Rebolusyonaryong armadong pakikibaka sa Nepal
Mabilis na kumakalat ang apoy ng armadong rebolusyon sa Nepal. Sa pamumuno ng Partido Komunista ng Nepal (Maoista), puspusang sumusulong ang rebolusyonaryong kilusan doon laban sa paghahari ng mga mapagsamantalang uri. | Ang Kingdom of Nepal ay isang atrasadong bansa sa South Asia. Nasa timog nito ang India at sa hilaga ang Tibet at China. Kinakanlong ito ng matataas na bundok ng Himalayas kung saan matatagpuan ang Mt. Everest, ang pinakamataas na bundok sa mundo. Kasalukuyang nakapailalim ang Nepal sa paghahari ng monarkiya kahit pa may itinayong parlamento noong 1990 matapos ang malawakang demokratikong pagkilos noong dekada 1980. |
Sa nakaraang mga buwan, nagdulot ng mabibigat na bigwas ang People's Liberation Army (PLA) laban sa naghaharing reaksyunaryong sistema sa Nepal. Noong Pebrero hanggang Marso, magkakasunod na nireyd ng mga rebolusyonaryong mandirigma ang mga detatsment ng pulis sa kanlurang bahagi ng Nepal kung saan mahigit 200 pulis ang nilipol.
Noong Abril, inilunsad ang limang araw na pambansang welga na yumanig sa buong naghaharing sistema. Umalingawngaw sa buong bansa ang mga sigaw para sa pagtatayo ng isang malayang republika. Kasabay nito, inilunsad ng PLA ang mga koordinadong opensiba sa mga detatsment ng pulis sa Achham at Rolpa (tingnan ang mapa) na pumuksa sa mahigit 300 pulis.
Paglulunsad at paglawak ng digmang bayan
Pebrero 13, 1996 nang ilunsad sa kauna-unahang pagkakataon ang matagalang digmang bayan upang isulong ang bagong demokratikong rebolusyon laban sa mga imperyalista at lokal na reaksyunaryong uri sa Nepal.
Bago ito, inilatag na ng mga rebolusyonaryo ang mga batayang rekisito sa pagtatayo ng isang hukbong bayan, kabilang ang paglalatag ng estratehiya at taktika ng armadong pakikibaka, paglulunsad ng mga pulitiko-militar na pag-aaral at kaukulang pagbabago sa organisasyon. Kasabay ng panimulang mga taktikal na opensiba, ibinwelo ng mga rebolusyonaryo ang pagtatayo ng mga sonang gerilya na nagkonsolida sa malawak at malalim na baseng masa ng Partido sa bansa.
Mula 1996, tuluy-tuloy na lumakas ang armadong rebolusyon sa Nepal. Hakbang-hakbang na pinaunlad ang rebolusyonaryong baseng masa sa kanayunan sa pamamagitan ng pagmumulat, pag-oorganisa at pagpapakilos sa malawak na mahihirap na magsasaka sa kanayunan ng Nepal, pagsasagawa ng mga pag-aaral at paglulunsad ng mga kampanya upang mapaunlad ang kabuhayan ng masa.
Kaalinsabay, isinagawa ang mga reyd laban sa mga ahensya ng gubyerno na labis na nagpapahirap sa masang magsasaka at mga pagpaparusa ng pinakamasasamang elemento sa mga komunidad. Nag-organisa rin at nagpakilos ang mga rebolusyonaryo sa hanay ng mga manggagawa sa kalunsuran.
Nagpakahusay sa pakikidigmang gerilya ang PLA gamit ang sariling gawang mga bomba at armas, mga tradisyunal na sandata tulad ng khukhuris (isang klase ng itak) at mga kagamitan sa trabaho. Mapangahas na nireyd ang mga piling detatsment ng pulis upang makaipon at magpakahusay sa paggamit ng mga makabagong armas.
Sa ngayon, nasa katayuan ang PLA na maglunsad ng mga matagumpay na operasyon sa antas ng mga pansamantalang batalyon (na binubuo ng ilandaang Pulang mandirigma). Nasa kamay nito ngayon ang daan-daang malalakas na armas at iba pang modernong kagamitang militar. Nabuo na ang mga pansamantala at permanenteng kumpanya sa ilalim ng iba't ibang kumand sa mga rehiyon. Mayroong dose-dosenang regular na platun at daan-daang regular na mga iskwad. Dagdag dito, libu-libong mamamayan na ang nabigyan ng armas at pagsasanay bilang kasapi ng milisyang bayan.
