![]() | |||||||||||||||||||||||
|
|
Bigo ang todong pananalakay ng rehimen sa rebolusyonaryong kilusan sa Southern Tagalog (ST). Hindi napigilan ng mga pagtatangka ng rehimen ang patuloy na pagsulong ng rebolusyon sa rehiyon. Mula 1998, inilunsad ng reaksyunaryong gubyerno sa rehiyon ang mga eksperimento sa iba't ibang taktika at doktrinang naglalayong wasakin ang malalakas na bahagi ng rebolusyonaryong pwersa. Para rito, ginawang pangunahing usaping pambansa ng rehimeng Arroyo ang ST, sa partikular, ang isla ng Mindoro. Pinalaki ang pakat ng mga pwersang militar, pulisya at paramilitar. Ang 13 panagupang batalyon sa rehiyon noong 1999 ay dinagdagan at naging 38 batalyon na sa unang hati ng 2003. Naghahasik ng teror sa rehiyon ang rehimen sa pamamagitan ng malawakan at matitinding paglabag sa karapatang-tao ng mamamayan. Subalit hindi nagpagapi ang rebolusyonaryong kilusan sa ST. Sa okasyon ng ika-35 anibersaryo ng pagkakatatag ng Partido Komunista ng Pilipinas, ipinagdiwang ng buong rehiyon ang pinakahuling mga tagumpay ng rebolusyonaryong kilusan. Ayon sa pahayag ng Kalihiman ng Komiteng Rehiyon ng Partido ng ST (KR-ST), humahalaw ng mayayamang aral ang Partido, hukbong bayan at rebolusyonaryong mamamayan sa mahigit limang taong karanasan sa pagharap sa matinding pananalakay ng kaaway. Ang mga aral na ito ay pinanghahawakan para ibayong isulong ng rebolusyonaryong pakikibaka sa ST. Sa panahong sinaklaw, inabot ng kasapian ng Partido sa ST ang pinakamalaking bilang nito sa buong kasaysayan ng rehiyon. Dagdag dito, higit na bihasa sila sa teorya ng Marxismo-Leninismo-Maoismo at sa teorya at praktika ng demokratikong rebolusyon. Patuloy na lumalawak at lumalakas ang baseng masa sa kanayunan at kalunsuran ng rehiyon. Nagsimula na ring umabante ang mga larangang gerilyang pansamantalang umatras sa mga huling taon dahil sa pinatinding mga operasyon ng kaaway. Sa katunayan, nakapaglulunsad na ang BHB ng matutunog na taktikal na opensiba sa mga larangang gerilyang ito. Sa mahigit 10 larangang gerilya sa rehiyon, ilampung libo ang mamamayang organisado at ilandaang libo ang impluwensyado. Ang mga larangang gerilyang ito ay may ilampung platun ng hukbong bayan na nasasandatahan ng malalakas na riple at ilang mabibigat na sandatang anti-aircraft, anti-tank at anti-fortification (makapangwawasak ng kongkreto at iba pang matitigas na pader). Mayroon ding ilang libong milisyang bayan at mga kwerpo sa pagtatanggol-sa-sarili na naaarmasan ng mga katutubong sandata, mas mahihinang riple at mga pistola.
Ang pagpapatupad sa patakarang paunlarin ang mga platun bilang saligang pormasyon ng hukbong bayan ay napatunayang epektibo sa pagpapalakas ng kakayahan ng mga yunit ng hukbo sa mga opensiba at depensiba at sa gawaing masa. Pinaunlad sa lakas-kumpanya at kinonsolida ang hukbo sa mga larangang gerilya. Sa gayon, napalakas ang kakayahan ng BHB sa rehiyon na biguin ang mga pagtatangka ng kaaway na wasakin ang hukbong bayan at ang mga larangan at sonang gerilya. Itinuturing ng rebolusyonaryong kilusan sa ST na isang malaking tagumpay ang pagdaraos ng Ikalawang Panrehiyong Kumperensya sa Gawaing Masa sa Kanayunan. Dito tinipon, sinistematisa at masusing pinag-aralan ang mga karanasan ng iba't ibang prubinsya para kumprehensibong maharap ang mga suliranin sa pagsusulong ng rebolusyong agraryo, pagtatayo ng base at pagtatayo ng mga organo ng kapangyarihang pampulitika. Nananatiling mataas ang militansya ng demokratikong kilusang masa sa kalunsuran sa harap ng todo-todong panggigipit sa mga demokratikong organisasyon at pamamaslang sa mga kasapi nito. Gumagampan din ang kilusang masa sa kalunsuran ng mahalagang papel sa paglaban sa pasismo at militarisasyon sa kanayunan. Matamang inilalantad at tinutuligsa ng kilusang masa ang bawat pandarahas sa mamamayan. Kasabay nito, ang humahabang listahan ng krimen sa mga operasyon ng mga RSOT (Reengineered Special Operations Team) ng militar ay patuloy na nagtuturo sa mamamayan na huwag suportahan ang kaaway. Kasabay ng paglalahad ng mga tagumpay, ipinahayag ng KR-ST na marami pang hamong kinakaharap ang buong rebolusyonaryong kilusan sa rehiyon. Kabilang dito ang tuluy-tuloy na pagsasabuhay sa Marxismo-Leninismo-Maoismo, pagtataguyod sa proletaryong estilo ng paggawa ng simpleng pamumuhay at puspusang pakikibaka, at patuloy na paglubos sa mga tagumpay ng Ikalawang Dakilang Kilusang Pagwawasto. Ayon pa sa Kalihiman, buo ang tiwala ng Partido na aanihin ng rebolusyonaryong kilusan ang malalaking tagumpay sa darating na mga buwan at taon para patuloy na mag-ipon ng lakas tungo sa ibayong pag-abante ng pagbubuo ng Partido, armadong pakikibaka, nagkakaisang-prente't gawaing alyansa at ng rebolusyonaryong kilusang masa't mga kampanyang masa. ![]()
| |||||||||
|
[ HOME | CPP | NPA |NDF | Ang Bayan | KR Online |Public Info] [Publications | Specials | Kultura | Photos] The Philippine Revolution Web Central is maintained by the Information Bureau of the Communist Party of the Philippines. Click here to send your feedback. |
|