Editoryal:
Lumalawak at lumalakas ang militanteng pakikibaka ng mga manggagawa

Read this article in English

Mabilis na lumalawak at lumalakas ang pakikibaka ng manggagawang Pilipino para sa mas mataas na sahod, kabuhayan at mga karapatang demokratiko at pang-unyon. Papalaki ang mga rali at demonstrasyon sa mga lansangan na nilalahukan ng libu-libong manggagawa at mga tagasuporta nila sa iba�t ibang bahagi ng bansa.

Ang magkasabay at koordinadong pagtataguyod ng P125 dagdag sa arawang sahod ng mga manggagawa sa pribadong sektor at P3,000 dagdag na sweldo ng mga kawani at gurong publiko ay umaani ng malawak na pagsuporta hindi lamang ng mga manggagawa at kawani kundi ng malawak na masa ng sambayanan. Lalong nagpapatampok sa usapin ng dagdag na sahod ang paulit-ulit na pagpapataw ng mga dayuhang monopolyo ng mas mataas na presyo ng mga produktong petrolyo.

Mga manggagawa at mala-manggagawa rin ang nasa unahan ng pakikibaka laban sa pagtataas ng presyo ng langis. Sa ilang syudad ng Mindanao at sa Kabisayaan, pumutok na ang mga pangkalahatang paralisasyon ng transportasyon kasabay ng mga malawakang rali at iba pang aksyong protesta ng mamamayan. Ang ihip ng hangin ay patungo sa lalo pang paglaganap at paglaki ng mga welga at aksyong protesta.

Aktibo rin ang mga manggagawa sa kilusang protesta ng malapad na hanay ng iba�t ibang sektor ng lipunan at pwersang pampulitika laban sa tumitinding paninikil sa malayang pamamahayag, mga maniobra ng rehimeng US-Estrada para baguhin ang reaksyunaryong konstitusyon nang maging lalo pang pabor sa mga dayuhang monopolyong kapitalista at mga burukratang nasa kapangyarihan, talamak na korupsyon at kabulukan sa gubyerno, kroniismo, sabwatan ng mga Marcos at pangkating Estrada para pagkaitan ng katarungan at bayad-pinsala ang libulibong biktima ng pasistang pang-aabuso ng diktadurang Marcos, at panunumbalik sa poder ng mga Marcos at pinakamasahol na mga alipures ng yumaong pasistang diktador.

Ang pananalasa ng kapitalistang krisis na labis-labis na nagpapahirap sa masang manggagawa at lalong nagpasahol sa pagpiga at pagsikil sa lakas-paggawa ang pinakamalaking nagtutulak mismo sa paglaban ng mga manggagawa. Ang upisyal na patakarang nagtataguyod sa busabos na pasahod at mga kalagayan sa paggawa at todong pagbundat sa dayuhang kapital ay lalo pang naging kamuhi-muhi sa harap ng pagbabagsakan ng tinaguriang �mga pamilihang bagong-sibol� at pagpapabulaan ng pandaigdigang krisis sa luksong-palakang pagsulong na ihahatid raw ng imperyalistang �globalisasyon�, deregulasyon at liberalisasyon.

Gaya ng pinatunayan ng karanasan sa pasistang diktadurang Marcos, pansamantala lamang na mapipigil ng pasistang pangwawasak ng unyon at panunupil sa welga ang pagtindig at paglaban ng masang manggagawa. Sa malao�t madali, kahit ang mga baraks na animo�y mga concentration camp sa mga �export processing zone� ay tatagusin at tatagusin ng pagbubuklod at samasamang pakikibaka ng mga manggagawa. Mapait na karanasan mismo ang nagtuturo sa mga manggagawa na hindi pwedeng umasa sa habag at kabutihang-loob ng kapital na gumon sa tubo ni sa katwiran at pagkamakatao ng mga burukratang sunud-sunuran sa interes at kapritso ng malaking kapital. Sa malao�t madali matututunan nilang tanging pagkakaisa at paglaban nila ang kanilang masasandigan upang ipagtanggol ang kanilang kapakanan sa loob at labas ng pabrika.