Sa maraming lugar sa kanayunan, umiiral ang pampulitikang kapangyarihan ng mamamayan sa mga sona at larangang gerilya. Sa iba't ibang antas, nakikilusan nila ang 22 sa 40 distrito ng bansa. Noong Mayo 2001, itinatag na ang mga gubyernong bayan sa kanlurang bahagi ng Nepal. Kusang umatras ang mga pwersang pulis sa mga eryang ito dulot ng lakas at lawak ng suporta sa armadong rebolusyon. Dito, nakapaglunsad na ng mga eleksyon upang itayo ang mga lokal na nagkakaisang komite ng mamamayan hanggang sa antas ng komunidad at distrito.
Kontra-rebolusyonaryong tugon at suporta ng US sa gubyerno ng Nepal
Nag-alok ng negosasyon ang reaksyunaryong gubyerno noong Hulyo 2001. Nakipagtigil-putukan ang PLA upang bigyang-daan ang negosasyon para sa pagtatayo ng isang republika.
Bumagsak ang negosasyon nang walang naabot matapos ang limang buwan dahil sa mga pailalim na maniobra ng monarkiya ng Nepal at kainutilan ng parlamento ng Nepal sa harap nito.
Noong Nobyembre 2001, ipinataw ng gubyernong Nepali ang batas militar at pinakilos ang Royal Nepal Army (RNA), ang sandatahang pwersang nakapailalim sa awtoridad ng monarkiya. Mula noon, inilunsad ng RNA ang madudugong atake sa mamamayan at rebolusyonaryong kilusan.
Sa nakaraang limang buwan, daan-daang sibilyan sa kanluran at silangang Nepal ang minasaker ng RNA bilang ganti sa natamo nitong pagkatalo sa mga engkwentro sa PLA. Upang pagtakpan ang kanilang mga krimen, iniuulat ito sa midya bilang mga "engkwentro" o "reyd" sa mga diumano'y kampo ng mga rebolusyonaryo. Sa katunayan, ang mga operasyong militar ng RNA ay sistematikong pagpapatupad ng henosidyo sa mga balwarte ng rebolusyon. Gayundin, walang pakundangang minamasaker ang mga nadadakip na aktibista at bihag-digma. Sa pinakahuling "engkwentro" sa Rolpa-Piuthan at Doti (kanlurang Nepal), pinalalabas ng RNA na mga rebolusyonaryo ang mga sibilyang napatay doon upang magpakitang-gilas sa mga imperyalistang amo nito sa US at United Kingdom at ilatag ang mga kundisyon upang mapalawig ang batas militar.
Sinusuportahan ng US ang kontra-rebolusyonaryong digma at diktadurang militar ng monarkiya sa Nepal. Isinali nito ang PLA at PKN(M) sa listahan ng tinatagurian nitong "terorista".
Noong Enero, bumisita sa bansa si US Sec. of State Colin Powell upang simulan ang paghahanda para sa malawakang interbensyon laban sa armadong rebolusyon at para itayo ang permanenteng base militar ng US sa bansa. Nang bumisita sa US nitong Mayo si Sher Bahadur Deuba, prime minister ng Nepal, binuo na ang plano ng armadong panghihimasok ng US sa bansa. Naglaan na rin ang US ng $20 milyon ayudang militar, mga armas, bala at helikopter para gamitin ng RNA sa pagtugis sa mga rebolusyonaryo sa kabundukan.
Iniutos din ng US ang pag-abandona sa taktika ng pakikipagnegosasyon sa mga rebolusyonaryo sa harap ng panawagan para rito ng malawak na hanay ng mamamayan at maging ng ilang mga reaksyunaryo.
Bilang tugon, itinatag ng PKN(M) ang United Revolutionary Peoples Council sa pambansang antas upang kumatawan sa iba-ibang nasyunalidad, castes (o mga saray ng lipunan), mga kababaihan, organisasyon, komite sa nagkakaisang prente at mga patriyotiko at demokratikong pwersa sa mga pinalayang purok at itinaas sa panibagong antas ang armadong rebolusyon sa bansa.
Ang lawak at lakas na naabot na ng armadong rebolusyon sa Nepal sa loob ng anim na taon ang naghanda sa mamamayan at mga rebolusyonaryo na harapin ang papasinsin at papaigting na mga atake ng reaksyon at nakaambang armadong interbensyon ng imperyalistang US sa bansa.
| 
