doktrinang Bush
	Pinalaking badyet pandigma ng US
	Pagbatikos sa doktrinang Bush
	Ang kapangyarihang militar ng US sa Asia-Pacific
	North Korea handang lumaban sa agresyong US
	Pagpapaalis sa mga Amerikanong "tagapayong militar" sa Colombia, iginiit ng FARC
	[Balik-Tanaw: Dantaong pananalanta ng Imperyalismong US] Sa mga nagdaang Balikatan: Mga paglabag sa karapatan ng mamamayan
	[Balik-Tanaw: Dantaong pananalanta ng Imperyalismong US] Pananalanta sa panahon ng mga base militar ng US sa Pilipinas
	[Balik-Tanaw: Dantaong pananalanta ng Imperyalismong US] Digmaang Pilipino-Amerikano (1899-1913): Noong unang nanghimasok ang imperyalismong US sa bansa
	[Balik-Tanaw: Dantaong pananalanta ng Imperyalismong US] Mga alingawngaw ng armadong panghihimasok ng US sa Vietnam
	Mga Balita