Sinasalamin din ng pagpapanibagong-sigla ng militanteng kilusang manggagawa ang tagumpay ng Ikalawang Dakilang Kilusang Pagwawasto sa rebolusyonaryong kilusan sa kalunsuran. Hindi kailanman makababalik ang kilusang manggagawa sa matatag na pagsulong sa wastong rebolusyonaryong landas hangga�t hindi naiwawasto at naitatakwil ang malulubhang paglihis at pagkakamali na nagbunga ng malalaking pinsala at pag-atras ng rebolusyonaryong kilusan sa kabuuan, kabilang na ang rebolusyonaryong kilusang manggagawa. Pinatunayan ng mabilis na pagkabulok, pagkakalantad, pagkakahiwalay at pagkalansag ng mga rebisyunistang taksil na ang maling linyang insureksyunista�t militarista, rebisyunista, ekonomista at populista ang pinakamabagsik na lasong sumisira sa kilusang manggagawa mula sa loob.

Bunga ng mga mapanirang impluwensya ng insureksyunismong lunsod, rebisyunismo, ekonomismo at burukratismo, ang kilusang manggagawang matapang na sumalungat sa strike ban ng pasistang diktadurang Marcos at nagkamit ng maniningning na tagumpay sa pakikibaka kahit sa katindihan ng pasistang pananakot ay hindi matatag at hindi mabisang nakalaban sa panimulang arangkada ng pagpapalaganap ng kontraktwalisasyon, kaswalisasyon at mga patakarang anti-unyon at antiwelga sa panahon ng papet na rehimeng Aquino at Ramos. Nawaldas ang mga pagkakataon, pwersa at rekurso sa mga insureksyunistang plano at pagtatangka; malubhang napabayaan ang mga saligang gawain sa pagbubuo sa ideolohiya, pulitika at organisasyon; at lumikha ng papalalim at papalaking guwang sa sariling hanay ang pamamayagpag ng mga kaisipan at linyang rebisyunista, ekonomista at populista. Mas malaki pang pinsala ang ginawa ng tahasang panghahati at kampanyang demolisyong anti-Partido na pinamunuan ng mga rebisyunistang taksil na nakabase sa kilusang lunsod.

Bagamat masiglang muling sumusulong sa iba�t ibang sentrong lunsod, patuloy na iniinda ng rebolusyonaryong kilusang manggagawa ang mga epekto ng malalaking pinsala at pag-atras sa nakaraan. May mga importanteng konsentrasyon ng mga manggagawa na kailangan pang muling saklawin o lubhang manipis pa ang gawain. Malaki pa ang bilang ng organisadong lakas na kailangang bawiin. Kailangang magpalitaw at magsanay ng mas marami pang organisador at lider unyon at punuan ang napakanipis pang latag ng pwersa at gawain sa maraming bahagi ng bansa. May mga lugar na patuloy na kumplikado at mahirap ang pagpapalawak at pagpapanibagong-lakas dahil sa pananabotahe at panggugulo ng mga rebisyunistang taksil.

Sa pagsulong ng pakikibakang manggagawa, dapat ding paghandaan at matatag na labanan ang lumalawak at tumitinding pasistang panunupil at pananalakay ng rehimeng US-Estrada. Nakatali ang buong patakaran sa ekonomya ng rehimeng US-Estrada sa pambubusabos at pagpapatahimik sa mga manggagawa, kung kayat nakahanda itong pakawalan ang buong lupit ng pasismo upang hadlangan ang pagsulong ng mga pakikibaka ng mga manggagawa. Kailangan, kung gayon, na itaas ang militansya at diwang mapanlaban ng mga manggagawa upang matapang at matatag na harapin at biguin ang pasistang kampanya ng rehimen.

Mapapanday ito sa proseso ng mapangahas na pagsulong at pagpapaigting ng mga welga ng mga manggagawa sa mga pabrika. Dito�y bigyan ng espesyal na pansin ang hakbang-hakbang na pagtitipon ng pagkakaisa at kolektibong determinasyon ng unyon ng mga manggagawa na sama-samang harapin ang mga sakripisyo at pangibabawan ang mga kahirapan sa proseso ng masalimuot, at minsa�y matagalang mga welga. Ang pagkakaisa at kolektibong determinasyong ito ang magtitiyak na kahit tumatagal, ang mga welga ng mga manggagawa ay lumalakas, humahamig ng simpatya at suporta ng paparaming mga manggagawa at nagiging mas mabisang sandata upang ipaglaban ang interes ng mga manggagawa. Ang mga bagay na ito rin ang saligan upang matipon ng mga manggagawa ang papalawak na suporta ng mga demokratiko at patriyotikong pwersa sa mga pagkilos at paglaban ng mga manggagawa.

Sa pagsulong ng mga pakikibaka ng mga manggagawa, kinakailangang ikonsentra ang kanilang lakas sa pana-panahon at napapanahong mga pagkakataon sa pamamagitan ng pagpapakilos ng papalaking bilang nila sa mga aksyong masa. Ang paghugos ng puupuong libong mga manggagawa sa lansangan at paglulunsad ng sabay-sabay na welga ang isa sa pinakaepektibong paraan ng paggigiit ng laban para sa karagdagang sahod. Isa rin ito sa pinakaimportanteng elemento sa paglaban ng mamamayang Pilipino sa mga maka-imperyalista at pasistang patakaran ng reaksyunaryong rehimeng US-Estrada. Nagsisilbing pinakamatibay na muog ng demokratikong kilusang masa sa kalunsuran ang kilusang manggagawa na nagbibigay-inspirasyon at tapang at pumupukaw sa militansya ng mga demokratiko at patriyotikong pwersa.

Kaalinsabay ng mabilis na pagsulong ng militanteng pakikibaka ng mga manggagawa, kinakailangang puspusang pasiglahin ang pagmumulat sa kanila hinggil sa pambansa-demokratikong rebolusyon, at sa partikular, hinggil sa armadong pakikibaka sa kanayunan upang magkaroon sila ng lahatang-panig na pananaw sa rebolusyonaryong proseso ng pagbabago ng lipunang Pilipino. Habang may mga pagkakataong maaaring maging lunsaran ng gayong pagmumulat ang mga aktibidad ng unyon, hindi nawawala ang pangangailangang buklurin ang masang manggagawa sa mga lihim na grupo at sangay ng Partido upang organisahin ang iligal na propaganda, ang pangangalap ng suporta para sa armadong pakikibaka, ang integrasyon sa kanayunan at rekrutment sa Bagong Hukbong Bayan. Inaasahan nating mabilis na bubwelo ang tungkuling ito kasabay ng pagsigla ng mga pakikibaka ng mga manggagawa.

00 Setyembre 1999
Edisyong Pilipino

	Editoryal: Lumalawak at lumalakas ang militanteng pakikibaka ng mga manggagawa
	Ang Bayan, sa internet
	Mga rali at welga sa Nobyembre 16: Patuloy na pag-igting ng pakikibaka para sa P125 dagdag sa sahod
	Deregulasyon sa industriya ng langis Sabwatan ng mga imperyalista, mga kartel ng langis at ng reaksyunaryong gubyerno
	Liham mula sa Rehiyong Ilokos-Kordilyera
	Ang usapin ng sesesyon at karapatan sa pagpapasya-sa-sarili ng mamamayang Moro
	Ika-50 taong anibersaryo ng tagumpay ng demokratikong rebolusyon sa Tsina
	Sa ika-50 taong anibersaryo ng tagumpay ng demokratikong rebolusyon sa Tsina Ang busabos na kalagayan ng mga manggagawa sa Tsina
	Sa ika-50 taong anibersaryo ng tagumpay ng demokratikong rebolusyon sa Tsina Ang sosyalistang transpormasyon ng kanayunan at pagbabaligtad nito
	Binabati ng mamamayang Pilipino ang mamamayan ng East Timor at tinutuligsa ang mga atake laban sa kanila ng mga pasistang Indones
	Hudyat sa ibayong pagsulong ng antipyudal na pakikibaka sa Timog Katagalugan Panimulang tagumpay sa pagpawi ng resikada
	Patuloy na paglulunsad ng mga taktikal na opensiba ng BHB-Bikol
	Balita